Joshua 14

Ilonggo (Maayong Balita nga Biblia (2012))

← Chapter 13 Jump to: Chapter 15 →

1Karon amo ini ang kadutaan sa Canaan nga nabaton sang mga Israelinhon. Si Eleazar nga pari, si Josue nga anak ni Nun, kag ang mga pangulo sang mga panimalay sang mga tribo sang Israel nagpamartida sini sa ila.

2Suno sa ginsugo sang Ginoo kay Moises, ang kadutaan sang siyam kag tunga ka mga tribo ginpamartida sa ila paagi sa pagabutgabot.

3Ginhatag na ni Moises ang bahin sang duta sa duha kag tunga ka mga tribo sa sidlangan sang Jordan, pero wala niya paghatagi sing duta ang mga Levinhon.

4Ang mga kaliwat ni Jose ginbahin sa duha ka mga tribo, ang kay Manases kag kay Efraim. Ang mga Levinhon wala sing may nabaton nga bahin sang duta, luas lamang sang mga siudad nga pagaestaran nila, kag ang mga halalban para sa ila mga kahayupan.

5Ginpamartida sang mga Israelinhon ang duta suno sa ginsugo sang Ginoo kay Moises.

6Karon ang pila sang mga tawo sang tribo ni Juda nagkadto kay Josue sa Gilgal. Ang isa sa ila, si Caleb nga anak ni Jefone nga Kenisnon nagsiling kay Josue, “Nahibal-an mo ang ginsiling sang Ginoo kay Moises nga tawo sang Dios didto sa Kades Barnea nahanungod sa imo kag sa akon.

7Kwarenta ka tuig ang akon edad sang si Moises nga alagad sang Ginoo, nagpadala sa akon halin sa Kades Barnea sa pagpang-espiya sang duta. Kag sang makabalik ako, ginsugiran ko sia sang matuod nga nakita naton.

8Pero ang panugid sang mga tawo nga nag-upod sa aton nagpahadlok sa mga Israelinhon, wala sapayan, gintuman ko sing matutom ang Ginoo nga akon Dios.

9Gani si Moises nagsaad sa akon, ‘Tungod kay nagmatutom ka sa pagsunod sa Ginoo nga akon Dios, ikaw kag ang imo kaanakan magabaton sang duta nga imo ginlaktan nga mangin-inyo palanublion?’”

10Nagsiling pa gid si Caleb, “Kag karon, dumdoma lang bala nga kwarentay singko na ka tuig ang nagligad halin sang pagsiling sini sang Ginoo kay Moises. Nagapanglakaton pa sadto ang mga Israelinhon sa desierto, kag ginbuhi pa ako sang Ginoo tubtob karon, suno sa iya ginsaad. Dumdoma lang bala! Otsentay singko na ka tuig ang akon edad,

11kag ang kabakod ko karon, pareho gihapon sadtong adlaw sang pagpadala ni Moises sa akon. Sarang pa ako makaentra sa inaway kag masarangan ko pa ang bisan ano nga hilimuon.

12Gani karon, ihatag sa akon ang kabakuloran nga ginsaad sang Ginoo sa akon sadto nga adlaw sang ang akon mga kaupdanan kag ako nagsugid sang amon nakita. Ginsugiran namon kamo sadto anay nga ang mga higante nga mga Anakimnon yadto didto nga nagaestar sa dalagku nga mga siudad nga nalibutan sang mga pader. Ayhan ang Ginoo magaupod sa akon, kag pagatabugon ko sila suno sa ginsiling sang Ginoo.”

13Ginbendisyunan ni Josue si Caleb nga anak ni Jefone, kag ginhatag sa iya ang siudad sang Hebron nga mangin-iya pagapanag-iyahan.

14Ang Hebron ginapanag-iyahan pa gihapon sang mga kaliwat ni Caleb anak ni Jefone nga Kenisnon, tungod kay gintuman niya sing matutom ang Ginoo nga Dios sang Israel.

15Sadto anay ang ngalan sang Hebron amo ang Kiryat-arba. Si Arba amo ang pinakadaku sa mga Anakimnon. Karon may paghidait na sa duta.

← Chapter 13 Jump to: Chapter 15 →