Matthew 11

Ilonggo (Ang Biblia (1982))

← Chapter 10 Jump to: Chapter 12 →

1Kag sang nakatapus si Jesus sa pagsogo sa iya napulog duha ka gintoton-an, nagtaliwan sia gikan didto sa pagpanudlo kag pagpangwali sa mga banwa nila.

2Karon sang nakabati si Juan sa bilanggoan sang mga buhat sang Cristo, nagtugon sia sa iya mga gintoton-an

3kag nagpamangkot kay Jesus, “Ikaw bala yadtong magakari, ukon magahulat bala kami sing isa pa?”

4Kag si Jesus nagsabat sa ila, “Kadto kamo kag sugiran si Juan sang mga butang nga inyo ginapamatian kag ginatan-aw:

5ang mga bulag nagabaton sang ila itololok kag ang mga piang nagalakat, ang mga aroon nagaayo kag ang mga bungul makabati, kag ang mga minatay ginabanhaw, kag ginawali sa mga imol ang maayong balita.

6Kag bulahan sia nga indi masandad sa akon.”

7Sang naglakat ini sila, nagsugud si Jesus sa pagsiling sa mga kadam-an nahanungud kay Juan: “Ano bala ang gingowa ninyo nga tan-awon sa kamingawan? Isa bala ka tabon-ak nga ginahapayhapay sang hangin?

8Apang ano bala ang gingowa ninyo nga tan-awon? Tawo bala nga nagapanaput sing malahalon? Yari karon, ang mga nagasuklub sing mga panapton nga malahalon yara sa mga balay sang mga hari.

9Apang ngaa bala naggowa kamo? Sa pagtan-aw bala sa isa ka manalagna? Hoo, nagasiling ako sa inyo, kag labi pa sa manalagna.

10Ini sia amo ang natungdan sang nasulat, ‘Yari karon, ginapadala ko ang akon manugbalita sa una nimo, nga magahanda sang imo dalanon sa una nimo.’

11Sa pagkamatuud, nagasiling ako sa inyo, sa mga nagkalatawo sa mga babayi wala sing naglutaw nga daku pa kay Juan Bautista; apang ang labing diotay sa ginharian sang langit daku pa sa iya.

12Kutub sa mga adlaw ni Juan Bautista tubtub karon ang ginharian sang langit nagaantus sang palugus, kag ang mga malugus nagaagaw sini sa pakusug.

13Kay ang tanan nga manalagna kag ang kasogoan nagpanagna tubtub kay Juan;

14kag kon buut kamo magbaton sini, sia amo si Elias nga magakari.

15Ang may mga idulungug sa pagpamati, magpamati.

16“Apang sa ano ko bala ipaangay ini nga kaliwatan? Ini kaangay sang kabataan nga nagalingkod sa mga balaligyaan nga nagapanawag sa ila kaupdanan,

17‘Ginlantoyan namon kamo, kag wala kamo magsaut; nagpanalabiton kami, kag wala kamo magpanampok sa dughan.’

18Kay nagkari si Juan nga wala nagakaon ukon nagainum, kag nagasiling sila, ‘May yawa sia’;

19nagkari ang Anak sang tawo nga nagakaon kag nagainum, kag nagasiling sila, ‘Yari karon, ang tawo nga mahakug kag palainum sing alak, abyan sang mga manugsukot sang buhis kag sang mga makasasala!’ Apang ang kaalam ginapakamatarung sang iya mga binuhatan.”

20Niyan nagsugud sia sa pagsabdong sang mga banwa nga ginhimoan sang kalabanan sang iya mga buhat nga gamhanan, kay wala maghinulsul sila.

21“Kailo ka, Corazin! kailo ka, Betsaida! kay kon sa Tiro kag sa Sidon nahimo ang mga buhat nga gamhanan nga ginhimo sa inyo, dugay na kuntani nga naghinulsul sila sa panapton nga sako kag sa abo.

22Apang ako nagasiling sa inyo, magahaganhagan pa sa Tiro kag sa Sidon sa adlaw sang paghukom sang sa inyo.

23Kag ikaw, Capernaum, bayawon ka bala tubtub sa langit? Magausmud ka tubtub sa Hades. Kay kon sa Sodoma nahimo ang mga buhat nga gamhanan nga ginhimo sa imo, nabilin kuntani sia tubtub karon nga adlaw.

24Apang ako nagasiling sa imo nga magahaganhagan pa sa duta sang Sodoma sa adlaw sang paghukom sang sa imo.”

25Sa sadtong tion si Jesus nagsiling, “Nagapasalamat ako sa imo, O Amay, Ginoo sang langit kag duta, kay ginlipdan mo ini nga mga butang sa mga maalam kag sa mga mahinangponon kag ginpahayag mo sa kabataan;

26hoo, Amay, kay amo ini ang nahamut-an sa imo itololok.

27Ang tanan nga butang gintugyan sa akon sang akon Amay; kag sa Anak wala sing nakakilala luwas ang Amay, kag sa Amay wala sing nakakilala luwas ang Anak kag sa bisan kay sin-o nga nahamut-an sang Anak nga ipahayag ang Amay.

28Kari sa akon, tanan kamo nga ginabudlayan kag ginabug-atan, kag papahuwayon ko kamo.

29Itakud ang akon gota sa inyo, kag magtoon kamo sa akon; kay ako mapainubuson kag malolo sa tagiposoon, kag makakita kamo sing kapahuwayan sa inyo mga kalag.

30Kay ang akon gota mahulas, kag ang akon lulan mamag-an.”

← Chapter 10 Jump to: Chapter 12 →