1 Samuel 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1Ang bata nga si Samuel nagaalagad sa Ginoo sa idalom sang pagdumala ni Eli. Sa sadto nga mga inadlaw talagsa lang mabatian ang Ginoo nga nagahambal, kag malaka ang mga palanan-awon halin sa iya.

2Isa ka gab-i si Eli nga halos na makakita nagakatulog sa iya kwarto.

3Si Samuel iya didto nagatulog sa santuaryo, sa diin yadto didto ang Kaban sang Kasugtanan sang Dios. Samtang nagasiga pa ang suga didto

4ang Ginoo nagtawag kay Samuel, kag nagsabat sia, “Yari ako!”

5Dayon nagdalagan sia pakadto kay Eli kag nagsiling, “Gintawag mo ako, kag karon yari na ako.” Pero si Eli nagsabat, “Wala ako magtawag sa imo, magtulog ka na.” Gani si Samuel nagbalik sa iya higdaan.

6Ang Ginoo nagtawag liwat kay Samuel, kag ang bata nagbangon, nagkadto kay Eli kag nagsiling, “Gintawag mo ako, kag yari naman ako.” Pero si Eli nagsabat, “Anak ko, wala ako magtawag sa imo, balik ka sa imo higdaan.”

7Karon si Samuel wala pa makakilala sa Ginoo, kay ang Ginoo wala pa gid makahambal sa iya.

8Ang Ginoo nagtawag kay Samuel sa ikatlo ka bes, kag nagbangon sia, nagkadto kay Eli kag nagsiling, “Gintawag mo gid ako, kag karon yari ako.” Dayon natalupangdan ni Eli nga ang Ginoo amo ang nagatawag sa bata,

9gani ginsingganan niya sia, “Balik ka sa imo higdaan, kag kon magtawag sia liwat sa imo magsiling ka, ‘Hambal ka, Ginoo, ang imo alagad nagapamati.’” Gani si Samuel nagbalik sa iya higdaan.

10Ang Ginoo nag-abot kag nagtindog didto, kag nagpanawag subong sang iya anay ginhimo, “Samuel! Samuel!” Si Samuel nagsabat, “Hambal ka, ang imo alagad nagapamati.”

11Ang Ginoo nagsiling sa iya, “Sa indi madugay may himuon ako nga makahaladlok nga butang sa mga tawo sang Israel sa bagay nga ang tagsatagsa nga makabati sini magakurog.

12Sa sadto nga adlaw tumanon ko ang tanan nga ginsiling ko batok sa panimalay ni Eli halin sa ginsugoran tubtob sa katapusan.

13Ginsingganan ko na sia nga ako magasilot sa iya panimalay sing walay katapusan tungod kay ang iya mga anak nga lalaki naghambal sing malaut nga mga butang batok sa akon. Nahibal-an ni Eli nga ginahimo nila ini, pero wala niya pagsawaya sila.

14Gani ginasumpa ko sa panimalay ni Eli nga wala sing halad ukon dulot nga makatumbas sa pagkuha sining malaut nga sala.”

15Si Samuel naghigda tubtob mag-aga, dayon nagbangon sia kag ginbuksan ang mga pwertahan sang balay sang Ginoo. Nahadlok sia magsugid kay Eli nahanungod sang iya palanan-awon.

16Gintawag sia ni Eli, “Samuel, anak ko!” Nagsabat si Samuel, “Yari ako!”

17Ginpamangkot sia ni Eli, “Ano ang ginsiling sang Ginoo sa imo? Indi ka maglikom sa akon. Ang Dios magasilot sing tuman sa imo kon indi mo pag-isugid sa akon ang tanan nga ginsiling niya sa imo.”

18Gani ginsugid ni Samuel ang tanan nga ginsiling sa iya kag wala sia sing may ginlikom. Si Eli nagsiling, “Sia amo ang Ginoo, himuon niya ang bisan ano nga ginahunahuna niya nga maayo.”

19Si Samuel nagdaku, kag ang Ginoo nag-upod sa iya, kag ang tanan nga ginsiling ni Samuel ginpamatud-an niya.

20Gani ang tanan nga mga tawo sa bug-os nga duta sang Israel nakakilala nga si Samuel isa gid ka propeta sang Ginoo.

21Ang Ginoo nagpadayon sa pagpahayag sang iya kaugalingon sa Silo, sa diin nagpakita sia kay Samuel kag naghambal sa iya. Kon maghambal si Samuel ang bug-os nga Israel nagapamati.

← Chapter 2 Jump to: Chapter 4 →