Joshua 20

Ilonggo (Maayong Balita nga Biblia (2012))

← Chapter 19 Jump to: Chapter 21 →

1Karon nagsiling ang Ginoo kay Josue,

2“Singgana ang mga tawo sang Israel: ‘Magpili kamo sing mga siudad nga dalangpan nga ginsiling ko anay sa inyo paagi kay Moises.

3Ang tawo nga makapatay sa indi hungod makapanago didto, kag makapalagyo sa luyag magtimalos nga pariente sang napatay nga tawo.

4Makapalagyo sia sa isa sining mga siudad, makakadto sa lugar sang hukmanan sa salamputan sang siudad, kag magpaathag sa mga pangulo nahanungod sang natabo. Dayon pasudlon nila sia sa siudad, kag hatagan sing lugar nga maestaran agod makaestar sia didto.

5Kon ang pariente sang napatay nga tawo nga luyag magtimalos maglagas sa iya didto, ang mga tawo sa siudad indi magtugyan sang tawo nga nakapatay, sa tawo nga luyag magtimalos. Pagaapinan nila sia nga indi maano, kay indi hungod ang iya pagpatay sa iya isigka-Israelinhon, kag indi tungod sang iya kaakig.

6Magatener sia sa amo nga siudad tubtob mabista ang iya kaso sa atubang sang katilingban, kag tubtob mapatay ang Pinakamataas nga Pari sadto nga panahon. Sa tapos sini makapauli na ang tawo sa iya kaugalingon nga banwa nga iya ginhalinan sang iya pagpalagyo.’”

7Gani sa nakatundan sang Jordan, ila ginpain ang Kedes sa Galilea sa kabakuloran sang Neftali, ang Siquem sa kabakuloran sang Efraim, kag ang Kiryat-arba (ukon Hebron), sa kabakuloran sang Juda.

8Sa sidlangan nga bahin sang Jordan, sa mataas nga kapatagan sa sidlangan sang Jerico sa desierto, ginpili nila ang Beser sa kadutaan ni Ruben; ang Ramot sa Galaad sa kadutaan ni Gad; kag ang Golan sa Basan sa kadutaan ni Manases.

9Amo ini ang mga siudad nga dalangpan nga ginpili para sa tanan nga mga katawhan sang Israel, kag para man sa mga dumoluong nga nagaestar upod sa ila. Ang bisan sin-o nga makapatay sing tawo sa indi hungod, makadangop sia didto agod indi maano gikan sa luyag magtimalos nga pariente sang napatay nga tawo. Indi sia mapatay sang bisan sin-o nga luyag magtimalos tubtob indi mabista ang iya kaso sa atubang sang katilingban.

← Chapter 19 Jump to: Chapter 21 →