1 Samuel 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Sa sadto nga tion ang mga tawo sang Israel naggwa sa pagpakig-away batok sa mga Filistinhon. Ang mga Israelinhon naghimo sang ila kampo sa Ebeneser kag ang mga Filistinhon naghimo man sang ila kampo sa Afec.

2Ang mga Filistinhon naghanda sa pagsalakay, kag sa tapos ang malapuyot nga pag-inaway ginlutos nila ang mga Israelinhon, kag napatay nila ang mga 4,000 ka mga tawo sa inaway.

3Sang pagbalik sang mga nabilin nga mga hangaway sa ila kampo, ang mga pangulo sang Israel nagsiling, “Ngaa bala gintugotan sang Ginoo nga malutos kita sang mga Filistinhon sini nga adlaw? Dali, dalhon naton ang Kaban sang Kasugtanan sang Ginoo halin sa Silo agod sia magaupod sa aton kag magaluwas sa aton gikan sa aton mga kaaway.”

4Gani nagpadala sila sing mga mensahero sa Silo kag ginpakuha ang Kaban sang Kasugtanan sang Ginoo nga Makagagahom, nga nagapungko sa iya trono sa tunga sang mga kerubin. Ang duha ka mga anak nga lalaki ni Eli nga si Opni kag si Fineas nag-upod sa Kaban sang Kasugtanan.

5Sang pag-abot sang Kaban sang Kasugtanan, ang mga Israelinhon naghinugyaw sa bagay nga ang duta nagtay-og.

6Ang mga Filistinhon nakabati sang mga paghinugyaw kag nagsiling, “Pamatii ang mga paghinugyaw sa kampo sang mga Hebreo! Ano bala ang buot silingon sini?” Kag sang ila nahibaluan nga ang Kaban sang Kasugtanan sang Ginoo nag-abot sa kampo sang mga Hebreo,

7kinulbaan sila kag nagsiling, “Nag-abot ang isa ka dios sa ila kampo! Malutos na kita sini! Wala pa gid sing may natabo sa aton nga kaangay sini halin sang una!

8Tapos gid kita sini! Sin-o bala ang makaluwas sa aton sa sining gamhanan nga mga dios? Sila amo ang mga dios nga nagpamatay sang mga Ehiptohanon sa desierto!

9Mga Filistinhon, magpakaisog kamo! Magpakig-away kamo subong mga lalaki, kay kon indi mangin-ulipon kita sang mga Hebreo, subong nga sila nangin-ulipon naton. Gani magpakig-away subong mga lalaki!”

10Ang mga Filistinhon nagpakig-away sing tudo gid. Ang mga Israelinhon nalutos kag nagpalalagyo pauli sa ila mga balay. Madamo gid ang nagkalamatay: 30,000 ka mga hangaway nga Israelinhon ang napatay.

11Ang Kaban sang Kasugtanan sang Ginoo gin-agaw, kag ang mga anak ni Eli nga si Opni kag si Fineas napatay.

12May isa ka tawo gikan sa tribo ni Benjamin nga nagdalagan halin sa patag-awayan pakadto sa Silo, kag sa amo man nga adlaw nag-abot sia. Sa pagpakita sang iya kasubo, gingisi niya ang iya bayu kag nagbutang sing yab-ok sa iya ulo.

13Sang pag-abot niya, si Eli nagapungko sa iya pulongkuan sa higad sang dalan nga nagabantay, kag nabalaka gid sia nahanungod sa Kaban sang Kasugtanan sang Dios. Ginsugid sang tawo ang balita sa banwa, kag ang tanan nagtiniyabaw sa kahadlok.

14Nabatian ni Eli ang ginahod kag nagpamangkot, “Ano bala ining ginahod?” Ang tawo nagdalidali pakadto kay Eli sa pagsugid sa iya sing balita.

15Karon ang edad ni Eli nobentay otso na ka tuig kag halos indi na sia makakita.

16Ang tawo nagsiling, “Nakapalagyo ako halin sa inaway kag nagdalagan tubtob makaabot diri karon nga adlaw.” Si Eli nagpamangkot sa iya, “Ano ang natabo, toto?”

17Ang tawo nagsabat, “Ang mga Israelinhon nagpalalagyo sa mga Filistinhon, kag isa ini ka daku nga pagkalutos para sa aton! Wala labot sina, ang imo duha ka mga anak nga si Opni kag si Fineas napatay, kag ang Kaban sang Kasugtanan sang Dios naagaw!”

18Sang pagsambit sang tawo nahanungod sa Kaban sang Kasugtanan, nagtingkaya si Eli sa iya pulongkuan sa kilid sang pwerta sang siudad. Tigulang na gid sia kaayo kag tama ka tambok sa bagay nga sang pagkatumba niya nalunggo ang iya liog, kag napatay sia. Nanginhukom sia sa Israel sa sulod sang kwarenta ka tuig.

19Ang umagad ni Eli nga asawa ni Fineas nagabusong, kag manugbata na sia. Sang pagkabati niya nga ang Kaban sang Kasugtanan sang Dios naagaw, kag ang iya ugangan kag bana napatay, sa gilayon ginsakitan sia kag nagbata.

20Gahimumogto na sia, pero ang babayi nga nagabulig sa iya nagsiling, “Indi ka magpakulba! Ang bata mo lalaki!” Pero wala sia magpamati ukon nagsabat.

21Sang ulihi ginhingalanan niya ang bata kay Ikabod nga nagasiling, “Ang himaya sang Dios wala na sa Israel”— ginpatungod niya ini sa pag-agaw sang Kaban sang Kasugtanan kag sa pagkapatay sang iya ugangan kag sang iya bana.

22Nagsiling sia, “Ang himaya sang Dios wala na sa Israel, tungod kay ang Kaban sang Kasugtanan sang Dios naagaw.”

← Chapter 3 Jump to: Chapter 5 →