1 Samuel 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Si David nagpalagyo halin sa siudad sang Gat kag nagkadto sa kweba nga malapit sa banwa sang Adulam. Sang pagkabati sang iya mga utod nga lalaki kag sang iya panimalay nga didto sia, nag-apas sila sa iya.

2Ang tagsatagsa nga ginpigos, ukon may utang, ukon diskontento nagbuylog sa iya, kag nanginpangulo sia nila. May mga 400 ka mga lalaki tanan.

3Halin didto si David nagkadto sa Mispa sa Moab, kag nagsiling sa hari sang Moab, “Kon mahimo pakadtua ang akon amay kag iloy kag paestara sa imo tubtob akon mahibaluan kon ano ang kabubot-on sang Dios para sa akon.”

4Gani ginbilin ni David ang iya mga ginikanan sa hari sang Moab, kag nag-estar sila didto samtang si David nagapanago didto sa kweba.

5Ang propeta nga si Gad nagkadto kay David kag nagsiling, “Indi ka magtener diri, kundi kadto ka gilayon sa duta sang Juda.” Gani naglakat si David kag nagkadto sa talon sang Heret.

6Karon si Saul didto sa Gebeat, nga nagapungko sa idalom sang kahoy nga tamariska sa ibabaw sang bakulod nga may ginauyatan nga bangkaw. Ang tanan niya nga mga opisyales nagatindog palibot sa iya. Ginsugiran sia nga si David kag ang iya mga tinawo natultolan na,

7kag nagsiling sia sa iya mga opisyales, “Pamati kamo, mga kaliwat ni Benjamin! Nagahunahuna bala kamo nga si David magahatag sa inyo tanan sing mga uma kag talamnan sang ubas, kag magahimo sa inyo nga mga pangulo sang linibo kag ginatos sa iya mga hangaway?

8Amo bala ina ang kabangdanan kon ngaa nga nagaplano kamo batok sa akon? Wala sing isa sa inyo nga nagsugid sa akon nga ang akon anak naghimo sing kasugtanan upod kay David. Wala sing isa nga nagakabalaka sa akon, ukon nagsugid sa akon nga si David, isa sang akon kaugalingon nga mga tinawo, nagapangita karon sang kahigayunan sa pagpatay sa akon, kag ang akon anak nagpaisog sa iya!”

9Si Doeg nga taga-Edom nagatindog didto upod sa mga opisyales ni Saul kag nagsiling, “Nakita ko si David sang magkadto sia kay Ahimelek nga anak ni Ahitub sa Nob.

10Nagpamangkot sa Ginoo si Ahimelek kon ano ang himuon ni David, kag dayon ginhatagan niya si David sing pagkaon kag sang espada ni Goliat nga Filistinhon.”

11Gani si Haring Saul nagpatawag kay Ahimelek nga pari kag sang tanan niya nga mga pariente nga mga pari sa Nob, kag nagkadto sila sa iya.

12Si Saul nagsiling kay Ahimelek, “Pamati, Ahimelek!” Nagsabat sia, “Huo, mahal nga hari.”

13Nagpamangkot si Saul sa iya, “Ngaa bala ikaw kag si David nagaplano batok sa akon? Ngaa bala ginhatagan mo sia sing pagkaon kag espada, kag nagpamangkot ikaw sa Dios tungod sa iya? Karon ginasumpong niya ako, kag nagahulat na lang sia sing kahigayunan sa pagpatay sa akon!”

14Nagsabat si Ahimelek, “Si David amo ang imo pinakamatutom nga opisyal! Sia imo kaugalingon nga umagad, pangulo sang imo mga gwardya, kag ginatahod gid sa imo palasyo.

15Amo pa lang bala ini ang akon pagpakighambal sa Dios tungod sa iya? Indi lang amo ini! Mahal nga hari, indi ka kuntani dapat magsumbong sa akon ukon bisan sin-o sa akon panimalay, nahanungod sa pagplano batok sa imo. Wala ako sing nahibaluan nahanungod sini nga butang!”

16Ang hari nagsabat, “Ahimelek, ikaw kag ang imo tanan nga mga pariente dapat mapatay.”

17Dayon nagsiling sia sa mga gwardya nga nagatindog malapit sa iya, “Pamatya ang mga pari sang Ginoo! Kay sila nagbuylog kay David, kag wala sila magsugid sa akon nga si David nagpalagyo bisan nga nahibal-an nila ini tanan.” Pero ang mga gwardya wala gid maghakyaw sang ila mga kamot sa pagpatay sang mga pari sang Ginoo.

18Gani nagsiling si Saul kay Doeg, “Pamatya sila!” Kag ginpamatay sila tanan ni Doeg. Sa sadto nga adlaw otsentay singko ka mga pari nga takos sa pagsuksok sang bestidora ang ginpamatay niya.

19Ginpapatay man ni Saul ang tanan nga nagaestar sa Nob, ang siudad sang mga pari: mga lalaki kag mga babayi, mga kabataan kag mga lapsag, mga baka, mga asno kag mga karnero.

20Pero si Abiatar nga isa sang mga anak nga lalaki ni Ahimelek nakapalagyo, kag nagkadto sia kag nagbuylog kay David.

21Ginsugiran niya si David nga si Saul nagpamatay sang mga pari sang Ginoo.

22Nagsiling si David sa iya, “Sang makita ko didto si Doeg sadto nga adlaw, nahibal-an ko nga manugid gid sia kay Saul. Gani ako ang may salabton sang kamatayon sang tanan nimo nga mga pariente.

23Pabilin ka diri kag indi ka magkahadlok. Si Saul luyag magpatay sa imo kag sa akon, pero indi ka maano diri upod sa akon.”

← Chapter 21 Jump to: Chapter 23 →