Joshua 6

Ilonggo (Maayong Balita nga Biblia (2012))

← Chapter 5 Jump to: Chapter 7 →

1Ang mga pwertahan sang Jerico ginsirhan gid agod indi makasulod ang mga Israelinhon. Wala sing may makasulod ukon makagwa sa siudad.

2Ang Ginoo nagsiling kay Josue, “Pamati ka! Ihatag ko sa imo mga kamot ang Jerico kag ang iya hari kag ang iya tanan nga maisog nga mga hangaway.

3Ikaw kag ang imo mga hangaway magmartsa sa palibot sang siudad sing makaisa kada adlaw, sa sulod sang anom ka adlaw.

4Ang pito ka mga pari nga ang kada-isa nagadala sing budyong nga sungay sang mga karnero nga lalaki, amo ang magauna sa Kaban sang Kasugtanan. Sa ikapito nga adlaw, ikaw kag ang imo mga hangaway magamartsa sa palibot sang siudad sing makapito samtang nga ang mga pari nagapatunog sang mga budyong.

5Dayon patunogon nila sing dungan kag malawig ang mga budyong. Sa inyo pagkabati sini, ang tanan nga tawo magsinggit sing tudo gid, kag ang mga pader sang siudad magakalapukan. Dayon ang bug-os nga hangaway magasulod sing deretso sa siudad.”

6Gani gintawag ni Josue ang mga pari kag ginsingganan sila, “Hakwata ninyo ang Kaban sang Kasugtanan. Ang pito sa inyo mag-una nga nagadala sang mga budyong nga nahimo sa mga sungay sang mga karnero nga lalaki.”

7Kag ginsingganan niya ang mga tawo, “Lakat na kamo! Libuta ninyo ang siudad upod sa mga soldado nga nagauna sa Kaban sang Kasugtanan sang Ginoo.”

8Dayon suno sa ginsugo ni Josue, ang mga soldado nag-una sa mga pari nga nagapatunog sang mga budyong nga sungay sang mga karnero nga lalaki. Nagasunod sini ang mga pari nga nagapas-an sang Kaban sang Kasugtanan, kag ginasundan man sang mga gwardya, samtang sa bug-os sini nga tion ginapatunog ang mga budyong.

10Pero si Josue nagmando sa mga tawo nga indi magsinggit ukon maggahod tubtob maghatag sia sing mando.

11Gani ginpalibot niya sa siudad sing makaisa ang mga pari nga nagadala sang Kaban sang Kasugtanan. Nagbalik sila sa kampo kag nagpabilin sila didto sa sadto nga gab-i.

12Aga pa nagbangon si Josue sang madason nga adlaw, kag ginhakwat sang mga pari ang Kaban sang Kasugtanan sang Ginoo.

13Ang pito ka mga pari nga nagadala sang pito ka mga budyong nga mga sungay sang mga karnero nga lalaki nag-una sa Kaban sang Kasugtanan, nga nagapadayon sa pagpatunog sang mga budyong. Ang mga soldado nag-una sa ila kag ang mga gwardya sa likod nagasunod sa Kaban sang Kasugtanan, samtang nagapadayon ang pagpatunog sang mga budyong.

14Sa ikaduha nga adlaw nagmartsa sila liwat sa palibot sang siudad sing makaisa kag nagbalik sa kampo. Ginhimo nila ini sa sulod sang anom ka adlaw.

15Sang ikapito nga adlaw nagbugtaw sila sing kaagahon pa, kag nagmartsa sila sa palibot sang siudad sing makapito sa amo man gihapon nga paagi. Amo lang yadto nga adlaw nga nagmartsa sila sa palibot sang siudad sing makapito.

16Sa ikapito nila nga paglibot, sa tapos ang mga pari makapatunog sang mga budyong, ginmanduan ni Josue ang mga tawo, “Singgit kamo! Ang Ginoo naghatag sa aton sang siudad!

17Ang siudad kag ang tanan nga yara sa sini pagalaglagon sing bug-os subong nga dulot sa Ginoo. Ang babayi nga nagabaligya sang iya dungog nga si Rahab kag ang iya panimalay lamang amo ang pagaluwason, tungod kay gintago niya ang aton mga espiya.

18Apang kamo inyo, magpalayo sa mga butang nga pagalaglagon. Kon magkuha kamo sang bisan ano nga butang nga gintugyan nga pagalaglagon, magadala kamo sing kalalat-an kag kalaglagan sa kampo sang mga Israelinhon.

19Pero ang bisan ano nga nahimo sa pilak, bulawan, bronsi, ukon salsalon napain para sa Ginoo. Ibutang ini sa talaguan sang manggad sang Ginoo.”

20Gani ang mga pari nagpatunog sang mga budyong. Sang pagkabati sini sang mga tawo, nagsinggit sila sing tudo, kag ang mga pader nagkalapukan. Dayon ang tanan nga mga hangaway nagtaklad sa bakulod padulong sa siudad kag gin-agaw ini.

21Ginpamatay nila paagi sa ila mga espada ang tanan nga ara sa siudad, mga lalaki kag mga babayi, pamatan-on kag tigulang. Ginpamatay man nila ang mga baka, mga karnero kag mga asno.

22Ginsugo ni Josue ang duha ka mga tawo nga nagpang-espiya, “Kadtoi ninyo ang balay sang babayi nga nagabaligya sang iya dungog, kag dalha sia kag ang iya panimalay pa gwa subong sang inyo ginsaad sa iya.”

23Gani naglakat sila kag gindala nila pa gwa si Rahab, kaupod sa iya amay, iloy, mga utod nga lalaki, kag ang iban nga mga katapo sang iya panimalay. Tanan sila gindala nila pa gwa, ang iya panimalay kag ang mga ulipon, kag ginpatener sila sa gwa sang kampo sang mga Israelinhon.

24Dayon gintutdan nila ang siudad kag ginsunog ang tanan nga yara sa sulod sini, luas lamang sa mga pagkabutang nga nahimo sa bulawan, pilak, bronsi, kag salsalon, nga ila ginpanguha kag ginbutang sa talaguan sang manggad sang Ginoo.

25Pero ginluwas ni Josue ang kabuhi ni Rahab, ang babayi nga nagabaligya sang iya dungog, kag ang tanan niya nga mga pariente, tungod kay gintago niya ang duha ka mga espiya nga ginpadala ni Josue sa Jerico. Ang iya mga kaliwat nag-estar sa Israel tubtob sini nga adlaw.

26Sa sadto nga tion si Josue nagpaandam gid nga nagasiling: “Ang bisan sin-o nga magtinguha sa pagpatindog liwat sini nga siudad sang Jerico, pagapakamalauton sang Ginoo. Ang bisan sin-o nga magbutang sing sadsaran madulaan sang iya panganay nga anak nga lalaki, ang bisan sin-o nga magpatindog sang iya mga pwerta madulaan sang iya kinagot nga anak nga lalaki.”

27Gani ang Ginoo nag-upod kay Josue, kag ang iya kabantugan naglapnag sa bug-os nga pungsod.

← Chapter 5 Jump to: Chapter 7 →