Matthew 24

Ilonggo (Ang Biblia (1982))

← Chapter 23 Jump to: Chapter 25 →

1Naghalin si Jesus sa templo kag nagalakat, sang nagpalapit ang iya mga gintoton-an sa pagpakita sa iya sang mga balay sang templo.

2Apang nagsabat sia sa ila, “Wala ninyo bala makita ining tanan nga butang? Sa pagkamatuud, nagasiling ako sa inyo, wala sing mabilin diri nga isa ka bato sa ibabaw sang isa, nga indi malumpag.”

3Sang sia naglingkod sa Bukid sang mga Olivo, nagpalapit sa iya sing pahain ang mga gintoton-an, nga nagasiling, “Isugid sa amon, san-o bala mahanabu ini, kag ano bala ang tanda sang imo pagkari kag sang katapusan sang panuigon?”

4Kag si Jesus nagsabat sa ila, “Andam kamo nga walay tawo nga magpatalang sa inyo.

5Kay madamu ang magakari sa akon ngalan, nga nagasiling, ‘Ako ang Cristo,’ kag magapatalang sang madamu.

6Kag makabati kamo sing mga inaway kag mga kinonokono sang mga inaway; talupangda ninyo nga indi kamo magkalalisang; kay ini kinahanglan nga mahanabu, apang indi pa ang katapusan.

7Kay ang pungsud magatindug batok sa pungsud, kag ang ginharian batok sa ginharian, kag may mga tiggulutum kag mga linog sa nagakalainlain nga mga duug:

8tanan ini pamuno lamang sang mga kasakit.

9Niyan itugyan kamo nila sa kangitngitan, kag pamatyon kamo; kag dumtan kamo sang tanan nga kapungsuran bangud sa akon ngalan.

10Kag niyan masandad ang madamu, kag magatinugyanay sila, kag magadinumtanay ang isa sa isa.

11Kag magalutaw ang madamung dimatuud nga manalagna kag magapatalang sang madamu.

12Kag bangud nga ang kalautan magabuad, ang gugma sang kalabanan magabugnaw.

13Apang ang nagapadayon tubtub sa katapusan maluwas.

14Kag iwali ining maayong balita sang ginharian sa bug-os nga kalibutan, subong nga saksi sa tanan nga kapungsuran; kag ugaling magaabut ang katapusan.

15“Busa kon makita ninyo ang makamulusmus nga pagtampalas nga ginpamolong ni Daniel nga manalagna, nga nagatindug sa duug nga balaan (ang nagabasa maghangup),

16niyan ang mga yara sa Judea magpalagyo sa mga bukid;

17ang sa atop dili magpanaug sa pagkuha sang mga butang nga yara sa iya balay;

18kag ang sa latagon dili magbalik sa pagkuha sang iya kunup.

19Apang kailo ang mga nagadala kag ang mga nagapasoso sa sadtong mga adlaw!

20Pangamuyo kamo nga ang inyo pagpalagyo indi mahanabu sa tigtulugnaw ukon sa adlaw nga inugpahuway.

21Kay niyan magaabut ang dakung kangitngitan, nga wala pa sing subong nga nahanabu kutub sa ginsuguran sang kalibutan tubtub karon, wala, kag indi na gid mahanabu.

22Kag kon wala mapalip-ot yadtong mga adlaw, wala kuntani sing tawo nga maluwas; apang bangud sa mga pinili palip-oton yadtong mga adlaw.

23Niyan kon sin-ong tawo magsiling sa inyo, ‘Tan-awa ninyo, yari ang Cristo!’ ukon ‘Yadto sia!’ dili kamo magtoo sini.

24Kay magalutaw ang dimatuud nga mga Cristo kag dimatuud nga mga manalagna kag magapakita sila sing dalagkung talandaan kag kalatingalahan, agud nga mapatalang, kon mahimo, bisan ang mga pinili.

25Yari karon, nasiling ko nga daan ini sa inyo.

26Busa, kon magsiling sila sa inyo, ‘Yari karon, yara sia sa kamingawan,’ dili kamo magkadto; kon magsiling sila, ‘Yari karon, yara sia sa nasulud nga mga hulut, dili kamo magtoo sini.

