1 Samuel 23

Ilonggo (Maayong Balita nga Biblia (2012))

← Chapter 22 Jump to: Chapter 24 →

1Karon nabalitaan ni David nga ginasalakay sang mga Filistinhon ang banwa sang Keila, kag ginapangawat nila ang bag-o lang naani nga mga patubas.

2Gani nagpamangkot sia sa Ginoo, “Magalakat bala ako sa pagsalakay sini nga mga Filistinhon?” Nagsabat ang Ginoo, “Huo, salakaya sila kag luwasa ang Keila.”

3Pero ang mga tinawo ni David nagsiling sa iya, “Nagakahadlok gani kami diri sa Juda, daw ano pa gid ayhan kon maglakat kami sa Keila kag magsalakay sang mga hangaway sang mga Filistinhon!”

4Gani nagpamangkot liwat si David sa Ginoo, kag ang Ginoo nagsiling sa iya, “Lakat kag salakaya ang Keila tungod kay padag-on ko ikaw sa mga Filistinhon.”

5Gani si David kag ang iya mga tinawo nagkadto sa Keila kag nagsalakay sang mga Filistinhon. Ginpamatay nila ang madamo nga mga Filistinhon kag ginpanguha ang ila mga kasapatan. Gani ginluwas ni David ang banwa.

6Sang magpalagyo si Abiatar, anak ni Ahimelek, nagkadto sia kay David sa Keila nga nagadala sang bestidora.

7Ginsugiran si Saul nga si David nagkadto sa Keila, kag nagsiling sia, “Ang Dios nagtugyan sa iya sa akon gahom. Si David nakasulod sa banwa nga may pader palibot kag may pwerta nga natrangkahan kag indi sia makagwa.”

8Gani si Saul nagtawag sang iya mga hangaway sa paghanda, sa pagsalakay sang Keila, kag sa pagkibon kay David kag sa iya mga tinawo.

9Sang pagkabati ni David nga si Saul nagaplano sa pagsalakay sa iya, nagsiling sia kay Abiatar nga pari, “Dalha diri ang bestidora.”

10Dayon si David nagsiling, “O Ginoo, Dios sang Israel, nakabati ako nga si Saul nagaplano sa pagsalakay kag paglaglag sang Keila tungod sa akon, nga imo alagad.

11Itugyan bala ako sang mga pumoluyo sang Keila kay Saul? Magaabot gid bala si Saul, suno sa akon nabatian? O Ginoo, Dios sang Israel, nagapakitluoy ako nga sabton mo ako!” Ang Ginoo nagsabat, “Magaabot si Saul.”

12Nagpamangkot si David, “Itugyan bala ako kag ang akon mga tinawo sang mga pumoluyo sang Keila kay Saul?” Nagsabat ang Ginoo, “Huo, itugyan kamo nila.”

13Gani sa gilayon si David kag ang iya mga tinawo nga mga 600 tanan naghalin sa Keila kag nagsaylosaylo sa nagkalainlain nga mga lugar. Sang pagkabati ni Saul nga nagpalagyo si David sa Keila, wala niya pagpadayuna ang iya plano.

14Si David nagpanago sa kabukiran sang desierto malapit sa Zif. Si Saul nagapadayon sa pagpangita sa iya adlaw-adlaw, pero ang Dios wala magtugyan kay David sa gahom ni Saul.

15Si David nagkahadlok tungod kay si Saul nagatinguha gid sa pagpatay sa iya. Sang si David didto sa Hores, sa desierto malapit sa Zif,

16si Jonatan nagkadto sa iya didto kag nagpasalig sa iya sang pag-apin sang Dios.

17Nagsiling si Jonatan sa iya, “Indi ka magkahadlok. Ang akon amay nga si Saul indi makahalit sa imo. Magahari ka sa Israel, kag ako mangin-ikaduha lang sa imo sa gahom, kag nahibaluan gid ini sang akon amay.”

18Sila nga duha nagsumpaanay sa presensya sang Ginoo sa ila pag-amiguhay. Si David nagpabilin sa Hores kag si Jonatan nagpauli.

19May mga tawo halin sa Zif nga nagkadto kay Saul sa Gebeat kag nagsugid, “Si David nagapanago diri sa amon kadutaan sa Hores, sa Bukid sang Hakila, sa nabagatnan nga bahin sang desierto sang Juda.

20Mahal nga hari, nahibaluan namon kon daw ano ang imo pagtinguha sa pagdakop sa iya, gani kadto ka sa amon kadutaan kay sigurohon gid namon nga madakpan mo sia.”

21Nagsabat si Saul, “Kabay ang Ginoo magbendisyon sa inyo sang inyo kaayo sa akon!

22Lakat kamo kag siguroha gid ninyo, pangitaa ninyo kag pat-uron kon diin gid sia kag kon sin-o ang nakakita sa iya didto. Nakabati ako nga masyado gid sia kaabtik.

23Pangitaa ninyo sing pat-od ang mga lugar nga iya ginapanaguan, kag balik gid kamo dayon sa akon kag sugiran ako sang nagakaigo nga balita kay magaupod dayon ako sa inyo. Kon ara pa sia sa sina nga lugar, pangitaon ko gid sia, bisan pa latason ko ang bug-os nga duta sang Juda.”

24Gani naglakat sila kag nagbalik sa Zif nga una kay Saul. Si David kag ang iya mga tinawo yadto didto sa desierto sang Maon sa mamingaw nga patag sa nabagatnan sang desierto sang Juda.

25Si Saul kag ang iya mga tinawo naglakat kag nagpangita kay David, pero nahibal-an ini ni David, gani nagpanago sia sa bukid sang desierto sang Maon nga may dalagku nga mga bato kag nagpabilin sia didto. Sang pagkabati sini ni Saul naglakat sia sa pagpangita kay David.

26Si Saul kag ang iya mga tinawo yara sa pihak sang bukid kag si David kag ang iya mga tinawo yara man sa pihak. Nagadalidali gid sila sa pagpalagyo kay Saul kag sa iya mga tinawo, nga nagalikop sa pagdakop sa ila.

27Pero sa amo gid nga tion nag-abot ang isa ka mensahero kag nagsiling kay Saul, “Magbalik ka sing dalidali! Ang mga Filistinhon naggubat sang aton pungsod!”

28Gani si Saul nag-untat sa paglagas kay David kag nagbalik sa pagpakig-away sa mga Filistinhon. Amo ini ang kabangdanan nga yadto nga lugar gintawag ang Bukid nga Nagaulot.

29Halin didto si David nagkadto sa sakop sang Engedi, sa diin didto sia nagpanago.

← Chapter 22 Jump to: Chapter 24 →