Joshua 15

Ilonggo (Maayong Balita nga Biblia (2012))

← Chapter 14 Jump to: Chapter 16 →

1Ang bahin sang duta nga ginhatag sa mga panimalay sang tribo ni Juda amo ang masunod: Ang duta naglambot halin sa bagatnan tubtob sa punta gid sang desierto sang Zin sa dulonan sang Edom.

2Ining dulonan sa bagatnan naglambot halin sa nabagatnan gid nga bahin sang Dagat nga Patay,

3nagapadulong sa bagatnan halin sa Taklaran sang Akrabim, kag tubtob sa Sin. Naglambot ini sa bagatnan sang Kades Barnea, nagaagi sa Hezron, kag pataklad sa Adar, nagliko pakadto sa Karka,

4padulong sa Azmon, kag nag-ubay sa sapa sa dulonan sang Ehipto tubtob sa Dagat sang Mediteraneo nga amo ang punta sang dulonan. Amo yadto ang nabagatnan nga dulonan sang Juda.

5Ang dulonan sa sidlangan amo ang Patay nga Dagat, tubtob sa gibwangan sang Jordan. Ang naaminhan nga dulonan nagsugod didto,

6pataklad tubtob sa Bet-hogla, kag padulong sa aminhan sang Bet-araba. Kag nagapataklad ini tubtob sa Bato ni Bohan nga amo ang anak ni Ruben,

7kag halin sa Kapatagan sang Kahul-anan tubtob sa Debir, kag pakadto sa aminhan, paliko pakadto sa Gilgal, nga yara sa atubangan sang Taklaran sang Adumin sa bagatnan nga bahin sang kapatagan. Kag nagalambot ini pakadto sa mga tuboran sang Ensemes, nagalapos sa Enrogel,

8kag pataklad nga nagaagi sa Kapatagan sang Hinom tubtob sa bagatnan nga bahin sang banglid sang mga Jebusnon, sa diin nahamtang ang siudad sang Jerusalem. Gani ang dulonan naglambot tubtob sa putokputokan sang bukid nga nagaatubang sa Kapatagan sang Hinom sa nakatundan, nga yara sa naaminhan sa punta sang Kapatagan sang Refaim.

9Kag halin sa putokputokan sang bukid pakadto sa mga Tuboran sang Neptoa, kag nagapagwa sa mga siudad nga malapit sa Bukid sang Epron. Halin didto nagaliko pakadto sa Baala, nga karon ginatawag Kiryat-jearim,

10sa diin nagaliko ini nayon sa nakatundan sang Baala pakadto sa Bukid sang Edom, padulong sa aminhan nga bahin sang Bukid sang Hearim, nga karon ginatawag Kesalon, padulhog sa Bet-semes, kag nagaagi sa Timna.

11Dayon ang dulonan nagapadulhog pakadto sa bukid sa aminhan sang Ekron, nagliko pakadto sa Sikeron, nagaagi sa Bukid sang Baala, kag nagapadayon sa Habneel. Ang dulonan nagdulog sa Dagat sang Mediteraneo

12nga amo ang dulonan sa nakatundan. Amo ini ang mga dulonan nga nagapalibot sa mga tawo sang mga panimalay ni Juda.

13Suno sa ginsugo sang Ginoo kay Josue, ang bahin sang duta sang mga tawo ni Juda, ginhatag kay Caleb nga anak ni Jefone. Ini amo ang Hebron, ang siudad ni Arba nga amay ni Anak.

14Gintabog ni Caleb ang tatlo ka mga kaliwat ni Anak, nga amo sanday Sesai, Ahiman, kag Talmay, sa sadto nga lugar.

15Halin didto naglakat sia sa pagsalakay sang mga tawo nga nagaestar sa siudad sang Debir nga sadto anay ginatawag Kiryat-seper.

16Nagsiling si Caleb, “Ipaasawa ko ang akon anak nga babayi nga si Acsa sa tawo nga makaagaw sang Kiryat-seper.”

17Si Otniel, ang anak ni Kenaz nga utod ni Caleb, nag-agaw sang siudad. Gani ginpaasawa ni Caleb sa iya ang iya anak nga babayi nga si Acsa.

18Sa adlaw sang ila kasal, ginpilit sia ni Otniel sa pagpangayo sa iya amay sing isa ka uma. Nagpanaog si Acsa sa iya asno kag nagkadto kay Caleb. Ginpamangkot sia ni Caleb, “Ano ang luyag mo?”

