1 Samuel 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Nagpangamuyo si Ana: “Ang Ginoo nagpuno sang akon tagipusoon sing kasadya, nagakalipay ako tungod sang nahimo niya! Ginakadlawan ko ang akon mga kaaway, nagakasadya ako tungod kay ang Dios nagbulig sa akon!

2“Wala sing balaan kaangay sa Ginoo, wala sing kaangay sa iya, wala sing mangangapin nga kaangay sang aton Dios.

3Untati na ang inyo pagpahambog indi maghambal sing matinaastaason. Kay ang Ginoo isa ka Dios nga nakahibalo, kag ginahukman niya ang tanan nga ginahimo sang mga tawo.

4Ang mga pana sang isganan nga mga soldado nagkalabali, pero ang mga maluya nagabaskog.

5Ang mga busog anay nagapamugon na karon para sa ila pagkaon, pero ang mga gutom may tuman nga kalan-on. Ang baw-as nga asawa nagbata sing pito, pero ang iloy sang madamo nawad-an sing anak.

6Ang Ginoo nagapatay kag nagahatag sing kabuhi, sia ang nagapadala sang mga tawo sa kalibutan sang mga patay, kag sia nagabanhaw sa ila.

7Ginapaimol niya ang iban kag ang iban iya ginapamanggad, ginapaubos niya ang iban kag ang iban iya ginapataas.

8Ginabayaw niya ang mga imol halin sa yab-ok, kag ginabayaw niya ang mga nawad-an gikan sa ila pag-antos. Ginapapungko niya sila upod sa mga prinsipe, kag ginapahamtang niya sila sa mga lugar sang kadungganan. Ang mga sadsaran sang duta iya sang Ginoo, sa ibabaw sini ginpasad niya ang kalibutan.

9“Ginatipigan niya ang kabuhi sang matutom niya nga mga tawo, pero ang mga malaut nagakawala sa kadudulman. Ang isa ka tawo wala nagadaog paagi sa iya kaugalingon nga kusog.

10Ang mga kaaway sang Ginoo pagalaglagon, magadaguob sia batok sa ila gikan sa langit. Ang Ginoo magahukom sang bug-os nga kalibutan, magahatag sia sing gahom sa iya hari, himuon niya nga madinalag-on ang iya pinili nga hari.”

11Dayon si Elkana nagpauli sa Rama, pero ang bata nga si Samuel nagpabilin sa Silo, kag nag-alagad sa Ginoo sa idalom ni Eli nga pari.

12Ang mga anak nga lalaki ni Eli abusador. Wala sila nagatahod sa Ginoo,

13kag sa mga pagsulondan nga ginapatuman sang mga pari sa mga tawo. Kon ang tawo nagadulot sang iya halad, ang alagad sang pari nagapalapit nga may dala nga daku nga tinidor nga tatlo ang punta. Samtang ginalaga pa ang karne,

14ginatuslok niya ini sa ginalagaan, kag ang bisan ano nga madala sang tinidor iya ini sang pari. Amo ini ang ila ginahimo sa Silo sa tanan nga mga Israelinhon nga mag-abot sa pagdulot sang ila mga halad.

15Wala labot sini bisan wala pa makuha ang sapay kag masunog, ang alagad sang pari nagapalapit kag nagasiling sa tawo nga nagadulot, “Hatagi ako sing karne agod asalon sang pari. Indi sia magbaton sing linaga gikan sa imo, kundi hilaw lang.”

16Kon ang tawo magsabat, “Himuon ta ang husto kag sunogon anay ang sapay, kag dayon kuhaon mo ang imo naluyagan,” ang alagad sang pari magasiling, “Indi mahimo! Ihatag ina sa akon gilayon! Kon indi ka, kuhaon ko ina sa pakusog!”

17Ang sala sang mga anak ni Eli tama kalaut sa panulok sang Ginoo, tungod kay gintamay nila ang mga dulot sa Ginoo.

18Pero ang bata nga si Samuel nagpadayon sa pag-alagad sa Ginoo nga nagabayo sing bestidora nga lino.

19Ang iya iloy nagahimo sing diutay nga sutana kag ginadala ini sa iya tagsa ka tuig kon sia mag-upod sa iya bana sa pagdulot sang tuigan nga halad.

20Dayon si Eli nagabendisyon kay Elkana kag sang iya asawa, kag nagasiling kay Elkana, “Kabay nga ang Ginoo maghatag pa gid sa imo sing mga kabataan nga magasalili sa isa nga imo ginhalad sa iya paagi sini nga babayi.” Pagkatapos nagapauli man sila dayon.

