Joshua 22

Ilonggo (Maayong Balita nga Biblia (2012))

← Chapter 21 Jump to: Chapter 23 →

1Dayon gintawag ni Josue sing tingob ang mga tawo sang mga tribo ni Ruben, ni Gad, kag ang katunga sang tribo ni Manases nga yara sa sidlangan.

2Nagsiling sia sa ila, “Ginhimo ninyo ang tanan nga ginsugo sa inyo ni Moises nga alagad sang Ginoo, kag gintuman ninyo ang tanan nga ginsugo ko sa inyo.

3Wala ninyo pagpatumbayai ang inyo isigka-Israelinhon sa malawig nga panahon, tubtob sini nga adlaw. Gintuman ninyo sing tul-id ang mga sugo sang Ginoo nga inyo Dios.

4Karon, ang Ginoo nga inyo Dios naghatag sing paghidait sa inyo isigka-Israelinhon, suno sa iya ginsaad. Gani balik kamo sa duta nga inyo ginapanag-iyahan, ang duta sa nasidlangan sang Jordan nga ginhatag sa inyo ni Moises nga alagad sang Ginoo.

5Indi gid kamo magkalipat sa pagtuman sang mga sugo kag kasugoan nga ginhatag sa inyo ni Moises nga alagad sang Ginoo: higugmaa ang Ginoo nga imo Dios, himua ang iya kabubot-on, tumana ang iya mga sugo, magmatutom sa iya, kag alagara sia sa bug-os nga tagipusoon kag kalag.”

6Ginbendisyunan sila ni Josue kag ginpapauli. Ginsingganan niya sila: “Magapauli kamo sa inyo mga balay nga manggaranon gid, nga may madamo nga mga kasapatan, pilak, bulawan, bronsi, salsalon, kag madamo nga mga bayu. Partidaha ninyo sa inyo isigka-Israelinhon ang inyo naagaw sa inyo mga kaaway.” Dayon nagpauli sila. Si Moises naghatag sang duta nga yara sa nasidlangan nga bahin sang Jordan sa katunga sang tribo ni Manases, pero si Josue naghatag sa isa ka tunga sang tribo ni Manases, sang duta sa nakatundan sang Jordan, upod sa iban nga mga tribo.

9Gani ang mga tawo sang mga tribo ni Ruben kag ni Gad kag ang katunga sang tribo ni Manases nagpauli. Ginbayaan nila ang iban nga mga Israelinhon sa Silo, sa duta sang Canaan, kag nagkadto sila sa duta sang Galaad, ang duta nga ginhatag sa ila suno sa ginsugo sang Ginoo paagi kay Moises.

10Sang pag-abot sa Gelilot sa tabok sang Jordan nga sakop sang Canaan, sang mga tribo ni Ruben, ni Gad kag sa tribo ni Manases nga yara sa sidlangan, nagpatindog sila sang isa ka daku kag makahalawhaw nga altar sa tupad sang Suba sang Jordan.

11Ang iban nga mga tawo sang Israel nakabati sini kag ginsingganan sila, “Pamati kamo! Ang mga tawo sang mga tribo ni Ruben, ni Gad kag ang katunga sang tribo ni Manases nga yara sa sidlangan nagpatindog sing altar sa Gelilot, malapit sa dulonan sang Canaan, sa tabok sang Jordan nga natuon sa aton!”

12Sang pagkabati sini sang mga tawo sang Israel, ang bug-os nga katilingban nagtipon sing tingob sa Silo, sa pagpakig-away batok sa mga tribo sa sidlangan.

13Dayon ginpadala sang mga tribo nga yara sa nakatundan si Fineas, ang anak ni Eleazar nga pari, sa kaliwatan sang mga tribo nanday Ruben, Gad, kag sa tribo ni Manases nga yara sa sidlangan sa duta sang Galaad.

14Napulo ka mga pangulo ang naglakat upod kay Fineas, isa gikan sa tagsa ka tribo sang Israel nga yara sa nakatundan, kag ang tagsatagsa sa ila pangulo sang isa ka panimalay sang mga kabarangayan.

15Nag-abot sila sa duta sang Galaad, kag nagsiling sa mga katawhan ni Ruben, ni Gad, kag sa tribo ni Manases sa sidlangan,

16“Amo ini ang luyag isiling sang bug-os nga katilingban sang Ginoo: ‘Ngaa ginhimo ninyo ining malaut nga butang batok sa Dios sang Israel? Nagrebelde kamo batok sa Ginoo sa inyo pagpatindog sing altar para sa inyo kaugalingon! Wala na kamo nagasunod sa iya!

17Wala bala kamo makadumdom sang pagpakasala naton sa Peor, sang ginsilutan sang Ginoo ang iya mga tawo paagi sa pamalatian nga nagpatay sang madamo sa aton? Nagaantos pa gani kita karon tungod sadto. Indi pa bala tuman na yadto nga sala?

18Magauntat na bala kamo karon sa pagsunod sa Ginoo? Kon magrebelde kamo batok sa Ginoo sini nga adlaw, magakaakig sia sa tanan nga mga tawo sang Israel buas.