19Nagsabat sia, “Hatagi ako sing regalo. Tungod kay ginbutang mo ako sa kadutaan sang Negeb nga mamala, hatagi ako sing mga tuboran sang tubig.” Gani ginhatag ni Caleb sa iya ang naibabaw kag naubos nga mga tuboran.

20Ang duta nga nabaton sang mga panimalay sang tribo ni Juda nga mangin-ila pagapanag-iyahan amo ang masunod:

21ang mga siudad sa labing nabagatnan nga natuon sa ila bahin, yadtong mga malapit sa dulonan sang Edom nga amo ang Kabseel, Eder, Hagor,

22Kina, Dimona, Adada,

23Kedes, Hasor, Itnan,

24Zif, Telem, Bealot,

25Hasor-hadata, Keryot-Hezron (ukon Hasor),

26Amam, Sema, Molada,

27Hasar-gada, Hesmon, Betpelet,

28Hasar-sual, Beerseba, Besiota,

29Baala, Iyim, Esem,

30Eltolad, Kesil, Horma,

31Ziklag, Madmana, Sansana,

32Lebaot, Silhim, Ayin, kag Rimon: baynte nwebe tanan ka mga siudad, lakip ang mga banwa sa palibot sini.

33Ang mga siudad sa kapatagan amo ang mga masunod: Estaol, Zora, Asna,

34Zonoa, Enganim, Tapua, Enam,

35Harmut, Adulam, Soco, Aseka,

36Saaraim, Aditaim, Gedera, Gederotaim: katorse ka mga siudad, lakip ang mga banwa sa palibot sini.

37Didto man ang Senan, Hadasa, Migdalgad,

38Dilan, Mispa, Jocteel,

39Lakis, Boskat, Eglon,

40Kabon, Laman, Kitlis,

41Gederot, Betdagon, Naama, kag Makeda: desi-sais ka mga siudad, lakip ang mga banwa sa palibot sini.

42Didto man ang Libna, Eter, Asan,

43Ipta, Asna, Nesib,

44Keila, Aczib, kag Maresa: siyam ka mga siudad, lakip ang mga banwa sa palibot sini.

45Didto ang Ekron lakip ang iya mga banwa kag mga barangay,

46kag ang tanan nga mga siudad kag mga banwa nga malapit sa Asdod, halin sa Ekron pakadto sa Dagat sang Mediteraneo.

47Didto ang Asdod kag Gaza, lakip ang ila mga banwa kag mga barangay, nga nagalambot sa sapa sa dulonan sang Ehipto kag sa baybayon sang Dagat sang Mediteraneo.

48Sa kabakuloran didto ang Samir, Hatir, Soco,

49Dana, Kiryat-seper (ukon Debir),

50Anab, Estemo, Anim,

51Gosen, Holon, kag Gilo: onse ka mga siudad, lakip ang mga banwa sa palibot sini.

52Didto ang Arab, Duma, Esan,

53Hanim, Bet-tapua, Apeka,

54Humta, Kiryat-arba (ukon Hebron), kag Sior: siyam ka mga siudad, lakip ang mga banwa sa palibot sini.

55Didto ang Maon, Carmel, Zif, Huta,

56Jezreel, Hokdeam, Zanoa,

57Kain, Gebeat, kag Timna: napulo ka mga siudad, lakip ang mga banwa sa palibot sini.

58Didto ang Halhul, Betsur, Gedor,

59Maarat, Betanot, kag Eltekon: anom ka mga siudad, lakip ang mga banwa sa palibot sini.

60Didto ang Kiryat-baal (ukon Kiryat-jearim) kag ang Raba: duha ka mga siudad, kag ang mga banwa sa palibot sini.

61Sa desierto didto ang Bet-araba, Midin, Sekaka,

62Nibsan, ang Siudad sang Asin, kag Engedi: anom ka mga siudad, lakip ang mga banwa sa palibot sini.

63Pero ang mga tawo sang Juda wala makasarang sa pagtabog paggwa sang mga Jebusnon, nga nag-estar sa Jerusalem. Sa gihapon ang mga Jebusnon nagaestar didto sa Jerusalem upod sang mga tawo sang Juda.

← Chapter 14 Jump to: Chapter 16 →