1 Samuel 14 — Ilonggo (Maayong Balita nga Biblia (2012))

1Isa ka adlaw si Jonatan nagsiling sa pamatan-on nga lalaki nga nagadala sang iya mga hinganiban, “Makadto kita sa kampo sang mga Filistinhon.” Pero wala pagsugiri ni Jonatan ang iya amay nga si Saul.

2Si Saul yadto sa iya kampo sa idalom sang kahoy nga granada sa Migron, nga indi gid man malayo sa Gebeat kag may mga 600 ka mga tinawo nga nagaupod sa iya.

3(Ang pari nga nagadala sang bestidora amo si Ahias, anak ni Ahitub nga utod ni Ikabod. Si Ahitub anak ni Fineas kag apo ni Eli nga pari sang Ginoo sa Silo.) Ang mga tawo wala makahibalo nga si Jonatan naglakat.

4Sa Alagyan sang Mikmas nga ginaagyan ni Jonatan pakadto sa kampo sang mga Filistinhon may duha ka dalagku nga mga bato nga nagagasanggasang kag matalom. Ang isa ginatawag nga Boses, kag ang isa Sene.

5Ang isa yara sa naaminhan nga kilid sang alagyan nga nagaatubang sa Mikmas, kag ang isa yara sa bagatnan nga kilid sang alagyan nga nagaatubang sa Geba.

6Nagsiling si Jonatan sa pamatan-on nga lalaki, “Dali sudlon naton ang kampo sining mga di-diosnon nga mga Filistinhon. Ayhan ang Ginoo magabulig sa aton; kon sia magbulig, wala sing makapugong sa iya sa pagpadaog sa aton, bisan diutay lamang kita.”

7Nagsabat ang pamatan-on nga lalaki, “Himua ang luyag mo. Magaupod ako sa imo.”

8Nagsiling si Jonatan, “Dali, makadto kita didto kag magpakita sa ila.

9Kon magsiling sila nga hulaton ta sila, mahulat lang kita.

10Pero kon magsiling sila nga magpalapit kita, mapalapit kita dayon, tungod kay amo ini ang tanda nga ang Ginoo naghatag sa aton sing pagdaog batok sa ila.”

11Gani nagpakita sila sa mga Filistinhon kag ang mga Filistinhon nagsiling, “Tan-awa! Ang iban sang mga Hebreo naggwa sa mga buho nga ila ginapanaguan!”

12Ang mga hangaway nga mga Filistinhon nagtawag kay Jonatan kag sa pamatan-on nga lalaki, “Taklad kamo diri! May isiling kami sa inyo!” Nagsiling si Jonatan sa pamatan-on, “Sunod ka sa akon. Ang Ginoo naghatag sa Israel sing pagdaog batok sa ila.”

13Si Jonatan nagkamang pataklad, kag ang pamatan-on nga lalaki nagsunod sa iya. Ginsalakay ni Jonatan ang mga Filistinhon kag nagkalapukan sila, kag ang pamatan-on nga lalaki nagpamatay sa ila.

14Sa nahauna nila nga pagpamatay si Jonatan kag ang pamatan-on nagpatay sing mga baynte ka mga tawo sa lugar nga may kalaparon nga mga 2,000 ka metro kwadrado.

15Hinadlukan gid ang tanan nga mga hangaway nga Filistinhon nga yara sa latagon; ang grupo sang mga manugsalakay kag ang mga soldado sa kampo ginkugmat. Ang duta nagkurog, kag nagsinalasala sila sing tuman.

16Ang mga tinawo ni Saul nga nagabantay sa Gebeat, sa kadutaan sang mga Benjaminhon nakakita nga ang mga Filistinhon nagadinalagan nga nagasalasala.

17Gani si Saul nagsiling sa iya mga tinawo, “Isipa ninyo ang mga soldado kag tan-awa ninyo kon sin-o ang wala.” Gintuman nila ini kag nasapwan nila nga si Jonatan kag ang pamatan-on nga lalaki nga nagadala sang iya mga hinganiban amo ang wala.

18Dayon si Saul nagsiling kay Ahias nga pari, “Dalha diri ang bestidora.” (Kay sang sina nga adlaw si Ahias ang nagadala sang bestidora sa atubang sang mga tawo sang Israel.)