27Kay subong sang kilat nga nagaidlab sa sidlangan kag makita tubtub sa katundan, amo man ang pag-abut sang Anak sang tawo.

28Bisan diin ang lawas nga patay, didto magatipon sing tingub ang mga aguila.

29“Sa gilayon sa tapus ang kangitngitan sadtong mga adlaw ang adlaw padulmun, kag ang bulan indi maghatag sang iya kapawa, kag ang mga bitoon magakalaholog gikan sa langit, kag ang mga kagamhanan sang mga langit uyugon;

30niyan magapahayag ang tanda sang Anak sang tawo sa langit, kag niyan magakasubu ang tanan nga kabikahan sa duta, kag makita nila nga nagakari ang Anak sang tawo sa ibabaw sang mga panganud sa langit nga may gahum kag daku nga himaya;

31kag magapadala sia sang iya mga manugtunda sa mabaskug nga tonog sang budyong, kag magatipon sila sang iya nga pinili gikan sa apat ka hangin, kutuo sa isa ka ukbung sang langit tubtub sa isa.

32“Karon sa higuera tumoon kamo sang paanggid sini: kon ang iya sanga manglumbay kag manghumlad ang iya mga dahon, mahibaloan ninyo nga malapit ang tingadlaw.

33Amo man, kon makita ninyo tanan ining butang, mahibaloan ninyo nga sia malapit, sa mga gawang na.

34Sa pagkamatuud, nagasiling ako sa inyo, ining kaliwatan indi magtaliwan tubtub nga tanan ining butang matuman.

35Ang langit kag duta magataliwan, apang ang akon mga polong indi magtaliwan.

36“Apang nahanungud sadtong adlaw kag takna wala sing nakahibalo, bisan pa ang mga manugtunda sang langit, ukon ang Anak, kondi ang Amay lamang.

37Subong sang mga adlaw ni Noe, amo man ang pag-abut sang Anak sang tawo.

38Kay subong sa sadtong mga adlaw sa wala pa ang anaw sila nagakaon kag nagainum, nagapangasawa kag nagapamana, tubtub sa adlaw nga nagsulud si Noe sa arca,

39kag sila wala makahibalo tubtub nga nag-abut ang anaw kag nagdala sa ila nga tanan, amo man ang pag-abut sang Anak sang tawo.

40Niyan may duha ka tawo sa latagon; ang isa kuhaon kag ang isa bayaan.

41Duha ka babayi magagaling sa galingan; ang isa kuhaon kag ang isa bayaan.

42Busa bantay kamo, kay wala kamo makahibalo kon sa ano nga adlaw magakari ang inyo Ginoo.

43Apang kilalaha ninyo ini, nga kon ang agalon sang panimalay nakasayud sa ano nga hugna sang pulaw magaabut ang makawat, magapulaw sia kuntani kag indi sia magtugut nga guhaban ang iya balay.

44Busa maghanda man kamo; kay sa takna nga wala ninyo paghunahunaa magakari ang Anak sang tawo.

45“Sin-o bala niyan ang ulipon nga matutum kag mainandamon, nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion?

46Bulahan yadtong ulipon nga kon mag-abut ang iya agalon masapwan sia nga nagahimo sing subong.

47Sa pagkamatuud, nagasiling ako sa inyo, nga padumalahon sia niya sa tanan niya nga pagkabutang.

48Apang kon yadtong ulipon nga malaut magsiling sa iya tagiposoon, ‘Ang akon agalon nagapalantang,’

49kag magsugud sa pagpamakul sa mga masigkaulipon niya, kag magkaon kag mag-inum kaupud sang mga palahobog,

50ang agalon sadtong ulipon magaabut sa adlaw nga wala niya pagpaabuta kag sa takna nga wala niya mahibaloi,

51kag utdon niya sia, kag hatagan sang iya bahin upud sang mga salimpapaw; didto ang mga tawo magahibi kag magabagrut sang ila mga ngipon.

← Chapter 23 Jump to: Chapter 25 →