Matthew 7

Ilonggo (Ang Biblia (1982))

← Chapter 6 Jump to: Chapter 8 →

1“Dili kamo maghukom, agud indi kamo paghukman.

2Kay sa paghukom nga inyo ginahukom hukman kamo, kag sa talaksan nga ginataksan ninyo takson kamo.

3Ngaa bala ginamulalong mo ang puling nga yara sa mata sang imo utud, apang wala mo pagsapaka ang balayanon nga yara sa imo kaugalingon nga mata?

4Ukon paano bala ang pagsiling mo sa imo utud, ‘Ipakuha sa akon ang puling sa imo mata,’ nga may balayanon sa imo kaugalingon nga mata?

5Salimpapaw, kuhaa anay ang balayanon sa imo kaugalingon nga mata, kag ugaling makakita ka sing maayo sa pagkuha sang puling sa mata sang imo utud.

6“Dili ninyo pag-ihatag sa mga ido ang mga butang nga balaan; ukon pag-ipilak ang inyo mga mutya sa atubangan sang mga babuy, basi pagtasakon sila sang ila mga tiil kag magliso sila kag magkusnit sa inyo.

7“Pangayo, kag kamo hatagan; pangita, kag kamo makakita; panoktok, kag kamo pagabuksan.

8Kay ang tagsatagsa nga nagapangayo nagabaton, kag ang nagapangita makakita, kag ang nagapanoktok pagabuksan.

9Ukon sin-o bala nga tawo sa inyo, nga kon ang iya anak magpangayo sing tinapay, magahatag sa iya sing bato?

10Ukon magpangayo sia sing isda, magahatag sa iya sing man-ug?

11Niyan kon kamo, nga malaut, makahibalo maghatag sing maayo nga mga dolot sa inyo mga anak, daw ano pa gid nga maayo nga mga butang ang ihatag sang inyo Amay nga yara sa langit sa mga nagapangayo sa iya?

12Busa ang tanan nga butang nga buut ninyo nga himoon sang mga tawo sa inyo, himoa man ninyo sa ila; kay amo ini ang kasogoan kag ang mga manalagna.

13“Sulud kamo sa gawang nga makitid; kay masangkad ang gawang kag malapad ang dalan, nga nagapadulong sa kalaglagan, kag madamu ang mga nagasulud sa sini.

14Kay makitid ang gawang kag masiput ang dalan, nga nagapadulong sa kabuhi, kag pila lamang ang nakatultul sa sini.

15“Andam kamo sa mga dimatuud nga mga manalagna, nga nagaabut sa inyo nga nagapanaput sang panapton sang carnero apang sa sulud manunukub nga mga lobo.

16Sa ila mga bunga makilala ninyo sila. Ginatipon bala ang mga uvas gikan sa mga talongon, ukon ang mga higos sa mga ragiwriw?

17Subong man, ang tagsa ka kahoy nga maayo nagapamunga sing maayo nga bunga, apang ang malain nga kahoy nagapamunga sing malain nga bunga.

18Ang maayo nga kahoy indi makapamunga sing malain nga bunga, ukon ang malain nga kahoy sing maayo nga bunga.

19Ang tagsa ka kahoy nga wala nagapamunga sing maayo nga bunga ginapulud kag ginadap-ung sa kalayo.

20Sa amo sa ila mga bunga makilala ninyo sila.

21“Indi ang tagsatagsa nga nagasiling sa akon, ‘Ginoo, Ginoo,’ makasulud sa ginharian sang langit, kondi ang nagahimo sang kabubut-on sang akon Amay nga yara sa langit.

22Madamu ang magasiling sa akon sadtong adlaw, ‘Ginoo, Ginoo, wala bala kami magpanagna sa imo ngalan, kag sa imo ngalan magsobol sang mga yawa, kag sa imo ngalan maghimo sing madamu nga buhat nga gamhanan?’

23Kag niyan pahayagan ko sila, ‘Wala gid ako makakilala sa inyo; palayo sa akon, kamo nga mga manugbuhat sang kalautan.’

24“Busa ang tagsatagsa nga nagapamati sining mga polong ko kag nagatuman sa ila ipaangay sa tawong mainandamon nga nagtukud sang iya balay sa ibabaw sang igang;

25kag nag-ulan, kag nagbaha, kag naghuyup ang kahanginan, kag nagsampi sadtong balay, kag wala ini mapukan, kay natukud ini sa ibabaw sang igang.

26Kag ang tagsatagsa nga nagapamati sining mga polong ko kag wala nagatuman sa ila ipaangay sa tawong buangbuang nga nagtukud sang iya balay sa ibabaw sang balas;

27kag nag-ulan, kag nagbaha, kag naghuyup ang kahanginan, kag nagsampi sadtong balay, kag napukan ini; kag daku ang iya pagkapukan.”

28Kag sang si Jesus nakatapus sining mga polong, ang mga kadam-an natingala sang iya pagtolon-an,

29kay nagpanudlo sia sa ila subong sang isa nga may pagbulut-an, kag indi subong sang ila mga escriba.

← Chapter 6 Jump to: Chapter 8 →