19Samtang nagahambal pa si Saul sa pari, ang pagkinagula sa kampo sang mga Filistinhon nagadugang nga nagadugang, gani si Saul nagsiling sa iya, “Wala na sing tion sa pag-usisa kon ano ang kabubot-on sang Ginoo!”

20Dayon sia kag ang iya mga soldado nag-atake sa mga Filistinhon nga sa ila pagsinalasala nagainaway batok sa isa kag isa.

21Ang iban nga mga Hebreo nga nagdampig anay sa mga Filistinhon, kag nag-upod sa ila sa kampo, nagsaylo kag nagdampig kay Saul kag kay Jonatan.

22Ang mga Israelinhon nga nagapalanago sa mga bakulod sang Efraim nakabati nga ang mga Filistinhon nagpalagyo, gani nagbuylog sila sa pagsalakay sa mga Filistinhon.

23Kag ang pag-inaway naglambot tubtob sa unhan pa sang Betaben. Ang Ginoo nagluwas sa Israel sadto nga adlaw.

24Ang mga Israelinhon nagpalangluya tungod sa gutom sadto nga adlaw, tungod kay si Saul nagsumpa kag naghatag sing mando nga nagasiling, “Pakamalauton ang bisan sin-o nga magkaon karon nga adlaw sa wala pa ako makatimalos sa akon mga kaaway.” Gani wala sing isa nga nagkaon sang bisan ano sa bilog nga adlaw.

25Tanan sila nagkadto sa kakahuyan kag nakakita sila sing madamo nga dugos bisan diin.

26May madamo nga dugos sa mga kakahuyan, pero wala gid sing isa nga nagkaon sini tungod kay nahadlok sila sang pagpakamalaut ni Saul.

27Pero si Jonatan wala makabati sang paandam nga may pagpakamalaut sang iya amay sa mga tawo, gani ginbayaw niya ang sungkod nga iya ginadala, gintuslok ini sa balayan sang dugos, kag nagkaon sini. Sa gilayon nag-ayo ang iya pamatyag.

28Pero ang isa sang mga tawo nagsiling, “Ang tanan maluya na sa gutom, pero ang imo amay nagpaandam sa amon nga pakamalauton ang bisan sin-o nga magkaon sang bisan ano karon nga adlaw.”

29Nagsabat si Jonatan, “Tama kalain ang ginhimo sang akon amay sa aton mga tawo! Tan-awa kon daw ano kaayo sang akon pamatyag tungod kay nakakaon ako sang dugos!

30Daw ano pa gid ayhan kaayo kon ang mga tawo karon nga adlaw nagkaon sang mga pagkaon nga ila nakuha sang malutos nila ang mga kaaway. Daw ano pa gid ayhan kadamo nga mga Filistinhon ang ila napatay!”

31Sa sadto nga adlaw ang mga Israelinhon naglutos sa mga Filistinhon halin sa Mikmas tubtob sa Ayalon. Sa sini nga tion ang mga Israelinhon tama na kaluya sa gutom,

32kag nagdinaguso sila sa pagkuha sang ila naagaw sa mga kaaway. Ginpanguha nila ang mga karnero, mga baka kag mga tinday, gin-ihaw nila didto gid mismo, kag ginkaon ang karne nga may dugo pa.

33Ginsugiran nila si Saul sini, “Tan-awa, ang mga tawo nagapakasala batok sa Ginoo sa pagkaon sang karne nga may dugo pa.” Nagsinggit si Saul, “Mga traidor kamo! Paligid kamo diri sing daku nga bato pakadto sa akon.”

34Dayon nagmando sia, “Kadto kamo sa mga tawo kag singgani sila tanan nga dalhon nila ang ila mga baka kag mga karnero diri. Ihawon nila ini kag kaunon diri, kag indi magpakasala batok sa Ginoo paagi sa pagkaon sang karne nga may dugo pa.” Gani sa sadto nga gab-i gindala nila tanan ang ila mga baka kag gin-ihaw didto.

35Nagpatindog si Saul sing altar sa Ginoo. Amo ini ang nahauna nga altar nga iya ginpatindog.

