1 Samuel 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Si David nagkadto sa pari nga si Ahimelek sa Nob, kag si Ahimelek nagsugata sa iya nga nagakurog kag nagpamangkot, “Ngaa nga nagkadto ka diri nga nagaisahanon lang?”

2Nagsabat si David, “Nag-abot ako sa sugo sang hari. Nagsiling sia sa akon nga indi ako magsugid bisan kay sin-o sang iya ginsugo sa akon nga himuon. Nahanungod sa akon mga tinawo, nagsiling ako sa ila nga magakitaay lang kami sa isa ka lugar.

3Karon ano bala ang sarang naton makaon dira? Hatagi ako sing lima ka bilog nga tinapay ukon bisan ano lang dira.”

4Nagsabat ang pari, “Wala ako sing ordinaryo nga tinapay, kundi balaan lamang nga tinapay. Sarang ninyo makaon ini kon ang imo mga tinawo wala makapakighirop sa mga babayi sining pila ka adlaw nga nagligad.”

5Nagsabat si David, “Wala gid kami makapakighirop sa mga babayi. Ang akon mga tinawo matinlo kon maglakat kami bisan sa ordinaryo nga misyon. Daw ano pa gid karon nga tion nga pinasahi ang amon misyon!”

6Gani ang pari naghatag kay David sang balaan nga tinapay, tungod kay ang iya tinapay nga nabilin amo lamang ang nahalad sa Dios nga ginkuha sa balaan nga lamisa kag gin-ilisan ini sang bag-o nga tinapay.

7Karon si Doeg nga taga-Edom nga pangulo sang manugbantay sang mga kasapatan ni Saul, natabuan nga yadto didto sadto nga adlaw sa pagsimba sa Ginoo.

8Nagsiling si David kay Ahimelek, “May bangkaw ka bala ukon espada nga mahatag sa akon? Wala ako makadala sang akon espada ukon bisan ano nga hinganiban kay nagadali ako tungod sa sugo sang hari.”

9Nagsabat si Ahimelek, “May espada ako nga iya ni Goliat nga Filistinhon, nga imo ginpatay didto sa Kapatagan sang Ela. Yara ini sa likod sang nabutangan sang bestidora kag naputos ini sa panapton. Kon gusto mo, kuhaa lang. Amo gid lamang ina ang hinganiban diri.” Nagsiling si David, “Ihatag ina sa akon, wala na sing espada nga makapareho sina!”

10Gani si David naglakat nga nagapalagyo kay Saul, kag nagkadto kay Haring Akis sang Gat.

11Ang mga opisyales sang hari nagsiling kay Akis, “Indi bala ini si David, ang hari sang iya pungsod? Amo ini sia ang ginakanta sang mga babayi samtang nagasaot sila, ‘Si Saul nagpatay sing mga linibo, pero si David nagpatay sing mga tig-napulo ka libo.’”

12Ang ila mga pulong indi malipatan ni David, kag nagkahadlok gid sia kay Haring Akis.

13Gani si David nagpabuangbuang sa ila atubang, kag nagginawi nga daw buang kon ila sia ginapunggan, nagpanguriskuris sia sa mga pwerta sang siudad, kag ginpatulo niya ang iya laway sa iya bungot.

14Gani si Akis nagsiling sa iya mga opisyales, “Tan-awa ninyo, ina nga tawo buang! Ngaa bala gindala ninyo sia sa akon?

15Indi bala nga madamo na ang mga buang diri? Ngaa bala nga magdala pa kamo sing isa pa gid sa pagsabad sa akon paagi sa iya pagbinuang sa akon palasyo?”

← Chapter 20 Jump to: Chapter 22 →