Joshua 1

Ilonggo (Maayong Balita nga Biblia (2012))

Jump to: Chapter 2 →

1Sang patay na si Moises nga alagad sang Ginoo, nagsiling ang Ginoo sa kabulig ni Moises nga si Josue nga anak nga lalaki ni Nun,

2“Si Moises nga akon alagad patay na. Gani karon maghanda kamo, ikaw kag ang tanan nga mga tawo sang Israel, sa pagtabok sa Suba sang Jordan, kag sa pagsulod sa duta nga akon ginahatag sa inyo.

3Subong sang ginsiling ko kay Moises, ginhatag ko sa inyo nga akon mga tawo ang tanan nga duta nga inyo pagaagyan.

4Halin sa desierto sa nabagatnan ang inyo mga dulonan magalambot pakadto sa mga Kabukiran sang Libano sa aminhan, halin sa daku nga Suba sang Eufrates sa sidlangan, pakadto sa kadutaan sang mga Hethanon, tubtob sa Dagat sang Mediteraneo sa nakatundan.

5Wala sing may makadaog sa imo samtang nagakabuhi pa ikaw, Josue. Magaupod ako sa imo subong sang akon pag-upod kay Moises, kag indi ko gid ikaw pagpabay-an ukon pagpatumbayaan.

6Magpakalig-on ka kag magpakaisog, kay ikaw ang magapangulo sa sini nga mga tawo sa pagpanag-iya sining duta nga ginsaad ko nga ihatag sa ila mga katigulangan.

7Gani magpakalig-on ka kag magpakaisog, kag magkabuhi ka suno sa bug-os nga Kasugoan nga ginhatag sa imo sang akon alagad nga si Moises. Indi mo pagpatumbayaan ang bisan ano nga bahin sini, kag manginmadinalag-on ka bisan diin ka magkadto.

8Basahon mo ang libro sang Kasugoan sa mga tawo sa tagsa ka tion nga nagasimba sila. Tun-i ini sa adlaw kag sa gab-i, kag tumana ang tanan nga nasulat sa sini nga kasugoan. Dayon magamainuswagon ka kag magamadinalag-on.

9Dumdoma ang akon sugo, ‘Magpakalig-on ka kag magpakaisog! Indi ka magkahadlok ukon madulaan sing paglaom, kay ako, ang Ginoo nga imo Dios, magaupod sa imo bisan diin ikaw makadto.’”

10Dayon si Josue nagmando sa mga pangulo sang mga tawo,

11“Kadto kamo sa kampo kag singgana ninyo ang mga tawo, ‘Maghanda kamo sang nagakaigo nga pagkaon kay sa sulod sang tatlo ka adlaw magatabok kita sa Suba sang Jordan sa pagpanag-iya sang duta nga ginahatag sa aton sang Ginoo nga aton Dios.’”

12Si Josue nagsiling sa mga tribo ni Ruben kag ni Gad, kag sa katunga sang tribo ni Manases,

13“Dumdoma ninyo ang ginsiling sa inyo ni Moises nga alagad sang Ginoo, ‘Ang Ginoo nga inyo Dios magahatag sini nga duta nga inyo pagaestaran.’

14Ang inyo mga asawa, mga kabataan, kag mga kasapatan magapabilin sa duta nga ginhatag sa inyo ni Moises diri sa sidlangan nga bahin sang Jordan. Pero ang inyo mga hangaway magauna sa inyo mga kautoran nga mga Israelinhon sa pagtabok nga handa sa pagbulig sa ila sa inaway,

15tubtob nga maangkon na nila ang duta nga ginhatag sa ila sang Ginoo nga inyo Dios kag makaestar na sila sa amo nga duta. Dayon magabalik kamo kag magaestar sa inyo kaugalingon nga duta nga ginhatag sa inyo ni Moises nga alagad sang Ginoo, diri sa sidlangan nga bahin sang Jordan.”

16Nagsabat sila kay Josue, “Himuon namon ang tanan nga imo ginasiling sa amon, kag magakadto kami bisan diin mo ipadala.

17Tumanon namon ikaw subong sang amon pagtuman pirme kay Moises. Kabay nga ang Ginoo nga imo Dios mag-upod sa imo subong sang iya pag-upod kay Moises!

18Ang bisan sin-o nga magsuay sang imo awtoridad ukon indi magtuman sang bisan ano nga imo ginamando, pagapatyon. Magpakalig-on kag magpakaisog ka lang!”

Jump to: Chapter 2 →