Matthew 8

Ilonggo (Ang Biblia (1982))

← Chapter 7 Jump to: Chapter 9 →

1Sang nagdolhog sia sa bukid, nagsonod sa iya ang daku nga mga kadam-an;

2kag yari karon, nag-abut ang isa ka aroon kag nagyaub sa iya, nga nagasiling, “Ginoo, kon buut mo, ikaw makaayo sa akon.”

3Kag nag-untay si Jesus sang iya kamut kag nagtandug sa iya, nga nagasiling, “Buut ako; mag-ayo ka.” Kag sa gilayon nag-ayo sia sang iya aro.

4Kag si Jesus nagsiling sa iya, “Andam ka nga indi magsugid sa bisan kay sin-o nga tawo; apang kadto ka, ipakita ang imo kaugalingon sa sacerdote, kag maghalad sang dolot nga ginsogo ni Moises, nga pagpamatuud sa katawohan.”

5Sang nakasulud si Jesus sa Capernaum, nagpalapit sa iya ang capitan, nga nagapakilooy sa iya

6kag nagasiling, “Ginoo, ang akon sologoon nagahamyang nga paralitiko sa balay, nga nagaantus sing tama gid.”

7Kag sia nagsiling sa iya, “Makara ako kag ayohon sia.”

8Apang nagsabat ang capitan, “Ginoo, indi ako takus nga magsulud ikaw sa idalum sang akon atop; apang isiling lamang ang polong, kag ang akon sologoon magaayo.

9Kay ako man tawo sa idalum sang pagbulut-an, nga may sakup ako nga mga soldado; kag nagasiling ako sa isa, ‘Kadto,’ kag nagakadto sia, kag sa isa, ‘Kari,’ kag nagakari sia, kag sa akon ulipon, ‘Buhata ini,’ kag ginabuhat niya.”

10Sang pagkabati ni Jesus sini, natingala sia, kag nagsiling sa ila nga nagsonod, “Sa pagkamatuud, nagasiling ako sa inyo, wala ako sing nakita nga subong nga pagtoo bisan pa sa Israel.

11Nagasiling ako sa inyo, nga madamu ang magakari gikan sa sidlangan kag sa katundan kag magalingkod kaupud ni Abraham, ni Isaac, kag ni Jacob, sa ginharian sang langit,

12samtang ang mga anak sang ginharian ipilak sa kadudulman sa gowa; didto ang mga tawo magahibi kag magabagrut sang ila mga ngipon.”

13Kag si Jesus nagsiling sa capitan, “Lakat ka; sono sa imo pagtoo amo ang himoon sa imo.” Kag nag-ayo ang sologoon sa sadtong takna.

14Kag sang nakasulud si Jesus sa balay ni Pedro, nakita niya ang babayi nga ugangan ni Pedro nga nagahigda nga may hilanat;

15gintandug ni Jesus ang iya kamut, kag ang hilanat nagbiya sa iya, kag nagbangon sia kag nag-alagad sa iya.

16Sadtong kahaponon nagdala sila sa iya sang madamu nga may mga yawa; kag ginsobol niya ang mga espiritu sa isa ka polong, kag gin-ayo niya ang tanan nga nagamasakit.

17Ini pagtuman sang ginpamolong ni Isaias nga manalagna, “Sia gid nagkuha sang aton mga kasakitan kag nagdala sang aton mga balatian.”

18Karon sang nakita ni Jesus ang daku nga mga kadam-an sa palibut niya, nagsogo sia sa pagtaliwan pa tabok.

19Kag nagpalapit ang isa ka escriba kag nagsiling sa iya, “Manunudlo, magasonod ako sa imo bisan diin ka makadto.”

20Kag si Jesus nagsiling sa iya, “Ang mga ido nga talonon may mga lungib, kag ang mga pispis sa langit may mga haponan; apang ang Anak sang tawo wala gid sing olonlan sang iya olo.”

21Ang isa pa sang mga gintoton-an nagsiling sa iya, “Ginoo, tuguti ako anay sa pagkadto kag sa paglubung sang akon amay.”

22Apang si Jesus nagsiling sa iya, “Sonod ka sa akon, kag baya-i ang mga patay sa paglubung sang ila kaugalingon nga mga patay.”

23Kag sang nagsakay sia sa sakayan, nagsonod sa iya ang iya mga gintoton-an.

24Kag yari karon, nag-abut ang dakung unus sa dagat, sa bagay nga ang sakayan natap-okan sang mga balud; apang sia katolog.

25Kag nagpalapit sila kag ginpukaw sia, nga nagasiling, “Luwasa kami, Ginoo; nagakalawala kami.”

26Kag nagsiling sia sa ila, “Ngaa bala nagakahadluk kamo, O mga tawo nga diotay sing pagtoo?” Niyan nagbangon sia kag nagsabdong sang mga hangin kag sang dagat; kag may dakung kalinaw.

27Kag ang mga tawo natingala, nga nagasiling, “Ano bala nga tawo ini, nga bisan pa ang mga hangin kag dagat nagatuman sa iya?”

28Kag sang nag-abut sia didto sa tabok, sa duta sang mga taga-Gadara, nagsugata sa iya ang duha nga may mga yawa, nga naggowa sa mga lulubngan, nga lakas kabangis sa bagay nga walay tawo nga makaagi sadtong dalan.

29Kag yari karon, nagsinggit sila, “Ano bala ang labut mo sa amon, O Anak sang Dios? Nagkari ka bala diri sa pagpaantus sa amon sa wala pa ang tion?”

30Karon sa unhan nila may isa ka panong sang madamung babuy nga nagakaon.

31Kag ang mga yawa nagpakilooy sa iya, “Kon imo kami sobolon, ipadala kami sa panong sang babuy.”

32Kag sia nagsiling sa ila, “Lakat.” Gani naggowa sila kag nagsulud sa mga babuy; kag yari karon, ang bug-os nga panong nagdinagoso sing dalidali paidalum sa pil-as pa dagat, kag nagkalamatay sa tubig.

33Ang mga manugbantay sang mga babuy nagpalagyo, kag nagkadto sa banwa kag nagsugid sang tanan, kag sang nahanabu sa may mga yawa.

34Kag yari karon, ang bug-os nga banwa naggowa sa pagsugata kay Jesus; kag sang nakita sia nila, nagpakilooy sila sa iya nga maghalin sia sa ila duug.

← Chapter 7 Jump to: Chapter 9 →