21Ang Ginoo nagbendisyon kay Ana kag nag-anak pa gid sia sing tatlo ka mga bata nga lalaki kag duha ka babayi. Ang bata nga si Samuel nagdaku nga nagaalagad sa Ginoo.

22Karon si Eli tigulang na gid kaayo, kag pirme lang sia makabati nahanungod sang tanan nga mga butang nga ginahimo sang iya mga anak nga lalaki sa mga Israelinhon, kag nagahulid pa gani sila sa mga babayi nga nagaalagad sa pwertahan sang Tolda sang presensya sang Ginoo.

23Gani ginsingganan niya sila, “Ngaa bala ginahimo ninyo ini nga mga butang? Ang tanan nagasugid sa akon sang malaut nga mga butang nga inyo ginahimo.

24Mga toto, untati ninyo ini! Tama kalain nga mga balita nahanungod sa inyo ang ginahambal sang mga tawo sang Ginoo!

25Kon ang isa ka tawo makasala batok sa isa ka tawo, ang Dios sarang makaapin sa iya, pero sin-o ang makaapin sang tawo nga makasala batok sa Ginoo?” Pero indi sila magpamati sa ila amay, kay ang Ginoo nagpamat-od sa pagpatay sa ila.

26Karon ang bata nga si Samuel nagpadayon sa pagdaku kag nagdugang ang kahamuot sang Ginoo kag sang mga tawo sa iya.

27May isa ka propeta nga nagkadto kay Eli nga ginsugo sang Ginoo sa pagsiling sa iya sini nga mga pulong: “Sang si Aaron nga isa sang imo mga katigulangan kag ang iya panimalay mga ulipon pa sang hari didto sa Ehipto, ginpahayag ko ang akon kaugalingon kay Aaron.

28Gikan sa tanan nga mga tribo sang Israel ginpili ko ang iya panimalay nga mangin-akon mga pari, sa pag-alagad sa altar, sa pagsunog sang insyenso, kag sa pagsuksok sang bestidora sa paghibalo sang akon kabubot-on. Kag ginhatagan ko sila sing parti sa mga halad nga ginasunog sa altar.

29Karon, ngaa bala nga nagadinalukdalok kamo sa akon mga halad kag mga dulot nga akon ginsugo nga ihatag sang akon mga tawo? Eli, ngaa ginapasidunggan mo ang imo mga anak nga lalaki labaw sang sa akon, paagi sa imo pagtugot sa ila sa pagpatambok sang ila kaugalingon sa labing maayo nga mga bahin sang mga halad nga ginadulot sang akon mga tawo sa akon?

30Ako, ang Ginoo nga Dios sang Israel, nagsaad sang una nga ang imo panimalay kag imo mga kabarangayan magaalagad sa akon subong mga pari sa wala sing katapusan. Pero karon nagasiling ako nga indi ko na ini pagpadayunon! Sa baylo, pasidunggan ko ang nagapasidungog sa akon, kag pagatamayon ko ang nagatamay sa akon.

31Tandai ini! Magaabot ang tion nga ang tanan nga mga pamatan-on sa imo panimalay kag sa imo kabarangayan pagapamatyon ko, agod nga wala sing lalaki sa imo panimalay nga magkabuhi sing malawig.

32Magasakit ang imo buot kag magakahisa ka sang mga kaayuhan nga ihatag ko sa iban nga mga tawo sang Israel, pero wala sing isa sa imo panimalay nga magakabuhi sing malawig.

33Pero tugotan ko ang isa sang imo mga kaliwat nga mabuhi, kag sia magaalagad sa akon subong pari, pero mabulag sia kag madulaan sing paglaom, ang nabilin sang imo mga kaliwat mapatay paagi sa hilaw nga kamatayon.

34Kag kon ang imo duha ka mga anak nga si Opni kag si Fineas mapatay sa isa lamang ka adlaw, ini magapakilala sa imo nga ang akon ginsiling manginmatuod.

35Magapili ako sang isa ka pari nga manginmatutom sa akon kag magatuman sang tanan nga luyag ko. Hatagan ko sia sing mga kaliwat, nga magaalagad sa gihapon sa atubang sang akon pinili nga hari.

36Ang mabilin sang imo mga kaliwat magakadto sa pari kag magapangayo sa iya sing kwarta kag pagkaon, kag magapakitluoy nga tugotan sila sa pagbulig sa mga pari, agod nga makakaon sila.”

← Chapter 1 Jump to: Chapter 3 →