1 Samuel 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Sang maagaw sang mga Filistinhon ang Kaban sang Kasugtanan sang Dios, gindala nila ini halin sa Ebeneser pakadto sa siudad sang Asdod.

2Gindala nila ini sa sulod sang templo ni Dagon nga ila dios, kag ginpatindog nila sa tupad sang iya estatwa.

3Aga pa sang madason nga adlaw, nakita sang mga tawo sang Asdod nga ang estatwa ni Dagon natumba nga nagahapa sa duta sa atubangan sang Kaban sang Kasugtanan sang Ginoo. Ginkuha nila ini kag ginbalik sa iya nahamtangan.

4Aga pa gid sa madason nga adlaw nakita nila nga ang estatwa natumba liwat sa atubangan sang Kaban sang Kasugtanan sang Ginoo. Ang iya ulo kag ang duha ka kamot nautod kag yara sa alagyan sang pwertahan, ang iya lamang lawas ang nabilin.

5Gani amo ini ang kabangdanan nga bisan karon nga adlaw ang mga pari ni Dagon kag ang tanan nga mga nagasimba sa Asdod wala nagatapak kundi nagalakad lang sa amo nga lugar.

6Ang Ginoo nagsilot sang mga tawo sang Asdod sing tama gid kag ginpakugmat sila. Ginpatuboan niya sila kag ang mga tawo sa palibot nga kadutaan sing mga hubag.

7Sang makita nila ang nahanabo, nagsiling sila, “Ang Dios sang Israel nagasilot sa aton kag sa aton dios nga si Dagon. Indi naton mapatener diri ang Kaban sang Kasugtanan.”

8Gani nagpadala sila sing mga mensahero kag ginpatawag ang lima ka mga hari sang mga Filistinhon kag nagpamangkot sa ila, “Ano ang aton himuon sa Kaban sang Kasugtanan sang Dios sang Israel?” Nagsabat sila, “Dalha ninyo ina sa Gat.” Gani gindala nila ang Kaban sang Kasugtanan sa Gat, isa man ka siudad sang mga Filistinhon.

9Pero sang madala nila ini didto, ang Ginoo nagsilot sang siudad kag nagtuga sang daku nga kinagula. Ang Dios nagsilot sa ila paagi sa pagpatubo sing mga hubag sa tanan nga mga tawo sang siudad, bata kag tigulang.

10Gani ginpadala nila ang Kaban sang Kasugtanan sa siudad sang Ekron, isa man ka siudad sang mga Filistinhon. Sang mag-abot ini didto ang mga tawo nagsininggit, “Gindala nila diri ang Kaban sang Kasugtanan sang Dios sang Israel, sa pagpatay sa aton tanan!”

11Gani ila liwat ginpatawag ang tanan nga mga hari sang mga Filistinhon kag ginsingganan, “Ipabalik ang Kaban sang Kasugtanan sang Israel sa iya kaugalingon nga lugar, agod nga indi kami magkalamatay kag ang amon mga panimalay.” Nagkinagula ang bug-os nga siudad, tungod kay ang Dios nagsilot sa ila sing tama gid.

12Bisan ang wala magkalamatay, gintuboan sing mga hubag, kag ang mga tawo nagpangayo sing bulig sa ila mga dios.

← Chapter 4 Jump to: Chapter 6 →