Joshua 17

Ilonggo (Maayong Balita nga Biblia (2012))

← Chapter 16 Jump to: Chapter 18 →

1Tungod kay si Manases amo ang panganay nga anak ni Jose, ang isa ka bahin sang duta ginhatag sa iya tribo. Si Maquir nga amay ni Galaad, amo ang panganay nga anak ni Manases, kag sia isa ka bantog nga soldado, gani ginhatag sa iya ang Galaad kag Basan sa nasidlangan sang Jordan.

2May duta man sa nakatundan sang Jordan nga ginhatag sa iban nga mga panimalay ni Manases nga amo sanday Abieser, Helek, Asriel, Siquem, Hefer, kag Semida. Ini sila amo ang mga kaanakan nga lalaki ni Manases nga anak ni Jose, kag mga pangulo sang ila mga panimalay.

3Karon si Selopehad, nga anak ni Hefer, nga anak ni Galaad, nga anak ni Maquir, nga anak ni Manases, wala sing mga anak nga lalaki, kundi mga babayi lamang. Sila amo sanday Mala, Noa, Hogla, Milca, kag Tirsa.

4Nagkadto sila kay Eleazar nga pari, kay Josue nga anak ni Nun, kag sa mga pangulo, kag nagsiling, “Ang Ginoo nagsugo kay Moises nga hatagan kami kag ang amon mga pariente nga lalaki sang bahin sang duta nga mangin-amon pagapanag-iyahan.” Gani, suno sa ginsugo sang Ginoo, sila kag ang ila mga pariente nga lalaki ginhatagan sing duta nga mangin-ila pagapanag-iyahan.

5Gani dugang pa sa Galaad kag Basan sa nasidlangan sang Jordan, napulo ka bahin sang duta ang nabaton ni Manases,

6tungod kay ang mga kaanakan ni Manases nga babayi kag subong man ang mga lalaki ginpanghatagan sing duta. Ang duta sang Galaad ginhatag sa nabilin nga mga kaliwat ni Manases.

7Ang kadutaan ni Manases naglambot halin sa Aser tubtob sa Mikmetat, sa sidlangan sang Siquem. Ang dulonan nagpadulong sa bagatnan nga nagasakop sang mga pumoluyo sang Entapua.

8Ang duta sa palibot sang Tapua iya ni Manases, pero ang banwa sang Tapua, sa dulonan, iya sang mga kaliwat ni Efraim.

9Gani ang dulonan nagdulhog pakadto sa sapa sang Kana. Ining mga siudad sa nabagatnan sang sapa, iya ni Efraim, bisan nga yara sila sa tunga sang mga siudad ni Manases. Ang dulonan ni Manases nagapadayon sa aminhan nga pangpang sang sapa, kag nag-untat ini sa Dagat sang Mediteraneo.

10Ang iya ni Efraim yara sa bagatnan, kag ang kay Manases yara sa aminhan kag ang ila dulonan sa nakatundan amo ang Dagat sang Mediteraneo. Nagatambi sila kay Aser sa naaminhan-nakatundan kag kay Isacar sa naaminhan-nasidlangan.

11Sa kadutaan ni Isacar kag ni Aser, si Manases nagpanag-iya sang mga siudad upod sang palibot sini nga mga kabanwahanan. Ini amo ang mga masunod: Bet-san, Ibleam, Dor nga amo ang siudad sa baybayon, Endor, Taanak, kag Megido.

12Pero ang mga tawo ni Manases wala makasarang sa pagtabog sang mga tawo nga nagaestar sa sadto nga mga siudad, gani ang mga Canaanhon nagpabilin sa pag-estar didto.

13Bisan sang magbakod na ang mga Israelinhon, wala nila matabog sing bug-os ang mga Canaanhon, pero ginpaobra sila sang mga Israelinhon agod nga mag-alagad sa ila.

14Ang mga kaliwat ni Jose nagsiling kay Josue, “Ngaa bala nga isa lang ka parti sang duta ang ginhatag sa amon nga mangin-amon pagapanag-iyahan? Madamo kami, tungod kay ang Ginoo nagpauswag sa amon.”

15Nagsabat si Josue, “Kon madamo gid man kamo kag ang lugar sa kabakuloran sang Efraim diutay katama para sa inyo, ti, kadto kamo sa mga kagulangan kag maghawan kamo sing duta para sa inyo kaugalingon, sa duta sang mga Peresnon, kag mga Refaimnon.”

16Ang mga kaliwatan ni Jose nagsabat, “Ang mga kabakuloran diutay para sa amon, pero ang mga Canaanhon sa kapatagan may mga karwahi, nga salsalon. Ang mga Canaanhon nga nagaestar sa Bet-san kag sa palibot nga mga banwa, kag amo man ang yara nagaestar sa Kapatagan sang Jezreel may salsalon nga mga karwahi.”

17Si Josue nagsiling sa mga tribo ni Efraim kag ni Manases nga yara sa nakatundan sang Jordan, “Matuod, kadamo gid man sa inyo kag gamhanan gid kamo. Sobra sa isa ka bahin sang duta ang mangin-inyo.

18Ang kabakuloran mangin-inyo. Bisan kagulangan ini, hawanan ninyo ini kag panag-iyahan halin sa pihak tubtob sa pihak. Kon nahanungod sa mga Canaanhon, pagatabugon ninyo sila pa gwa, bisan may mga karwahi sila nga salsalon, kag bisan nga gamhanan sila.”

← Chapter 16 Jump to: Chapter 18 →