1 Samuel 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Sang pagbalik ni Saul halin sa pagpakig-away sa mga Filistinhon, ginsugiran sia nga si David yara sa desierto malapit sa Engedi.

2Si Saul nagdala sing 3,000 ka pinili nga mga hangaway halin sa Israel kag naglakat sa pagpangita kay David kag sa iya mga tinawo sa nasidlangan sang mga Igang sang mga Kanding nga Talunon.

3Nag-abot sia sa kweba malapit sa mga toril sang mga karnero sa higad sang dalan, kag nagsulod sia sa pagpamuhin. Natabuan man nga si David kag ang iya mga tinawo yadto didto sa sulod gid nga bahin sang kweba nga nagapanago.

4Nagsiling sila sa iya, “Amo na ini ang imo kahigayunan! Ang Ginoo nagsiling sa imo nga iya itugyan sa imo kamot ang imo kaaway kag mahimo mo sa iya ang imo luyag himuon.” Si David nagkamang pakadto kay Saul kag naggutrab sang bahin sang iya bayu nga malaba, nga wala niya mabatyagi.

5Pero ang konsensya ni David nagtublag sa iya,

6kag nagsiling sia sa iya mga tinawo, “Kabay ang Ginoo indi magtugot sa akon sa paghimo sang malain sa akon agalon, nga ginpili sang Ginoo subong nga hari! Indi ako maghimo sing bisan ano nga malain sa iya, tungod kay sia ang hari nga ginpili sang Ginoo!”

7Gani nahaylo ni David ang iya mga tinawo nga indi sila magsalakay kay Saul. Nagtindog si Saul, naggwa sa kweba, kag naglakat.

8Dayon si David nagsunod sa iya pa gwa kag nagtawag sa iya, “Mahal nga hari!” Nagliso si Saul kag si David nagsaludo sa pagtahod

9kag nagsiling, “Ngaa nagapati ka sa mga tawo nga nagasiling nga nagatinguha ako sa pagpatay sa imo?

10Nakita mo gid nga karon nga adlaw ang Ginoo nagtugyan sa imo sa akon didto sa sulod sang kweba. Ang iban nagsiling sa akon nga patyon ikaw pero naluoy ako sa imo, kag nagsiling nga indi ako maghalit sa imo, tungod kay ikaw ang ginpili sang Ginoo nga hari.

11Tan-awa, amay ko, tan-awa ang bahin sang imo malaba nga bayu nga ginauyatan ko! Gingutrab ko ini, pero wala ko ikaw pagpatya. Ini magapamatuod sa imo nga wala ako sing handom sa pagsupak kag pagpatay sa imo. Wala ako sing malain nga nahimo sa imo, pero nagatinguha ka sa pagpatay sa akon.

12Kabay ang Ginoo maghukom sa aton kon sin-o ang may sayop! Kabay nga magsilot sia sa imo tungod sang imo mga ginhimo sa akon, kay indi ako maghimo sing bisan ano nga malain sa imo.

13Nahibaluan nimo ang hulobaton, ‘Ang malaut ginahimo sang malaut lang nga mga tawo.’ Pero indi ako maghalit sa imo.

14Tan-awa kon ano ang ginahingabot sang hari sang Israel nga patyon! Tan-awa kon ano ang iya ginalagas! Isa ka patay nga ido, isa ka bitik!

15Ang Ginoo magahukom, kag magpat-od kon sin-o sa aton nga duha ang may sayop. Kabay nga magtalupangod sia sining butang, mag-apin sa akon, kag magluwas sa akon gikan sa imo.”

16Sang pagkatapos ni David hambal, nagsiling si Saul, “Ikaw gid bala ina, David, anak ko?” Kag naghibi sia.

17Dayon nagsiling sia kay David, “Husto ikaw, kag sala ako. Nanginmaayo ikaw sa akon, pero ako naghimo sing malain sa imo!

18Ginpakita mo karon nga adlaw kon daw ano ang imo kaayo sa akon, tungod kay wala mo ako pagpatya bisan ang Ginoo nagtugyan sa akon sa imo mga kamot.

19Talagsa lang ang isa ka tawo nga indi magpatay sang iya kaaway nga nadakpan na niya. Kabay nga balusan ka sang Ginoo tungod sang imo ginhimo nga maayo sa akon sini nga adlaw!

20Karon nahibaluan ko sing pat-od nga ikaw manginhari sang Israel, kag ang ginharian magapadayon sa idalom sang imo paggahom.

21Pero magsaad ka sa akon sa ngalan sang Ginoo nga indi mo pagpamatyon ang akon mga kaliwat, agod ang akon ngalan, kag ang ngalan sang akon panimalay indi gid madula.”

22Gani nagsaad si David nga iya ini tumanon. Dayon nagpauli si Saul, kag si David kag ang iya mga tinawo nagbalik sa ila ginapanaguan.

← Chapter 23 Jump to: Chapter 25 →