Matthew 12 — Ilonggo (Ang Biblia (1982))

1Sa sadtong tion sa adlaw nga inugpahuway nag-agi si Jesus sa mga uma sang uyas; ang iya mga gintoton-an gingutum, kag nagsugud sila sa pagpangutul sing mga uhay kag sa pagkaon.

2Apang ang mga Fariseo, sang nakita nila ini, nagsiling sa iya, “Yari karon, ang imo mga gintoton-an nagahimo sang indi tugut nga pagbuhaton sa adlaw nga inugpahuway.”

3Nagsiling sia sa ila, “Wala bala ninyo mabasahi ang ginhimo ni David, sang gingutum sia, kag ang mga upud niya:

4paano nga nagsulud sia sa balay sang Dios kag nagkaon sang tinapay nga pahayag sa Dios, nga indi tugut sa iya sa pagkaon ukon sa mga kaupud niya, kondi sa mga sacerdote lamang?

5Ukon wala bala ninyo mabasahi sa kasogoan nga sa adlaw nga inugpahuway ang mga sacerdote sa templo nagapasipala sang adlaw nga inugpahuway, kag dimalinapason sila?

6Ako nagasiling sa inyo, ang isa nga daku pa sa templo yari diri.

7Kag kon nahibaloan ninyo kon ano ang kahologan sini, ‘Buut ko ang kalooy, kag indi ang halad, wala ninyo kuntani mapakamalaut ang mga dimalinapason.

8Kay ang Anak sang tawo ginoo sa adlaw nga inugpahuway.”

9Kag nagtaliwan sia didto, kag nagsulud sa sinagoga nila.

10Kag yari karon, may tawo nga itus sing kamut. Kag agud nga masumbung nila sia, nagpamangkot sila sa iya, “Tugut bala ang pagpang-ayo sa adlaw nga inugpahuway?”

11Nagsabat sia sa ila, “Sin-o bala ang tawo sa inyo, nga may isa ka carnero kag kon ini maholog sa boho sa adlaw nga inugpahuway, indi bala niya kaptan kag batakon pa gowa?

12Daw ano ka mahal pa ang tawo sa carnero! Busa tugut ang paghimo sing kaayohan sa adlaw nga inugpahuway.”

13Niyan nagsiling sia sa tawo, “Untaya ang imo kamut.” Kag gin-untay niya ini, kag naulian ini, subong sang isa.

14Apang naggowa ang mga Fariseo kag nagsinapul batok sa iya, kon paano nga malaglag nila sia.

15Sang nahibaloan ini ni Jesus, naglikaw sia gikan didto. Kag madamu ang nagsonod sa iya, kag gin-ayo niya sila tanan,

16kag gintugnan sila nga indi nila pag-ipakilala sia.

17Ini sa pagtuman sang ginpamolong ni Isaias nga manalagna:

18“Yari karon, ang akon alagad nga ginpili ko, ang akon hinigugma nga nahamut-an sang akon kalag. Ibutang ko sa iya ang akon Espiritu, kag sia magapahayag sing paghukom sa mga Gentil.

19Indi sia magabais ukon magasinggit, kag bisan sin-o indi makabati sang iya tungug sa mga dalan;

20ang tabon-ak nga basag indi niya pagbalion ukon ang pabilo nga nagapuug pagpalongon, tubtub nga iya madala ang katarungan sa pagdaug;

21kag sa iya ngalan magalaum ang mga Gentil.”

22Niyan gindala sa iya ang isa nga bulag kag apa nga may yawa kag gin-ayo niya sia, sa bagay nga ang apa nakahambal kag nakakita.

23Kag ang tanan nga katawohan naorongan, kag nagpamangkot, “Amo bala ini ang Anak ni David?”

24Apang sang nabatian ini sang mga Fariseo nagsiling sila, “Ining tawo wala nagasobol sang mga yawa, kondi paagi kay Beelzebub nga principe sang mga yawa.”

25Sang nahibaloan ni Jesus ang ila mga hunahuna, nagsiling sia sa ila, “Ang tagsa ka ginharian nga napihak batok sa iya kaugalingon mamusmus, kag ang tagsa ka banwa ukon panimalay nga napihak batok sa iya kaugalingon indi magtindug;

26kag kon si Satanas nagasobol kay Satanas, napihak sia batok sa iya kaugalingon; niyan paano bala ang pagtindug sang iya ginharian?

27Kag kon ako paagi kay Beelzebub nagasobol sang mga yawa, paagi kay sin-o bala nagasobol sa ila ang inyo mga anak? Busa manginhukom ninyo sila.

28Apang kon paagi sa Espiritu sang Dios ako nagasobol sang mga yawa, niyan ang ginharian sang Dios nag-abut na sa inyo.

