Joshua 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Sa sadto nga tion ang hari sang Jerusalem nga si Adonisedek, nakabati nga gin-agaw kag ginlaglag sing bug-os ni Josue ang Ay kag ginpatay ang hari sini, subong sang iya ginhimo sa Jerico kag sa iya hari. Nakabati man sia nga ang mga taga-Gabaon nagpakighidait sa mga Israelinhon kag nagaestar kaupod nila.

2Ang mga pumoluyo sang Jerusalem nagkahadlok gid sing tama tungod sini kay ang Gabaon isa ka daku nga siudad subong kadako sang tanan nga mga siudad nga may mga hari, kag mas daku pa gani ini sang sa Ay, kag ang iya mga kalalakin-an maisog nga mga hangaway.

3Gani nagpadala si Adonisedek sini nga mensahe kay Hoham nga hari sang Hebron, kay Piram nga hari sang Harmut, kay Hapia nga hari sang Lakis, kag kay Debir nga hari sang Eglon:

4“Dali kamo kag buligi ninyo ako sa pagsalakay sa Gabaon, tungod kay ang iya mga pumoluyo nagpakighidait kay Josue kag sa mga tawo sang Israel.”

5Ining lima ka mga hari nga Amornon—ang mga hari sang Jerusalem, Hebron, Harmut, Lakis kag Eglon—nagtingob sang ila mga hangaway, kag ginlibutan nila ang Gabaon, kag ginsalakay ini.

6Ang mga pumoluyo sang Gabaon nagpangayo sing bulig kay Josue sa kampo sa Gilgal nga nagasiling: “Indi kami pagpabay-i! Mag-abot ka gilayon kag tabangi kami! Luwasa kami! Ang tanan nga mga hari nga Amornon sa kabakuloran nagtingob sang ila mga hangaway sa pagsalakay sa amon!”

7Gani si Josue kag ang bug-os niya nga hangaway, lakip ang labing maayo nga mga tropa nagtaklad halin sa Gilgal.

8Ang Ginoo nagsiling kay Josue, “Indi ka magkahadlok sa ila. Ginhatag ko na sa imo ang pagdaog. Wala sing isa sa ila nga makasarang sa imo.”

9Sa bug-os nga gab-i si Josue kag ang iya mga hangaway naglakat halin sa Gilgal pakadto sa Gabaon, kag ginsalakay niya ang mga Amornon sing hinali.

10Ginpasalangisag sang Ginoo ang mga Amornon sa atubang sang mga hangaway sang Israel. Ginpamatay sila sang mga Israelinhon sa Gabaon, kag ginpanglagas sila padulhog sa bukid sang Bet-horon nga nagapakig-away tubtob sa nabagatnan pakadto sa Aseka kag sa Makeda.

11Samtang nagapalagyo sila sa mga hangaway nga Israelinhon padulhog sa makitid nga alagyan sa Bet-horon pakadto sa Aseka, ginpangdagdagan sila sang Ginoo sang dalagku nga mga yelo nga daw bato gikan sa langit kag nagkalamatay sila. Mas madamo pa ang nagkalamatay paagi sa mga yelo nga daw bato sang sa ginpamatay sang mga Israelinhon.

12Sa amo gid nga adlaw nga ang Ginoo nagpadaog sang mga tawo sang Israel batok sa mga Amornon, si Josue nagpangamuyo sa Ginoo. Sa atubang sang mga Israelinhon nagsiling sia, “Adlaw, magdulog ka sa ibabaw sang Gabaon, Bulan, magpabilin ka sa ibabaw sang Kapatagan sang Ayalon.”

13Ang adlaw nagdulog kag ang bulan wala maghulag tubtob nadaog sang pungsod sang Israel ang iya mga kaaway. Nasulat ini sa Libro ni Jasar. Ang adlaw nagdulog sa tunga sang langit, kag wala ini magtunod sa bug-os nga adlaw.

14Wala pa gid sing adlaw nga kasubong sini halin sang una nga ang Ginoo nagtuman sa isa ka tawo, kag nagpakig-away sa pagdampig sa Israel!

15Dayon si Josue kag ang iya mga hangaway nagbalik sa kampo sa Gilgal.

16Pero nakapalagyo ang lima ka mga hari nga Amornon kag nagpanago sila sa kweba sa Makeda.

17May nakakita sa ila kag ginsugiran si Josue nga nagapanago sila didto.

18Nagsiling si Josue, “Paligiri ninyo sing dalagku nga mga bato ang baba sang kweba. Magbutang kamo sing mga gwardya didto,

19pero kamo inyo indi magpabilin didto. Lagsa ninyo ang mga kaaway kag salakaya sila sa nalikod nga bahin. Indi sila pagpasudla sa ila mga siudad! Ang Ginoo nga inyo Dios magapadaog sa inyo batok sa ila.”

20Si Josue kag ang mga tawo sang Israel nagpamatay sa ila. Ang mga nakapalagyo nagpanago sa sulod sang siudad nga nalibutan sing mga pader kag wala sila mapatay.

21Dayon ang tanan nga mga tinawo ni Josue nakabalik sa iya nga wala maano sa kampo sa Makeda. Wala sing may nangahas sa paghambal sing malain batok sa bisan kay sin-o nga tawo sa Israel.