19Gani karon kon ang inyo duta indi takos nga pagasimbahan, tabok kamo sa duta sang Ginoo sa diin yara ang Tolda sang iya presensya. Magpakigbahin kamo sang duta upod sa amon. Pero indi kamo magrebelde batok sa Ginoo, ukon batok sa amon paagi sa pagpatindog sang inyo altar, luas sa altar sang Ginoo nga aton Dios.

20Dumdoma ninyo nga si Acan nga anak ni Zera, wala magtuman sang sugo nahanungod sang mga butang nga gintugyan nga pagalaglagon, kag ang bug-os nga katilingban sang Israel ginsilutan tungod sadto. Indi si Acan lamang ang napatay tungod sang iya sala.’”

21Ang mga tawo sang mga tribo ni Ruben, ni Gad, kag ang tribo ni Manases nga yara sa sidlangan nagsabat sa mga pangulo sang mga panimalay sang mga tribo nga yara sa nakatundan:

22“Ang Gamhanan amo ang Dios! Sia amo ang Ginoo! Ang Gamhanan amo ang Dios! Sia amo ang Ginoo! Nahibaluan niya kon ngaa ginhimo namon ini kag dapat man ninyo mahibaluan! Kon nagrebelde kami kag nagbiya sa Ginoo, indi kami pagtugoti nga mabuhi pa!

23Kon wala kami magtuman sa Ginoo kag nagpatindog kami sang amon kaugalingon nga altar sa pagsunog sing mga halad, ukon sa paghalad sang mga halad nga kalan-on ukon sang halad sa paghiambit, kabay nga ang Ginoo gid magsilot sa amon.

24Indi! Ginhimo namon ini tungod kay nahadlok kami nga sa ulihi ang inyo mga kaliwat magsiling sa amon mga kaliwat, ‘Ano bala ang inyo labot sa Ginoo, ang Dios sang Israel?

25Ginhimo sang Ginoo ang Suba sang Jordan nga dulonan namon kag ninyo, kamo nga mga kaliwat ni Ruben kag ni Gad. Wala kamo sing labot sa Ginoo.’ Dayon basi ang inyo mga kaliwat magpauntat sang amon mga kaliwat sa pagsimba sa Ginoo.

26Gani naghimo kami sing altar, indi sa pagsunog sing mga halad ukon sa paghimo sing mga halad,

27kundi subong nga tanda sa tunga ninyo kag namon, kag subong man para sa aton mga kaliwat nga magasunod sa aton, nga kita nagasimba sa Ginoo sa atubangan sang balaan nga Tolda paagi sa aton mga halad nga sinunog, mga halad kag mga halad sa paghiambit. Tungod sini ang inyo mga kaliwat indi makasiling sa amon mga kaliwat sa ulihi, ‘Wala kamo sing labot sa Ginoo.’

28Ang amon sini tuyo amo nga kon mahanabo gid man ini, makasiling ang amon mga kaliwat, ‘Tan-awa bala ninyo! Ang amon mga katigulangan naghimo sing altar subong gid sang altar sang Ginoo. Indi ini sa pagsunog sang mga dulot ukon para sa mga halad, kundi isa ka tanda para sa inyo mga katawhan kag sa amon.’

29Indi gid kami magrebelde batok sa Ginoo, ukon mag-untat sa pagsunod sa iya karon, paagi sa pagpatindog sing altar nga sunogan sang mga halad, ukon para sa mga halad nga kalan-on, kag mga halad. Indi kami magpatindog sing iban nga mga altar, luas sa altar sang Ginoo nga amon Dios nga nagatindog sa atubangan sang Tolda sang iya presensya.”

30Sang si Fineas nga pari, kag ang mga pangulo sang katilingban nga kaupod niya, ang mga pangulo sang mga panimalay sang mga tribo nga yara sa nakatundan, nakabati sang ginsiling sang mga kaliwat ni Ruben, ni Gad, kag ni Manases sa sidlangan, nalipay gid sila.

31Si Fineas nga anak ni Eleazar nga pari, nagsiling sa mga kaliwat ni Ruben, ni Gad, kag ni Manases sa sidlangan, “Karon, aton nahibaluan nga ang Ginoo kaupod naton, kay wala kamo magrebelde batok sa iya. Ginluwas ninyo ang mga tawo sang Israel sa silot sang Ginoo.”

32Dayon ginbayaan ni Fineas kag sang mga pangulo ang mga katawhan ni Ruben, kag ni Gad sa duta sang Galaad, kag nagbalik sila sa Canaan, kag nagsugid sa mga tawo sang Israel, sang tanan nga nagkahanabo.

33Naluyagan sang mga tawo sang Israel ang ila mga ginsugid. Nagdayaw sila sa Dios, kag wala na sila maghambal nahanungod sa pagpakig-away, agod malaglag nila ang kadutaan nga ginaestaran sang mga kaliwat ni Ruben kag ni Gad.

34Gintawag sang mga tawo ni Ruben kag ni Gad ang altar nga “Saksi,” kay siling nila, “Saksi ini sa tunga naton nga ang Ginoo amo ang Dios.”

← Chapter 21 Jump to: Chapter 23 →