29Ukon paano bala ang pagsulud sang isa ka tawo sa balay sang makusug nga tawo kag pag-ati sang iya pagkabutang, kon indi anay niya paggapuson ang makusug? Niyan ugaling atihon niya ang iya balay.

30Ang wala nagaupud sa akon batok sa akon, kag ang wala nagapanipon upud sa akon nagapaaplaag.

31Busa ako nagasiling sa inyo, ang tagsa ka sala kag pasipala mapatawad sa mga tawo, apang ang pasipala batok sa Espiritu indi mapatawad.

32Kag ang bisan sin-o nga magpamolong sing isa ka polong batok sa Anak sang tawo mapatawad ini sa iya; apang ang bisan sin-o nga magpamolong batok sa Espiritu Santo indi mapatawad ini sa iya, bisan karon nga panuigon ukon sa palaabuton.

33“Himoa ninyo nga maayo ang kahoy, kag ang iya bunga maayo; ukon himoa ninyo nga malain ang kahoy, kag ang iya bunga malain; kay ang kahoy makilala sa iya bunga.

34Kamo nga kaliwat sang mga man-ug! paano bala nga kamo, nga malaut, makapamolong sing mga butang nga maayo? Kay sa kabuganaan sang tagiposoon nagapamolong ang baba.

35Ang tawo nga maayo sa iya maayo nga bahandi nagapagowa sing maayo, kag ang tawo nga malaut sa iya malaut nga bahandi nagapagowa sing malaut.

36Ako nagasiling sa inyo, nga ang tagsa ka polong nga wala sing pulus nga ipamolong sang mga tawo, magahatag sila sing husay sini sa adlaw sang paghukom;

37kay bangud sang imo mga polong pakamatarungon ka, kag bangud sang imo mga polong tagudilian ka.”

38Niyan ang pila sang mga escriba kag mga Fariseo nagsabat sa iya, “Manunudlo, buut kami magtan-aw sing tanda gikan sa imo.”

39Apang sia nagsabat sa ila, “Ang isa ka kaliwatan nga malaut kag makilahion nagapangita sing tanda; apang wala sing tanda nga ihatag sa sini kondi ang tanda ni Jonas nga manalagna.

40Kay subong nga si Jonas didto sa tiyan sang isda nga daku sing tatlo ka adlaw kag tatlo ka gab-i, subong man ang Anak sang tawo magapabilin sa alibutud sang duta sing tatlo ka adlaw kag tatlo ka gab-i.

41Sa tion sang paghukom ang mga tawo sa Ninive magatindug upud sining kaliwatan kag magatagudili sini; kay naghinulsul sila bangud sang pagwali ni Jonas, kag yari karon, may isa diri nga daku pa kay Jonas.

42Sa tion sang paghukom ang hara sa Bagatnan magatindug upud sining kaliwatan kag magatagudili sini; kay nagkari sia gikan sa kaukbungan sang duta sa pagpamati sang kaalam ni Salomon; kag yari karon, may isa diri nga daku pa kay Salomon.

43“Kon ang espiritu nga dimatinlo makagowa sa tawo, nagalagaw sia sa mga duug nga walay tubig nga nagapangita sing kapahuwayan, apang wala sia makakita.

44Niyan nagasiling sia, ‘Magabalik ako sa akon balay nga ginhalinan.’ Kag kon makaabut sia makita niya nga wala pagpuy-i, nasilhigan, kag napahamtang sing nagakaigo.

45Niyan nagalakat sia kag nagadala kaupud niya sing iban nga pito ka espiritu nga malaut pa sa iya, kag nagasulud sila kag nagapuyo didto; kag ang kaolihian sadtong tawo manginmalaut pa sang sa nahauna. Amo man ang mahanabu sa sining malaut nga kaliwatan.”

46Sang nagahambal pa sia sa katawohan, yari karon, ang iya iloy kag ang iya mga utud nagtindug sa gowa, nga nagahimulat sa pagpakighambal sa iya. [

47May isa nga nagsiling sa iya, “Ang imo iloy kag ang imo mga utud nagatindug sa gowa, nga nagahimulat sa pagpakighambal sa imo.”]

48Apang sia nagsabat sa nagsugid sa iya, “Sin-o bala ang akon iloy, kag sin-o bala ang akon mga utud?”

49Kag sang gin-untay niya ang iya kamut nayon sa iya mga gintoton-an, nagsiling, “Yari ang akon iloy kag ang akon mga utud!

50Kay ang bisan sin-o nga maghimo sang kabubut-on sang akon Amay nga yara sa langit sia amo ang akon utud nga lalaki, kag utud nga babayi, kag iloy.”