22Karon si Josue nagsiling, “Abrihi ninyo ang baba sang kweba, kag dalha ninyo pa gwa diri sa akon ang lima ka mga hari.”

23Gintuman nila ini. Ginpagwa nila ang mga hari sang Jerusalem, Hebron, Harmut, Lakis kag Eglon.

24Sang madala na ang mga hari kay Josue, gintawag niya ang tanan nga mga tawo sang Israel sa pagpalapit sa iya, kag ginmanduan ang mga opisyales nga nag-upod sa iya, “Dali kamo, kag linasa ninyo ang mga liog sining mga hari.” Ginhimo nila ini.

25Dayon si Josue nagsiling sa iya mga opisyales, “Indi kamo magkahadlok ukon madulaan sang paglaom. Magpakalig-on kamo kag magpakaisog kay ang Ginoo magahimo sini sa tanan ninyo nga mga kaaway.”

26Dayon ginpamatay ni Josue ang mga hari kag ginbitay sila sa lima ka mga kahoy diin ginbayaan ang ila mga bangkay tubtob sa kahapunanon.

27Sang pagtunod sang adlaw, nagmando si Josue nga kuhaon ang ila mga bangkay kag ihaboy ini sa kweba diin sila nagpanago. Gintabunan sing dalagku nga mga bato ang baba sang kweba, kag didto pa sila tubtob sini nga adlaw.

28Ginsalakay ni Josue kag gin-agaw ang Makeda kag ang iya hari sa sadto nga adlaw. Ginpamatay ni Josue kag sang iya mga tinawo ang tanan nga yara sa siudad, kag wala gid sing isa nga nabilin nga buhi. Ginhimo man niya sa hari sang Makeda ang iya ginhimo sa hari sang Jerico.

29Sa tapos sini, si Josue kag ang iya mga hangaway nagpadayon sa paglakat halin sa Makeda pakadto sa Libna, kag ginsalakay nila ini.

30Ang Ginoo nagpadaog man sa mga Israelinhon batok sa sini nga siudad kag sa iya hari. Ginpamatay nila ang tagsa ka tawo sa siudad kag wala sila sing may ginbilin bisan isa. Ginhimo nila sa hari ang ila man ginhimo sa hari sang Jerico.

31Sa tapos sini, si Josue kag ang iya mga hangaway nagpadayon sa paglakat halin sa Libna pakadto sa Lakis. Ginlibutan nila ini kag ginsalakay.

32Ginpadaog sang Ginoo ang mga Israelinhon batok sa Lakis sa ikaduha nga adlaw sang pag-inaway. Subong sang ila ginhimo sa Libna, wala sila sing ginbilin nga buhi, kundi ginpamatay nila ang tanan nga mga tawo sa siudad.

33Dayon si Joram nga hari sang Gezer, nag-abot sa pagbulig sa Lakis, pero ginlutos sia ni Josue kag sang iya mga tinawo, kag wala gid sing bisan isa sa ila nga nabilin nga buhi.

34Sa tapos sini, si Josue kag ang iya mga hangaway nagpadayon sa paglakat halin sa Lakis pakadto sa Eglon. Ginlibutan nila ini kag ginsalakay.

35Sa amo man nga adlaw gin-agaw nila ini kag ginpamatay ang tanan nga yadto didto, subong sang ginhimo nila sa Lakis.

36Sa tapos sini, si Josue kag ang iya hangaway nagpadayon sa paglakat halin sa Eglon kag nagtaklad pakadto sa kabakuloran sang Hebron. Ginsalakay nila ini

37kag gin-agaw. Ginpamatay nila ang hari, kag ang tanan nga mga tawo sa siudad, kag subong man ang sa mga kaingod nga mga banwa. Ginlaglag gid sing bug-os ni Josue ang siudad, subong sang iya ginhimo sa Eglon. Wala sing isa nga nabilin nga buhi.

38Dayon si Josue kag ang iya mga hangaway nagbalik sa Debir kag ginsalakay ini.

39Gin-agaw nila ini, kag ang tanan nga kaingod nga mga banwa. Ginpamatay nila ang tanan nga mga tawo didto kag ang hari sini. Ginhimo nila sa Debir kag sa hari sini ang ila ginhimo sa Hebron, Libna, kag sa mga hari sini.

40Nadaog ni Josue ang bug-os nga duta. Ginpanglutos niya ang mga hari sa kabakuloran, sa mga lugar sang Negeb, sa mga kapatagan sa sidlangan, kag sa mga kunsaran sang mga bakulod sa nakatundan. Wala sing isa nga iya ginluwas, kundi ginpamatay niya ang tanan. Amo ini ang ginsugo sang Ginoo nga Dios sang Israel.

41Ginpanglutos sila ni Josue halin sa Kades Barnea sa nabagatnan pakadto sa Gaza malapit sa baybayon, lakip ang tanan nga mga lugar sa Gosen, tubtob sa naaminhan pakadto sa Gabaon.

42Nadaog ni Josue ini tanan nga mga hari kag ang ila mga kadutaan sa isa lang ka pagsalakay, tungod kay ang Ginoo nga Dios sang Israel, nagpakig-away para sa Israel.

43Sa tapos sini, si Josue kag ang iya mga hangaway nagbalik sa kampo sa Gilgal.

← Chapter 9 Jump to: Chapter 11 →