Joshua 4

Ilonggo (Maayong Balita nga Biblia (2012))

← Chapter 3 Jump to: Chapter 5 →

1Sang makatabok na ang tanan nga mga Israelinhon sa Suba sang Jordan, ang Ginoo nagsiling kay Josue,

2“Pili ka sing dose ka mga tawo, isa sa tagsa ka tribo,

3kag mandui sila, ‘Kuha kamo sing dose ka mga bato sa tunga sang Jordan, sa lugar nga gintindugan sang mga pari. Dalha ninyo ini, kag ibutang ninyo sa lugar nga inyo pagapatindugan sang inyo kampo karon nga gab-i.’”

4Dayon gintawag ni Josue ang dose ka mga tawo nga iya ginpili,

5kag ginsingganan sila, “Kadto kamo sa tunga sang Jordan, nga nagauna sa Kaban sang Kasugtanan sang Ginoo nga inyo Dios. Ang kada-isa sa inyo magkuha kag magpas-an sing isa ka bato para sa tagsa ka tribo sang Israel.

6Ini nga mga bato magapahanumdom sa mga tawo sang ginhimo sang Ginoo. Sa palaabuton, kon ang inyo mga kaanakan magpamangkot sa inyo kon ano ang buot silingon sining mga bato,

7sugiran ninyo sila nga ang tubig sang Suba sang Jordan nag-untat sa pag-ilig sang pagtabok sang mga pari nga nagapas-an sang Kaban sang Kasugtanan sang Ginoo. Ini nga mga bato magapahanumdom sa gihapon sang mga tawo sang Israel sang nahanabo diri.”

8Gintuman sang mga tawo ang mando ni Josue. Subong sang ginsiling sang Ginoo kay Josue, nagkuha sila sing dose ka mga bato sa tunga sang Jordan, isa ka bato para sa tagsa ka tribo sang Israel, ginpas-an nila ini tubtob sa kampo kag ginpamutang ini didto.

9Nagpahamtang man si Josue sing dose ka mga bato sa tunga sang Suba sang Jordan, sa lugar nga gintindugan sang mga pari nga nagadala sang Kaban sang Kasugtanan. Ini nga mga bato yadto pa didto tubtob karon.

10Ang mga pari nagtindog sa tunga sang Jordan tubtob natuman ang tanan nga ginsugo sang Ginoo kay Josue nga himuon sang mga tawo. Amo ini ang ginsugo ni Moises. Dayon ang mga tawo nagdalidali kag nagtabok sa suba.

11Sang makatabok na sila tanan, ang mga pari nga nagapas-an sang Kaban sang Kasugtanan sang Ginoo naglakat nga nagauna sa mga tawo.

12Ang mga lalaki sang mga tribo nanday Ruben kag Gad, kag ang katunga sang tribo ni Manases nag-una tabok sa tanan nga mga tawo, nga handa para sa inaway subong sang ginsiling ni Moises sa ila.

13Sa presensya sang Ginoo, mga 40,000 ka mga tawo nga handa para sa inaway halin sa sining duha kag tunga nga tribo ang nagtabok pakadto sa kapatagan nga malapit sa Jerico.

14Ang mga tawo sang Israel nagpasidungog kay Josue subong isa ka gamhanan nga tawo, tungod sang ginhimo sang Ginoo sadto nga adlaw. Ila sia ginpasidunggan sa bug-os niya nga kabuhi subong sang ila pagpasidungog kay Moises.

15Dayon ang Ginoo nagsiling kay Josue,

16“Mandui ang mga pari nga nagadala sang Kaban sang Kasugtanan nga magtakas sila halin sa Suba sang Jordan.”

17Kag gintuman ini ni Josue.

18Sang makatakas na ang mga pari sa mamala nga duta nag-ilig naman ang tubig, kag nag-awas liwat sa iya mga pangpang.

19Ang mga tawo nagtabok sa Jordan sang ika-10 nga adlaw sang nahauna nga bulan, kag naghimo sila sing kampo sa Gilgal, sa sidlangan nayon sang Jerico.

20Didto ginpahamtang ni Josue ang dose ka mga bato nga ginkuha sa Suba sang Jordan.

21Kag nagsiling sia sa mga tawo sang Israel, “Kon mamangkot ang inyo mga kabataan sa inyo sa ulihi kon ano ang kahulogan sini nga mga bato,

22sugiran ninyo sila nga ang mga tawo sang Israel nagtabok sa Suba sang Jordan sa mamala nga duta.

23Ang Ginoo nga aton Dios nagpamala sang Suba sang Jordan para sa aton tubtob nakatabok kita, subong nga iya man ginpamala ang Mapula nga Dagat para sa aton mga katigulangan tubtob nakatabok sila.

24Tungod sini ang tanan nga mga tawo sang duta magakilala kon daw ano kadako ang gahom sang Ginoo, kag kamo magapasidungog sa Ginoo nga inyo Dios tubtob sa katubtoban.”

← Chapter 3 Jump to: Chapter 5 →