1 Samuel 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Sa tapos ang pito ka bulan nga yadto didto ang Kaban sang Kasugtanan sang Ginoo sa Filistia,

2ang mga pangulo nagtawag sang mga pari kag mga madyikero kag nagpamangkot, “Ano ang aton himuon sa Kaban sang Kasugtanan sang Ginoo? Kon iuli naton ini sa iya kaugalingon nga lugar, ano ang ipadala naton upod sini?”

3Nagsabat sila, “Kon iuli ninyo ang Kaban sang Kasugtanan sang Dios sang Israel, kinahanglan iuli ninyo ini nga may dala nga dulot para sa iya sa pagbayad sang inyo sala. Indi gid ninyo pag-ibalik ang Kaban sang Kasugtanan nga wala sing dala nga dulot. Sa sini nga paagi magaayo kamo, kag mahibaluan ninyo kon ngaa nga nagapadayon sia sa pagsilot sa inyo.”

4Nagpamangkot sila, “Ano nga dulot ang amon ipadala sa iya?” Nagsabat sila, “Lima ka bulawan nga ang ila korte daw hubag kag lima ka bulawan nga ang ila korte daw mga ilaga, isa sa tagsa ka hari sang mga Filistinhon. Ang amo man nga kalalat-an ginpadala sa inyo tanan kag sa lima ka mga hari nga Filistinhon.

5Dapat ninyo himuon ini nga mga bulawan nga ang ila mga korte daw mga hubag kag daw mga ilaga nga nagahalit sang inyo pungsod, kag dapat ninyo pasidunggan ang Dios sang Israel. Ayhan magauntat sia sa pagsilot sa inyo, sa inyo mga dios, kag sa inyo duta.

6Ngaa nga magpakatig-a kamo sang inyo tagipusoon subong sang hari sang Ehipto kag sang mga Ehiptohanon? Indi pagkalimti kon daw ano ang pagsilot sang Dios sa ila tubtob nga gintugotan nila ang mga Israelinhon sa paglakat.

7Gani mag-aman kamo sing bag-o nga karo kag duha ka mga baka nga wala pa gid matakdan sang gota. Itakod sa ila ang karo, kag tabuga ang ila mga tinday pabalik sa toril.

8Kuhaa ninyo ang Kaban sang Kasugtanan sang Ginoo kag ikarga sa karo, kag ibutang sa sulodlan sa kilid sini ang bulawan nga ang ila mga korte daw hubag kag daw mga ilaga nga inyo ginapadala sa iya subong dulot sa pagbayad sang inyo mga sala. Palakta ninyo ang mga baka, kag pabayai lang kon diin sila makadto.

9Bantayi ini samtang nagalakat. Kon magkadto ini sa banwa sang Bet-semes, ini nagakahulogan nga ang Dios sang Israel amo ang nagpadala sa aton sining tama nga kalalat-an. Pero kon indi, dayon mahibaluan naton nga sia wala magpadala sini nga kalalat-an, kundi isa lamang ini ka hitabo nga wala ginhungod.”

10Gintuman nila ang ginsiling sa ila. Nagkuha sila sing duha ka mga baka kag gintakdan sang karo, kag ginsirahan ang mga tinday sa toril.

11Ginkarga nila ang Kaban sang Kasugtanan sa karo upod ang sulodlan nga may bulawan nga ang ila mga korte daw mga ilaga kag daw mga hubag.

12Ang mga baka naglakat sing deretso padulong sa Bet-semes nga wala nagalipas sa dalan. Nagaima sila samtang nagalakat. Ang lima ka mga hari nga Filistinhon nagsunod sa ila tubtob sa dulonan sang Bet-semes.

13Ang mga tawo sang Bet-semes nagaani sing trigo sa kapatagan. Sang magtungkaaw sila kag nakita nila ang Kaban sang Kasugtanan, nagkasadya gid sila sang makita nila ini.

14Ang karo nag-abot sa uma ni Josue sang Bet-semes kag nagdulog sa tupad sang daku nga bato. Ang mga tawo nagbis-ak sang karo nga kahoy, nag-ihaw sang mga baka kag naghalad sini subong halad nga sinunog sa Ginoo.

15Ginhakwat sang mga Levinhon ang Kaban sang Kasugtanan sang Ginoo kag ang kaban nga nasudlan sang bulawan nga ang mga korte sini daw mga ilaga kag mga hubag kag ginbutang ini sa daku nga bato. Dayon ang mga tawo sa Bet-semes naghalad sang mga halad nga sinunog kag sang iban nga mga halad sa Ginoo sa sadto nga adlaw.

16Ang lima ka mga hari sang mga Filistinhon nagtan-aw sa ila samtang ginahimo nila ini, kag dayon nagbalik sila sa Ekron sa amo man nga adlaw.

17Ang mga Filistinhon nagpadala sa Ginoo sing lima ka bulawan nga ang korte daw mga hubag subong ila dulot sa pagbayad sang ila mga sala, tag-isa para sa mga siudad sang Asdod, Gaza, Askelon, Gat, kag Ekron.

18Nagpadala man sila sing bulawan nga ang korte daw mga ilaga, tag-isa para sa mga siudad nga ginagamhan sang lima ka mga hari nga Filistinhon, sa mga banwa nga nalibutan sang pader kag sa mga barangay nga wala sing pader. Ang daku nga bato sa uma ni Josue sang Bet-semes, nga ginbutangan nila sang Kaban sang Kasugtanan sang Ginoo, yara pa gihapon subong isa ka pamatuod nahanungod sa nahanabo.

19Ang Ginoo nagpatay sang setenta ka mga tawo sang Bet-semes tungod kay nagtulok sila sa sulod sang Kaban sang Kasugtanan sang Ginoo. Naglalaw ang mga tawo kay ang Ginoo nagpamatay sang madamo sa ila.

20Tungod sini ang mga tawo sang Bet-semes nagsiling, “Sin-o bala ang makatindog sa atubang sang Ginoo, ining balaan nga Dios? Diin bala naton sia ipadala agod makapalayo sia sa aton?”

21Nagpadala sila sing mga mensahero sa mga tawo sang Kiryat-jearim nga nagasiling, “Ang mga Filistinhon nag-uli sang Kaban sang Kasugtanan sang Ginoo. Dali kamo kag kuhaa ninyo ini.”

← Chapter 5 Jump to: Chapter 7 →