Joshua 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Ang mga kadalag-an sang mga Israelinhon nabatian sang tanan nga mga hari sa nakatundan sang Jordan, nga yara sa kabakuloran, sa kapatagan, kag ang tanan nga yara sa baybayon sang Dagat sang Mediteraneo tubtob sa naaminhan sa Libano. Ini sila amo ang mga hari sang mga Hethanon, mga Amornon, mga Canaanhon, mga Peresnon, mga Hevhanon, kag mga Jebusnon.

2Sila tanan nagtingob sa pagpakig-away batok kay Josue kag sa mga Israelinhon.

3Pero sang mabatian sang mga tawo sang Gabaon, nga mga Hevhanon, ang ginhimo ni Josue sa Jerico kag sa Ay,

4nagpamat-od sila sa pagdaya sa iya. Naglakat sila kag nagkuha sing mga kalan-on kag ginkargahan nila ang ila mga asno sing daan nga mga sako kag sang natukapan nga mga panit nga sulodlan sing bino.

5Nagsuksok sila sing daan nga mga bayu kag daan na kaayo nga mga sandalyas nga nakay-o. Ang tinapay nga ila ginbalon matig-a na kag agup-opon pa.

6Dayon nagkadto sila kay Josue didto sa kampo sa Gilgal, kag nagsiling sa iya kag sa mga tawo sang Israel, “Halin pa kami sa malayo nga duta. Maghimo kamo sing kasugtanan upod sa amon.”

7Pero ang mga tawo sang Israel nagsiling sa mga Hevhanon, “Ngaa man maghimo kami sing kasugtanan sa inyo? Basi malapit lang ang inyo ginaestaran.”

8Nagsiling sila kay Josue, “Yari kami sa pag-alagad sa imo.” Si Josue nagpamangkot sa ila, “Sin-o bala kamo? Sa diin kamo maghalin?”

9Dayon nagpanugiron sila nga nagasiling: “Nag-abot kami halin sa malayo pa nga duta, tungod kay nakabati kami nahanungod sang Ginoo nga imo Dios. Nabalitaan namon ang tanan nga iya ginhimo sa Ehipto,

10kag ang iya ginhimo sa duha ka hari nga Amornon sa sidlangan sang Jordan: sa kay Sihon nga hari sang Hesbon, kag sa kay Og nga hari sang Basan, nga nag-estar sa Astarot.

11Ang amon mga pangulo, kag ang tanan nga mga tawo nga nagaestar sa amon duta nagsiling sa amon, ‘Maghanda kamo sing kalan-on nga balalunon para sa panglakaton. Lakat kamo sa pagsugata sini nga mga tawo kag singgana sila, “Yari kami sa pag-alagad sa imo. Kon mahimo, maghimo ka sing kasugtanan sa amon.” ’

12Tan-awa ang amon tinapay. Sang paghalin namon sa amon balay sa pagsugata sa imo, mainit-init pa ini. Pero tan-awa bala! Matig-a na ini kag agup-opon.

13Ini nga mga panit, bag-o pa sang sudlan namon sing bino, pero tan-awa bala! Gision na ini. Ang amon mga bayu kag mga sandalyas nagkalagisi na tungod sang malawig kaayo nga pagpanglakaton.”

14Ang mga tawo sang Israel nagbaton sang pagkaon nga halin sa ila pero wala sila magpangayo sang laygay sa Ginoo.

15Gani si Josue naghimo sang kasugtanan sa pagpakig-abyan sa ila kag ginpahanugotan sila nga mabuhi. Ang mga pangulo sang katilingban sang Israel nagsumpa nga ila tumanon ang kasugtanan.

16Sang makaligad ang tatlo ka adlaw sa tapos mahimo ang kasugtanan, nahibal-an sang mga Israelinhon nga malapit lang ang ginaestaran sini nga mga tawo.

17Gani naglakat ang mga tawo sang Israel, kag sa tapos ang tatlo ka adlaw nakaabot sila sa mga siudad nga ginaestaran sini nga mga tawo: ang mga siudad sang Gabaon, Kepira, Beerot, kag ang Kiryat-jearim.

18Pero ang mga Israelinhon indi makapamatay sa ila, tungod kay ang ila mga pangulo nagpanumpa sa sini nga mga tawo sa ngalan sang Ginoo, ang Dios sang Israel. Ang tanan nga mga tawo nagreklamo sa mga pangulo tungod sini.

19Pero ang mga pangulo nagsabat, “Nagpanumpa kami sa ila sa ngalan sang Ginoo, ang Dios sang Israel. Karon indi na kami makahalit sa ila.

20Kinahanglan pabay-an naton nga mabuhi sila, tungod sang amon panumpa. Kon indi, ang Dios magasilot sa amon.

21Pabay-i sila nga mabuhi, apang magapangahoy sila kag magasag-ob sing tubig para sa aton.” Amo ini ang panugyan sang mga pangulo.

22Ginpatawag ni Josue ang mga taga-Gabaon, kag ginpamangkot sila, “Ngaa man gindayaan ninyo kami kag ginsugiran nga naghalin pa kamo sa malayo nga lugar, nga taga-diri man lang gali kamo?

23Tungod sining inyo ginhimo ginpakamalaut kamo sang Dios. Mangin-ulipon kamo tubtob san-o nga magapangahoy kag magasag-ob sing tubig para sa lugar nga ginasimba ang akon Dios.”

24Nagsabat sila kay Josue, “Amo ini ang amon ginhimo, sir, tungod kay nakahibalo kami nga matuod gid nga ang Ginoo nga inyo Dios nagsugo sa iya alagad nga si Moises sa paghatag sa inyo sang bug-os nga duta, kag sa pagpamatay sa mga tawo nga nagaestar sa sini samtang nagaabanse kamo. Ginhimo namon ini tungod kay nahadlok gid kami sa inyo, kag nahadlok kami mapatay.

25Karon yari kami sa idalom sang imo gahom. Pagusto ikaw kon ano ang luyag mo nga himuon sa amon.”

26Gani amo ini ang ginhimo ni Josue: gin-apinan niya sila sa mga tawo sang Israel, kag wala niya sila ginpapatay.

27Pero ginhimo nila sila nga mga manugpangahoy kag manugsag-ob sang tubig para sa mga tawo sang Israel kag sa altar sang Ginoo. Tubtob sini nga adlaw nagapadayon sila sa paghimo sini nga bulohaton sa lugar nga ginpili sang Ginoo nga sia pagasimbahon.

← Chapter 8 Jump to: Chapter 10 →