Joshua 5

Ilonggo (Maayong Balita nga Biblia (2012))

← Chapter 4 Jump to: Chapter 6 →

1Ang tanan nga mga hari nga Amornon sa nakatundan sang Jordan kag ang tanan nga mga hari nga Canaanhon didto sa baybayon sang Dagat sang Mediteraneo nakabati nga ang Ginoo nagpamala sang Suba sang Jordan samtang ang mga tawo sang Israel nagtabok sini. Ginhadlukan gid sila kag gintalawan, tungod sang mga Israelinhon.

2Dayon ang Ginoo nagsiling kay Josue, “Ginsugo ko ang tanan nga mga lalaki sang Israel nga magpatuli sa wala pa sila makahalin sa Ehipto. Karon maghimo ka sing mga sundang gikan sa bato nga bantiling, kag tulia ang mga Israelinhon nga nagkalatawo sugod sang makahalin kamo sa Ehipto.”

3Gani si Josue naghimo sing mga sundang, kag ginpangtuli niya sila didto sa lugar nga ginatawag Bukid sang Ginatulian.

4Ginhimo niya ini, tungod kay ang tanan nga mga lalaki nga makasarang na sa pag-away sang ila paghalin sa Ehipto, nagkalamatay sa desierto sa ila pagpanglakaton.

5Bisan ang tanan nga mga lalaki nga naghalin sa Ehipto ginpangtuli, wala gid sing may natuli sa mga nagkalatawo sa desierto sa diin sila nagpanglakaton.

6Kay ang mga tawo sang Israel nagpanglakaton sa desierto sa sulod sang kwarenta ka tuig. Sa sini nga tion, ang tanan nga mga lalaki nga makasarang na sa pag-away nga naghalin sa Ehipto nagkalamatay na, tungod kay wala sila magpamati sa ginsiling sang Ginoo. Ang Ginoo nagpanumpa sa ila nga indi niya sila pagpatan-awon sang maayo kag mapatubason nga duta nga iya ginsaad nga ihatag sa ila mga katigulangan.

7Pero ang ila mga kaanakan nga lalaki nga nagbulos sa ila wala mapangtuli samtang nagapanglakaton sila sa desierto. Amo ining bag-o nga kaliwatan ang ginpangtuli ni Josue.

8Sang matapos ang pagpangtuli sang tanan nga kalalakin-an, nagpabilin sila sa sulod sang kampo tubtob nga nagpali ang ila mga pilas.

9Kag ang Ginoo nagsiling kay Josue, “Karon nga adlaw ginkuha ko sa inyo ang kahuloy-an sang inyo pagpaulipon sa Ehipto.” Gani ang ngalan sadto nga lugar ginatawag nga Gilgal, tubtob sini nga adlaw.

10Samtang ang mga Israelinhon yara pa sa ila kampo sa Gilgal, sa kapatagan nga malapit sa Jerico, ginsaulog nila ang Pascua sa gab-i sang ika-14 nga adlaw sang bulan.

11Sa madason gid nga adlaw nagkaon sila sang mga patubas sa Canaan: sinanlag nga trigo, kag tinapay nga wala sing lebadora.

12Sa tapos sini nag-untat na ang paghulog sang mana, kag wala na sing mana ang mga Israelinhon. Sugod sadto nga tuig, nagkaon sila sang mga patubas sa Canaan.

13Sang didto si Josue malapit sa Jerico, sa hinali may nakita sia nga tawo nga nagatindog sa atubang niya nga nagauyat sang espada. Ginpalapitan sia ni Josue kag ginpamangkot, “Isa bala ikaw sang amon mga soldado, ukon isa ka kaaway?”

14Nagsabat ang tawo, “Indi, kundi nga nag-abot ako subong pangulo sang mga hangaway sang Ginoo.” Si Josue nagluhod sa pagsimba kag nagsiling, “Yari ako sa pag-alagad sa imo, Sir. Ano bala ang luyag mo nga himuon ko?”

15Kag ang pangulo sang mga hangaway sang Ginoo nagsiling sa iya, “Ubaha ang imo sandalyas, kay ang lugar nga imo ginatindugan balaan.” Kag si Josue nagtuman sang ginsiling sa iya.

← Chapter 4 Jump to: Chapter 6 →