Joshua 18

Ilonggo (Maayong Balita nga Biblia (2012))

← Chapter 17 Jump to: Chapter 19 →

1Sa tapos maagaw sang mga Israelinhon ang duta, nagtipon sila tanan sa Silo, kag nagpatindog sang Tolda sang presensya sang Ginoo.

2May pito pa ka mga tribo sang mga Israelinhon nga wala pa mapartihi sang duta.

3Gani si Josue nagsiling sa mga Israelinhon, “Tubtob pa bala san-o ang inyo pagpabuyanbuyan sa inyo pagsulod kag sa pagkuha sang duta nga ginhatag sa inyo sang Ginoo, ang Dios sang inyo mga katigulangan?

4Hatagi ninyo ako sing tatlo ka mga tawo gikan sa tagsa ka tribo. Ipadala ko sila sa pag-usisa sang bug-os nga duta kag magahimo sila sing plano sang amo nga duta suno sa ila naluyagan nga mangin-ila pagapanag-iyahan. Sa tapos sini magabalik sila sa akon.

5Pamartidahon sa ila ang duta sa pito ka parti. Si Juda magaestar sa iya kadutaan sa bagatnan kag si Jose sa iya kadutaan sa aminhan.

6Maghimo kamo sing plano sang pito ka parti sang duta, kag dalha ini sa akon. Dayon paagi sa pagabutgabot; akon ini himuon para sa inyo sa paghibalo kon diin natuon ang tagsa ka tribo suno sa luyag sang Ginoo nga aton Dios.

7Ang mga Levinhon indi pagpartihan sang duta subong sang sa inyo, tungod kay ang ila parti amo ang pag-alagad subong nga mga pari sang Ginoo. Ang mga tribo nanday Gad, Ruben, kag ang katunga sang tribo ni Manases sa Sidlangan nakabaton na sang ila parti sang duta sa sidlangan sang Jordan, nga ginhatag sa ila ni Moises nga alagad sang Ginoo.”

8Naglakat ang mga tawo sa paghimo sang plano sang duta sa tapos masingganan sila ni Josue sang masunod: “Usisaa ninyo ang bug-os nga duta kag maghimo kamo sing plano sini, kag magbalik kamo dayon sa akon. Akon dayon ini pagabutgabotan sa inyo diri sa Silo sa paghibalo gikan sa Ginoo kon paano ang duta pamartidahon sa inyo mga tribo.

9Gani gin-usisa sang mga tawo ang bug-os nga duta, kag naghimo sing plano sini sa isa ka libro. Ginpamartida nila ang duta sa pito ka parti, kag ginlista ang mga banwa. Nagbalik dayon sila kay Josue sa kampo sa Silo.

10Ginpagabutgabotan sa ila ni Josue ang duta sa paghibalo gikan sa Ginoo kon paano pamartidahon ang duta, kag ginpanghatagan ang tagsa ka tribo ni Israel sang tag-isa ka bahin sang kadutaan.

11Ang mga panimalay sang tribo ni Benjamin una nga nakabaton sang duta nga yara sa gintung-an sang mga tribo ni Juda kag ni Jose.

12Sa aminhan, ang ila dulonan nagsugod sa Jordan, kag nagtaklad pakadto sa kabukiran sa aminhan sang Jerico, kag padulong sa nakatundan sa kabakuloran tubtob sa desierto sang Betaben.

13Ang dulonan nagpadulong sa bagatnan nga bahin sang Luz, (nga ginatawag man nga Betel), dayon nagpadulhog sa Atarot-adar, sa bukid sa bagatnan sang Naubos nga Bet-horon.

14Karon ang dulonan nagbaylo sang iya ginapadulongan, nagliko pa bagatnan halin sa nakatundan nga bahin sini nga bukid sa nabagatnan sang Bet-horon, kag nagpadayon sa siudad sang Kiryat-baal (ukon Kiryat-jearim), nga iya sang tribo ni Juda. Amo ini ang dulonan sa nakatundan.

15Ang dulonan sa nabagatnan nagsugod sa punta sang Kiryat-jearim, kag halin didto nagpadulong sa nakatundan pakadto sa mga Tuboran sang Neptoa.

16Nagdulhog dayon ini pakadto sa kunsaran sang bukid nga nagaatubang sa Kapatagan sang Hinom, sa naaminhan nga punta sang Kapatagan sang Refaim. Nagpadulong dayon ini sa bagatnan sa Kapatagan sang Hinom, sa nabagatnan nga bukid sang mga Jebusnon, padulong sa Enrogel.

17Nagliko dayon ini pa aminhan pakadto sa Ensemes, kag dayon pakadto sa Gelilot, nga yara sa atubang sang Taklaran sang Adumin. Ang dulonan nagdulhog pakadto sa Bato ni Bohan, ang anak nga lalaki ni Ruben,

18kag nag-agi ini sa aminhan sang Bukid sang Bet-araba, kag nagapadulhog sa Kapatagan sang Jordan.

19Nagpadulong ini pa aminhan sang Bukid sang Bet-hogla, kag nag-untat ini sa naaminhan nga gibwangan sa Dagat nga Patay, sa nabagatnan nga punta sang Jordan. Amo ini ang nabagatnan nga dulonan.

20Ang Jordan amo ang dulonan sa sidlangan. Amo ini ang mga dulonan sang duta nga nabaton sang mga panimalay sang tribo ni Benjamin nga ila ginpanag-iyahan.

21Ang mga siudad nga iya sang mga panimalay sang tribo ni Benjamin amo ang Jerico, Bet-hogla, Emek-kesis,

22Bet-araba, Semaraim, Betel,

23Abim, Para, Opra,

24Keparamoni, Opni, kag Geba: dose ka mga siudad lakip ang mga kabanwahanan sa palibot sini.

25Yara man ang Gabaon, Rama, Beerot,

26Mispa, Kepira, Moza,

27Rekem, Irpeel, Tarala,

28Zela, Elep, Jebus (ukon Jerusalem), Gebeat kag ang Kiryat-jearim: katorse ka mga siudad lakip ang mga kabanwahanan sa palibot sini. Amo ini ang kadutaan nga nabaton sang mga panimalay sang tribo ni Benjamin nga ila ginpanag-iyahan.

← Chapter 17 Jump to: Chapter 19 →