1 Samuel 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Dayon si Samuel nagkuha sang isa ka tibod sang lana sang olivo kag ginbubo sa ulo ni Saul, ginhalukan sia, kag nagsiling, “Ang Ginoo nagahaplas sa imo subong pangulo sang iya mga tawo nga Israelinhon. Magagahom ikaw sa iya mga tawo kag magaluwas sa ila gikan sa ila mga kaaway. Amo ini ang pamatuod nga ang Ginoo nagpili sa imo nga manginpangulo sang iya mga tawo:

2Sa imo paghalin diri karon nga adlaw, imo masugata ang duha ka mga tawo malapit sa lulobngan ni Raquel sa Selsa, sa kadutaan ni Benjamin. Magasugid sila sa imo nga ang mga asno nga imo ginapangita nakita na, kag ang imo amay wala na nagapalibog sa ila, kundi sa imo kag nagapamangkot, ‘Ano ang akon himuon nahanungod sa akon anak?’

3Halin didto magalakat ikaw tubtob makaabot sa kahoy nga terebinto sa Tabor, sa diin masugata mo ang tatlo ka mga tawo nga nagapakadto sa Betel sa pagdulot sang halad sa Dios. Ang isa sa ila nagadala sing tatlo ka mga tinday nga kanding, ang isa may tatlo ka bilog nga tinapay, kag ang isa pa gid nagadala sang sulodlan nga panit nga may bino.

4Sila magaabiabi sa imo kag magahatag sang duha ka bilog nga tinapay nga imo batunon.

5Dayon magtaklad ka sa Bakulod sang Dios sa Gebeat, sa diin yara ang kampo sang mga Filistinhon. Sa pag-abot mo sa banwa masugata mo ang grupo sang mga propeta nga nagapadulhog halin sa altar sa bakulod nga nagatukar sang arpa, bombo, plawta, kag mga lira. Magasaot sila kag magasininggit.

6Dayon pagagamhan ka sang Espiritu sang Ginoo, kag magaimpon ka sa ila sa pagsaot kag sa pagsinggit, kag mangintuhay ikaw nga tawo.

7Kon mahanabo ini nga mga butang, himua ang bisan ano nga ginatuytoy sang Dios nga himuon mo.

8Magauna ikaw sa akon didto sa Gilgal sa diin magapakigkita ako sa imo kag magadulot sang mga halad nga sinunog kag mga halad sa paghiambit. Hulat ka didto sing pito ka adlaw tubtob mag-abot ako kag magasiling sa imo sang imo himuon.”

9Sang paghalin ni Saul kay Samuel, ang Dios naghatag kay Saul sing bag-o nga kinaugali. Kag ang tanan nga ginsiling ni Samuel sa iya nahanabo sadto nga adlaw.

10Sang pag-abot ni Saul kag sang iya suloguon sa Gebeat, ginsugata sia sang isa ka grupo sang mga propeta. Sa hinali gingamhan sia sang Espiritu sang Dios kag nagbuylog sia sa ila pagsinaot kag pagsininggit.

11Ang mga tawo nga nakakilala sa iya sang una nakakita sa iya nga nagahimo sini kag nagpamangkutanay, “Ano ang natabo sa anak nga lalaki ni Kis? Nanginpropeta bala si Saul?”

12Ang isa ka tawo nga nagaestar didto nagpamangkot, “Ti, ang iban iya nga kaupod niya, propeta man bala ang ila mga amay?” Amo ini ang ginhalinan sang hulobaton, “Nanginpropeta bala bisan si Saul?”

13Sang makatapos si Saul sing saot kag singgit, nagkadto sia sa altar sa bakulod.

14Ang tiyo ni Saul nagpamangkot sa iya kag sa iya suloguon, “Diin kamo maghalin?” Nagsabat si Saul, “Nagpangita kami sang mga asno. Sang wala namon makita ang mga asno, nagkadto kami kay Samuel.”

15Nagpamangkot pa gid ang tiyo ni Saul, “Kag ano bala ang iya ginsiling sa inyo?”

16Nagsabat si Saul, “Nagsiling sia sa amon nga ang mga asno nakita na.” Pero wala sia magsugid sa iya tiyo sang ginsiling ni Samuel nahanungod sang iya pagkahari.

17Si Samuel nagpatawag sang mga tawo sa isa ka pagtililipon sa ngalan sang Ginoo sa Mispa,

18kag nagsiling sa ila, “Ang Ginoo, ang Dios sang Israel nagasiling, ‘Ako nagpagwa sa inyo halin sa Ehipto, kag nagluwas sa inyo sa mga Ehiptohanon kag sa tanan nga mga tawo nga nagpigos sa inyo.

19Ako ang inyo Dios, nga nagaluwas sa inyo gikan sa inyo mga kalalat-an kag mga kabudlayan, pero karon ginsikway ninyo ako kag nagpangayo sa akon nga hatagan kamo sang isa ka hari. Gani, karon tipon kamo sing tingob sa atubang ko suno sa inyo mga tribo kag mga kabarangayan.’”

20Gani ginpapalapit ni Samuel ang tagsa ka tribo, kag ang Ginoo nagpili sang tribo ni Benjamin.

21Dayon ginpapalapit ni Samuel ang mga panimalay sang tribo ni Benjamin, kag ang panimalay ni Matri amo ang napilian. Dayon ang mga lalaki sang panimalay ni Matri nagpalapit kag si Saul nga anak ni Kis amo ang napilian. Ginpangita nila sia pero wala nila sia makita.

22Nagpamangkot sila liwat sa Ginoo, “Diin bala sia?” Ang Ginoo nagsabat, “Yara si Saul, nagapanago sa mga kargamento.”

23Gani nagdalagan sila kag ginkuha si Saul kag gindala sa atubang sang mga tawo, kag sang nagatindog sia kaupod sa ila taga-abaga lang niya ang bisan sin-o sa ila.

24Si Samuel nagsiling sa mga tawo, “Yari ang tawo nga ginpili sang Ginoo! Wala sing isa sa aton nga kaangay sa iya.” Ang tanan nga mga tawo nagsinggit, “Mabuhay ang hari!”

25Si Samuel nagsaysay sa mga tawo sang mga kinamatarong kag mga katungdanan sang isa ka hari, kag ginsulat ini niya sa libro, nga iya gintago sa balaan nga lugar. Dayon ginpapauli niya ang mga tawo.

26Si Saul nagpauli man sa Gebeat. May nag-upod sa iya nga isganan nga mga tawo nga ang ila tagipusoon gintandog sang Dios.

27Pero may pila ka huroshuros nga mga tawo nga nagsiling, “Paano ang pagluwas sini nga tawo sa aton?” Gintamay nila si Saul kag wala nila paghatagi sang bisan ano nga regalo. Pero si Saul naghipos lamang.

← Chapter 9 Jump to: Chapter 11 →