36Nagsiling si Saul sa iya mga tinawo, “Madulhog kita kag salakayon ang mga Filistinhon karon nga gab-i, pang-agawon naton ang ila mga pagkabutang tubtob sa kaagahon, kag pamatyon naton sila tanan.” Nagsabat sila, “Himua ang labing maayo nga imo ginahunahuna.” Pero ang pari nagsiling, “Mamangkot kita anay sa Dios.”

37Gani nagpamangkot si Saul sa Dios, “Salakayon ko bala ang mga Filistinhon? Padag-on mo bala kami?” Pero wala magsabat ang Dios sadto nga adlaw.

38Dayon nagsiling si Saul sa mga pangulo sang mga tawo, “Palapit kamo diri kag usisaon naton kon ano nga sala ang aton nahimo sini nga adlaw.

39Nagasaad ako sa buhi nga Ginoo, ang Manluluwas sang Israel, nga bisan pa si Jonatan nga akon anak ang may sala pagapatyon sia.” Pero wala sing may nagsabat.

40Dayon si Saul nagsiling sa ila, “Tanan kamo magtindog didto sa pihak, kag ako kag si Jonatan magatindog diri.” Nagsabat sila, “Himua ang labing maayo nga imo ginahunahuna.”

41Si Saul nagsiling sa Ginoo, ang Dios sang Israel, “O Ginoo, ngaa nga wala mo ako pagsabta karon nga adlaw? O Ginoo, Dios sang Israel, sabta ako paagi sa Urim kag sa Tumim. Kon ang sala akon ukon iya ni Jonatan, sabta ako paagi sa Urim; pero kon iya sang imo mga tawo nga Israelinhon, sabta ako paagi sang Tumim.” Ang sabat nagapakita nga ang sala yara sa kay Saul kag kay Jonatan, kag indi sa mga tawo.

42Karon si Saul nagsiling, “Pat-ura paagi sa Urim kag Tumim kon sin-o sa amon ni Jonatan ang nakasala.” Kag si Jonatan amo ang napilian.

43Dayon ginpamangkot ni Saul si Jonatan, “Ano ang imo nahimo?” Nagsabat si Jonatan, “Nagkaon ako sing diutay nga dugos paagi sa sungkod nga akon ginauyatan. Yari ako, handa ako nga mapatay.”

44Nagsiling si Saul sa iya, “Kabay nga patyon ako sang Dios kon indi ikaw mapatay!”

45Pero ang mga tawo nagsiling kay Saul, “Pagapatyon bala si Jonatan nga amo ang naghatag sing daku nga pagdaog sa Israel? Indi mahimo! Nagasaad kami sa buhi nga Ginoo sang Israel nga wala sing bisan isa ka nahot sang iya buhok nga madula sa iya. Ang iya nahimo karon nga adlaw nahimo tungod sa bulig sang Dios.” Gani ang mga tawo nagluwas kay Jonatan nga indi mapatay.

46Nag-untat si Saul sa paglagas sang mga Filistinhon, kag nagbalik sila sa ila kaugalingon nga kadutaan.

47Sa tapos nanginhari si Saul sang Israel, nagpakig-away sia sa tanan nila nga mga kaaway sa tanan nga mga lugar: ang mga tawo sang Moab, sang Amon, kag sang Edom, mga hari sa Soba, kag ang mga Filistinhon. Bisan diin sia nagapakig-away nagadaog sia.

48Nagpakig-away sia nga may kaisog, kag ginlutos man niya bisan gani ang mga Amaleknon. Ginluwas niya ang mga Israelinhon gikan sa tanan nga mga pagsalakay.

49Ang mga anak nga lalaki ni Saul amo sanday Jonatan, Isvi, kag Malkisua. Ang magulang niya nga anak nga babayi amo si Merab, kag ang manghod si Mikal.

50Ang iya asawa amo si Ahinoam, ang anak ni Ahimaaz. Ang pangulo sang iya mga soldado amo si Abner nga iya pakaisa, anak nga lalaki sang iya tiyo nga si Ner.

51Ang amay ni Saul nga si Kis kag si Ner nga amay ni Abner mga anak ni Abiel.

52Sang buhi pa si Saul nagapakig-away sia nga may kaisog batok sa mga Filistinhon. Kon may makita sia nga mabakod ukon maisog nga tawo ginapaentra niya sa iya mga hangaway.