Joshua 2

Ilonggo (Maayong Balita nga Biblia (2012))

← Chapter 1 Jump to: Chapter 3 →

1Karon si Josue nagpadala sing duha ka mga espiya sa tago lang halin sa kampo nga yadto sa Sitim. Ginsingganan niya sila, “Kadtoi ninyo kag tan-awa ang duta sang Canaan, kag labi na gid ang siudad sang Jerico.” Gani naglakat sila, kag nakaabot sa siudad kag pagkagab-i didto nagdayon sa balay sang isa ka babayi nga ginahingalanan kay Rahab nga nagabaligya sang iya dungog.

2Ang hari sang Jerico nakabati nga may mga Israelinhon nga nag-abot sadto nga gab-i sa pagpang-espiya sa pungsod.

3Dayon ang hari nagpadala sing isa ka mando sa kay Rahab nga nagasiling: “Ang mga tawo nga nagadayon sa imo balay nag-abot sa pagpang-espiya sa bug-os nga pungsod! Pagwaa sila!”

4Pero gindala sang babayi ang duha ka tawo kag gintago niya sila. Kag nagsabat sia, “Matuod may mga tawo nga nag-abot sa akon balay, pero wala ko mahibal-i kon taga-diin sila.

5Naghalin sila sang madulom na, kag inugsira na sang pwerta sang siudad. Wala ako mag-usisa kon diin sila makadto, pero kon sundon ninyo sila gilayon, malambot ninyo sila.”

6Karon gindala niya ang duha ka mga espiya sa atop, kag gintampukan sila sang mga sanga sang tanom nga ginahimo nga lino nga iya nahantal didto.

7Sang makahalin sa siudad ang mga tinawo sang hari, ang pwerta ginsirahan. Naglakat sila sa pagpangita sang mga espiya tubtob nakalambot sila sa talabukan sang Jordan.

8Sang wala pa makahigda ang mga espiya sa sina nga gab-i, si Rahab nagsaka sa atop

9kag nagsiling sa ila, “Nakahibalo ako nga ang Ginoo naghatag sa inyo sang sini nga duta, kag ang tanan nagakurog sa kahadlok tungod sa inyo.

10Nakabati kami kon paano ginpamala sang Ginoo ang Mapula nga Dagat sa atubang ninyo sang paggwa ninyo sa Ehipto. Nakabati man kami kon paano ang paglaglag ninyo sing bug-os sang duha ka mga hari sang mga Amornon nga amo sanday Sihon kag Og, didto sa sidlangan sang Jordan.

11Sang pagkabati namon sini hinadlukan dayon kami. Ang tagsatagsa nadulaan sing kaisog tungod sa inyo. Ang Ginoo nga inyo Dios amo ang Dios sa langit kag sa duta.

12Karon magsumpa kamo sa akon sa ngalan sang Ginoo nga tatapon ninyo ang akon panimalay, subong nga gintatap ko man kamo, kag hatagi ninyo ako sing mga pagpamatuod sini.

13Luwasa ninyo ang akon amay, iloy, mga utod nga lalaki kag babayi, kag tanan nila nga panimalay! Indi ninyo pagtugoti nga pamatyon kami!”

14Ang mga tawo nagsiling kay Rahab, “Kabay ang Dios magakuha sang amon kabuhi kon indi namon pagtumanon ang amon ginsaad. Kon indi mo pag-ipanugid sa kay bisan sin-o ang amon ginpanghimo, tumanon gid namon ang amon saad sa imo kon mahatag na sang Ginoo ang duta sa amon.”

15Nagaestar si Rahab sa balay nga yara sa kilid sang pader sang siudad, gani gintunton niya sa kalat paagi sa bintana ang mga tawo.

16Nagsiling sia sa ila, “Kadto kamo sa mga bakulod, basi kon makita kamo sang mga tinawo sang hari. Panago kamo didto sa sulod sing tatlo ka adlaw tubtob makabalik sila. Pagkatapos sina, makapadayon na kamo sa inyo dalanon.”

17Ang mga tawo nagsiling sa iya, “Tumanon namon ining saad nga ginpasumpa mo sa amon.

18Amo ini ang imo dapat himuon. Kon salakayon namon ang inyo duta, ihigot ining mapula nga kalat sa imo bintana sa diin gintunton mo kami paidalom. Tipuna sing tingob sa imo balay ang imo amay, iloy, mga utod nga lalaki, kag ang tanan nga panimalay sang imo amay.

19Kon may isa nga maggwa sa imo balay pakadto sa dalan, wala kami sing sala sang iya kamatayon, kag wala kami sing salabton. Pero kon may isa sa sulod sang balay upod sa imo nga mahalitan, mangin-amon ina salabton.

20Pero kon ipanugid mo ang amon ginpanghimo, ti indi kami dapat magtuman sang amon saad sa imo.”

21Kag nagsabat sia, “Sigi, sugot ako.” Dayon ginpalakat niya sila. Sang makahalin na sila, ginhigot niya ang kalat nga mapula sa bintana.

22Nagkadto ang mga espiya sa mga bakulod kag nagpanago, samtang ang mga tinawo sang hari nagpangita sa ila sa tanan nga alagyan sa sulod sang tatlo ka adlaw. Wala nila sila makita, gani nagbalik sila sa Jerico.

23Dayon ang duha ka mga espiya nagdulhog halin sa mga bakulod, nagtabok sa suba, nagbalik pakadto kay Josue, kag nagsugid sa iya sang tanan nga nahanabo.

24Nagsiling sila sa iya, “Napat-od gid namon nga ang Ginoo naghatag sa aton sang bug-os nga duta. Ang tanan nga tawo didto nahadlok sa aton.”

← Chapter 1 Jump to: Chapter 3 →