Joshua 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Ang mga tawo sang Israel naglutos kag nagpanag-iya sang kadutaan sa sidlangan sang Jordan, halin sa Kapatagan sang Arnon tubtob sa Kapatagan sang Jordan tubtob sa Bukid sang Hermon. Duha ka mga hari ang ginpanglutos sang mga Israelinhon:

2Si Sihon nga hari sang mga Amornon nga naggahom sa Hesbon. Ang katunga sang Galaad sakop sang iya ginharian: halin sa Aroer, sa higad sang Kapatagan sang Arnon, kag halin sa siudad sa tunga sang kapatagan pakadto sa Suba sang Jaboc, ang dulonan sang mga Amonhon;

3nagsakop ini sa sidlangan sang Kapatagan sang Jordan, halin sa Linaw sang Galilea pakadto sa Bet-hesimot, sa sidlangan sang Patay nga Dagat tubtob sa nabagatnan sa kunsaran sang Bukid sang Pisga.

4Ginlutos man nila si Og, ang hari sang Basan, nga isa sang mga nabilin nga mga Refaimnon. Naggahom sia sa Astarot kag sa Edrei.

5Ang iya ginharian naglakip sang Bukid sang Hermon, Salca, kag ang bilog nga Basan tubtob sa mga dulonan sang Gesurnon kag sang mga Maacatnon, kag ang katunga sang Galaad, tubtob sa dulonan ni Sihon nga hari sang Hesbon.

6Si Moises kag ang mga tawo sang Israel naglutos sa sining duha ka mga hari. Ginpamartida ni Moises nga alagad sang Ginoo, ang ila duta sa mga tribo ni Ruben, Gad, kag sa katunga sang tribo ni Manases.

7Si Josue kag ang mga tawo sang Israel naglutos sang tanan nga mga hari sa nakatundan nga kadutaan sang Jordan, halin sa Baalgad sa kapatagan sang Libano tubtob sa Bukid sang Halak nga pakadto sa Edom. Ginpamartida ni Josue ini nga duta kag ginhatag ini sa mga tribo.

8Naglakip ini sang kabakuloran, sang kunsaran sang mga kabukiran sa nakatundan, sang Kapatagan sang Jordan, kag sang kunsaran sang mga kabukiran sini, sang mga banglid sa nasidlangan, kag sang desierto sa nabagatnan. Ini nga kadutaan gin-estaran anay sang mga Hethanon, mga Amornon, mga Canaanhon, mga Peresnon, mga Hevhanon, kag mga Jebusnon.

9Amo ini ang mga hari sang masunod nga mga siudad nga ginpanglutos sang mga Israelinhon: ang mga hari sang Jerico, Ay nga malapit sa Betel,

10Jerusalem, Hebron,

11Harmut, Lakis,

12Eglon, Gezer,

13Debir, Geder,

15Libna, Adulam,

16Makeda, Betel,

17Tapua, Hefer,

18Afec, Lasaron,

19Madon, Hasor,

20Simronmeron, Aksap,

21Taanak, Megido,

22Kedes, Jokneam nga sa Carmel,

23Dor nga sa baybayon, Goim nga sa Galilea

24kag Tirsa—mga trayntay uno tanan ka mga hari.

← Chapter 11 Jump to: Chapter 13 →