Matthew 18

Ilonggo (Ang Biblia (1982))

← Chapter 17 Jump to: Chapter 19 →

1Sa sadtong takna nagpalapit kay Jesus ang mga gintoton-an nga nagapamangkot, “Sin-o bala ang labing daku sa ginharian sang langit?”

2Kag gintawag niya sa iya ang bata nga diotay, kag ginpatunga sia sa ila,

3kag nagsabat, “Sa pagkamatuud, nagasiling ako sa inyo, kon indi kamo magliso kag manginkaangay sang kabataan, indi kamo nga mas-a makasulud sa ginharian sang langit.

4Ang bisan sin-o nga magpaubus sang iya kaugalingon subong sining bata nga diotay, sia amo ang labing daku sa ginharian sang langit.

5“Ang bisan sin-o nga magbaton sang isa nga subong sining bata nga diotay sa akon ngalan nagabaton sa akon;

6apang ang bisan sin-o nga nagapasandad sa isa sining mga magamay nga nagatoo sa akon, maayo pa sa iya nga bitayan sa liog sing daku nga bato sang galingan kag itunud sia sa kadadalman sang dagat.

7“Kailo ang kalibutan bangud sang mga kabangdanan sa pagkasandad! Kay kinahanglan nga ang mga kabangdanan sa pagkasandad mag-abut, apang kailo yadtong tawo nga paagi sa iya nagaabut ang kabangdanan sa pagkasandad!

8Kag kon ang imo kamut ukon ang imo tiil nagapasandad sa imo, utda ini kag ihaboy; maayo pa sa imo nga magsulud sa kabuhi nga kimpol ukon piang sang sa may duha ka kamut ukon duha ka tiil nga idap-ung sa kalayo nga dayon.

9Kag kon ang imo mata nagapasandad sa imo, lukata ini kag ihaboy; maayo pa sa imo nga magsulud sa kabuhi nga may isa lamang ka mata sang sa may duha ka mata nga idap-ung sa infierno nga kalayo.

10“Andam kamo nga indi magtamay sang isa sining mga magamay; kay nagasiling ako sa inyo nga sa langit ang ila mga manugtunda nagatolok sing dayon sa nawung sang akon Amay nga yara sa langit. [

11Kay ang Anak sang tawo nagkari sa pagluwas sang nadula. ]

12Ano bala sa hunahuna ninyo? Kon ang isa ka tawo may isa ka gatus ka carnero, kag magtalang ang isa sa ila, indi bala niya pagbayaan ang kasiaman kag siam sa mga bakolod kag magkadto sa pagpangita sang nagtalang?

13Kag kon makita niya ini, sa pagkamatuud, nagasiling ako sa inyo, nagakalipay sia bangud sini sing labi pa sadtong sang sa kasiaman kag siam nga wala magtalang.

14Subong man indi kabubut-on sang akon Amay nga yara sa langit nga mawala ang isa sining mga magamay.

15“Kon ang imo utud makasala sa imo, kadto ka kag isugid sa iya ang sayup niya, sa tunga ninyo nga duha lamang. Kon magpamati sia sa imo, nadaug mo ang imo utud.

16Apang kon indi sia magpamati sa imo, dala ka sing isa ukon duha pa, agud nga sa baba sang duha ukon tatlo ka saksi mapalig-on ang tagsa ka polong.

17Kon magpangindi sia sa pagpamati sa ila, isugid mo ini sa iglesia; kag kon magpangindi sia sa pagpamati sa iglesia man, bilangon mo sia nga Gentil kag manugsukot sang buhis.

18Sa pagkamatuud, nagasiling ako sa inyo, bisan anong inyo gapuson sa duta gapuson sa langit, kag bisan ano nga inyo hubaran sa duta hubaran sa langit.

19Liwat nagasiling ako sa inyo, nga kon duha sa inyo maghisugut sa duta nahanungud sa bisan anong butang nga pangayoon nila, ina himoon sa ila sang akon Amay nga yara sa langit.

20Kay diin ang duha ukon tatlo nagatipon sa akon ngalan, yara ako sa tunga nila.”

21Niyan nagpalapit si Pedro kag nagpamangkot sa iya, “Ginoo, makapila bala ang akon utud makasala sa akon, kag mapatawad ko sia? Tubtub bala sa makapito?”

22Si Jesus nagsabat sa iya, “Wala ako nagasiling sa imo tubtub sa makapito, kondi tubtub sa kapitoan ka pito.

23“Busa ang ginharian sang langit kaangay sang isa ka hari nga buut magpakighusay sa iya mga sologoon.

24Sang nakasugud sia sa pagpakighusay, gindala sa iya ang isa nga nakautang sa iya sing napulo ka libo ka talanton;

25kag sanglit nga indi sia kabayad, ang iya agalon nagsogo nga ibaligya sia, upud ang iya asawa kag kabataan kag ang tanan nga iya, kag bayaran ang utang.

26Busa ang sologoon nagluhod, nga nagapakilooy, ‘Ginoo, angan-angana ako, kag bayaran ko ikaw sang tanan.’

27Kag bangud sang kalooy ang agalon sadtong sologoon nagbuhi sa iya kag nagpatawad sa iya sang utang.

28Apang sang naggowa yadtong sologoon, nakita niya ang isa sang iya mga masigkasologoon nga nakautang sa iya sing isa ka gatus ka denario; kag ginkuga niya sia kag nagsiling sia, ‘Bayari ang utang mo.’

29Gani naghapa sa iya tiilan ang iya masigkasologoon kag nagpakilooy sa iya, ‘Angan-angana ako, kag bayaran ko ikaw.’

30Indi sia buut kondi naglakat kag ginsulud sia sa bilanggoan tubtub nga iya mabayaran ang utang.

31Sang pagkakita sang iya mga masigkasologoon sadtong nahimo, nagkalasubu sila sing tama, kag nagkadto kag nag-asoy sa ila agalon sang tanan nga nahimo.

32Niyan ginpatawag sia sang iya agalon kag ginsilingan sia, ‘Ikaw nga malaut nga sologoon! Ginpatawad ko ikaw sadto tanan nga utang kay nagpakilooy ka sa akon;

33kag indi man bala ikaw kuntani magkalooy sa imo masigkasologoon, subong nga ako nagkalooy sa imo?’

34Kag sa kaakig ang iya agalon nagtugyan sa iya sa mga manugbilanggo, tubtub nga iya mabayaran ang tanan niya nga utang.

35Amo man ang himoon sa tagsa sa inyo sang akon Amay nga langitnon, kon indi kamo magpatawad sing tinagiposoon sang inyo utud.”

← Chapter 17 Jump to: Chapter 19 →