Joshua 21

Ilonggo (Maayong Balita nga Biblia (2012))

← Chapter 20 Jump to: Chapter 22 →

1Ang mga pangulo sang mga panimalay sang mga Levinhon nagkadto kay Eleazar nga pari, kay Josue nga anak ni Nun, kag sa mga pangulo sang mga panimalay sang tanan nga tribo sang Israel.

2Nagsiling sila sa ila didto sa Silo, sa duta sang Canaan, “Ang Ginoo nagsugo paagi kay Moises nga hatagan kami sing mga siudad nga amon estaran, kag kadutaan sa palibot nga halalban sang amon kasapatan.”

3Gani suno sa ginsugo sang Ginoo, ang mga tawo sang Israel naghatag sa mga Levinhon sini nga mga siudad kag mga duta nga halalban gikan sa ila mga kadutaan.

4Ang mga panimalay sang mga Kohatnon amo ang nahauna nga ginhatagan sing mga siudad. Ang mga panimalay nga kaliwat ni Aaron nga pari, ginhatagan sing trese ka mga siudad gikan sa kadutaan nanday Juda, Simeon, kag Benjamin.

5Ang iban sang mga Kohatnon ginhatagan sing napulo ka mga siudad, gikan sa kadutaan sang mga tribo nanday Efraim kag Dan, kag gikan sa katunga nga tribo ni Manases sa Nakatundan.

6Ang mga Gersonhon ginhatagan sing trese ka mga siudad gikan sa kadutaan sang mga tribo nanday Isacar, Aser, Neftali, kag gikan sa katunga nga tribo ni Manases sa Sidlangan.

7Ang mga panimalay sang mga Merarinhon ginhatagan sing dose ka mga siudad gikan sa kadutaan sang mga tribo nanday Ruben, Gad, kag Zabulon.

8Ang mga tawo sang Israel, naghatag sa mga Levinhon sini nga mga siudad kag mga palahalban, paagi sa pagabutgabot, suno sa ginsugo sang Ginoo paagi kay Moises.

9Amo ini ang mga ngalan sang mga siudad gikan sa mga kadutaan sang mga tribo nanday Juda kag ni Simeon nga ginhatag

10sa mga kaliwat ni Aaron, sa isa ka panimalay sang mga Kohatnon nga mga Levinhon. Sila amo ang nahauna nga ginhatagan sing parti.

11Ginhatag sa ila ang siudad sang Kiryat-arba (si Arba amay ni Anak), nga amo ang Hebron, sa kabakuloran sang Juda, lakip ang mga palahalban sa palibot sini.

12Pero ang mga latagon sang siudad kag ang mga banwa sini ginhatag na nila kay Caleb, ang anak ni Jefone, subong iya ginapanag-iyahan.

13Dugang sa Hebron, isa man ka siudad nga dalangpan para sa tawo nga nakapatay, ginhatag nila ining masunod nga mga siudad sa mga kaliwat ni Aaron nga pari: ang Libna,

14Hatir, Estemoa,

15Holon, Debir,

16Ayin, Huta, kag Bet-semes lakip ang tanan sini nga halalban: siyam ka mga siudad gikan sa mga tribo ni Juda kag Simeon.

17Gikan sa kadutaan ni Benjamin, ginhatag sa ila ang apat ka mga siudad: Gabaon, Geba,

18Anatot, kag Almon lakip ang ila mga palahalban sini.

19Trese ka mga siudad tanan lakip ang mga halalban sini, ang ginhatag sa mga kaparian nga mga kaliwat ni Aaron.

20Ang iban nga mga panimalay sang mga Kohatnon nga Levinhon, ginhatagan sing mga siudad halin sa kadutaan ni Efraim.

21Ginhatag sa ila ang apat ka mga siudad: Siquem kag ang halalban sini sa kabakuloran sang Efraim, isa man ka siudad nga dalangpan para sa tawo nga nakapatay, ang Gezer,

22Kibsaim, kag Bet-horon lakip ang ila mga halalban sini.

23Gikan sa kadutaan ni Dan, ginhatag sa ila ang apat ka mga siudad: Elteke, Gibeton,

24Ayalon, kag Gat-rimon, lakip ang mga halalban sini.

25Gikan sa kadutaan sang katunga sang tribo ni Manases nga yara sa nakatundan, ginhatag sa ila ang duha ka mga siudad: Taanak kag Gat-rimon lakip ang ila mga halalban sini.

26Ining mga panimalay sang Kohatnon nakabaton sing napulo ka mga siudad tanan, lakip ang mga halalban sini.

27Ang isa pa ka panimalay sang mga Levinhon nga Gersonhon, nakabaton gikan sa katunga nga tribo ni Manases sing duha ka mga siudad: ang Golan sa Basan, isa man ka siudad nga dalangpan para sa tawo nga nakapatay, kag Beestera, lakip ang ila mga halalban sini.

28Gikan sa kadutaan ni Isacar, nabaton nila ang apat ka mga siudad: Kision, Daberat,

29Harmut, Enganim, lakip ang mga halalban sini.

30Gikan sa kadutaan ni Aser, nabaton nila ang apat ka mga siudad: Misal, Abdon,

31Helkat, kag Rehob, lakip ang mga halalban sini.

32Gikan sa kadutaan ni Neftali, nabaton nila ang tatlo ka mga siudad: Kedes sa Galilea, lakip ang halalban sini, isa man ka siudad nga dalangpan para sa tawo nga nakapatay, ang Hamot-dor, kag Kartan, lakip ang ila mga halalban sini.

33Ang nagkalainlain nga mga panimalay sang mga Gersonhon, nakabaton sing trese tanan ka mga siudad lakip ang mga halalban sini.

34Ang iban sang mga Levinhon, ang mga panimalay sang mga kaliwat ni Merari, nakabaton gikan sa kadutaan ni Zabulon sang apat ka mga siudad: Jokneam, Karta,

35Dimna, Nahalal, lakip ang mga halalban sini.

36Gikan sa duta ni Ruben, nabaton nila ang apat ka mga siudad: Beser, Jahaz,

37Kedemot, kag Mefaat, lakip ang ila mga halalban sini.

38Gikan sa kadutaan ni Gad, nabaton nila ang apat ka mga siudad: Ramot sa Galaad, lakip ang halalban sini, nga isa man ka siudad nga dalangpan para sa tawo nga nakapatay, ang Mahanaim,

39Hesbon, kag Jazer lakip ang ila mga halalban sini.

40Ang iban sang mga panimalay nga Levinhon nga amo ang nagkalainlain nga mga panimalay sang Merarinhon ginhatagan sing dose tanan ka mga siudad.

41Gikan sa kadutaan nga ginpanag-iyahan sang mga Israelinhon, kwarentay otso tanan ka mga siudad lakip ang mga halalban sa palibot sini, ang ginhatag sa mga Levinhon.

43Gani ginhatag sang Ginoo sa Israel ang tanan nga duta nga ginsaad niya sa ila mga katigulangan nga ihatag sa ila. Sang mapanag-iyahan nila ini, nag-estar sila didto.

44Ang Ginoo naghatag sa ila sing paghidait sa palibot nila, suno sa iya ginsaad sa ila mga katigulangan. Wala sing isa sang ila mga kaaway nga makasarang sa ila, tungod kay ang Ginoo nagpadaog sa ila batok sa tanan nila nga mga kaaway.

45Gintuman sang Ginoo ang tanan niya nga mga ginsaad sa mga tawo sang Israel.

← Chapter 20 Jump to: Chapter 22 →