Matthew 21

Ilonggo (Ang Biblia (1982))

← Chapter 20 Jump to: Chapter 22 →

1Kag sang naghinamput sila sa Jerusalem kag nag-abut sa Betfage, sa Bukid sang mga Olivo, niyan nagpadala si Jesus sing duha ka gintoton-an,

2nga nagasiling sa ila, “Kadto kamo sa minoro nga yara sa atubang ninyo, kag sa gilayon makita ninyo ang isa ka asna nga nahigot, kag isa ka polyino kaupud niya; hubara ninyo sila kag dalha sila sa akon.

3Kon may magsiling sa inyo sing bisan ano, magsabat kamo, ‘Ang Ginoo may kinahanglan sa ila,’ kag sa gilayon ipadala niya sila.”

4Ini nahanabu agud nga matuman ang ginpamolong sang manalagna, nga nagasiling,

5“Sugiri ninyo ang babaying anak sang Sion, Yari karon, ang imo hari nagakari sa imo, mapainubuson, kag nagasakay sa asna, kag sa polyino, nga tinday sang asna.”

6Nagkadto ang mga gintoton-an kag naghimo sono sa ginsogo sa ila ni Jesus;

7nagdala sila sang asna kag sang polyino, kag ginhampiloan nila sang ila mga panapton, kag naglingkod sia sa sini.

8Ang kalabanan sang kadam-an naghumlad sang ila mga panapton sa dalan, kag ang iban nag-utud sing mga sanga sang kahoy kag ginyakyak ini sa dalan.

9Kag ang mga kadam-an nga nag-una sa iya kag ang mga nagsonod nagsinggit, “Hosanna sa Anak ni David! Pagdayawon ang nagakari sa ngalan sang Ginoo! Hosanna sa kahitaasan!”

10Kag sang nagsulud sia sa Jerusalem, nagkinagubut ang bug-os nga banwa, nga nagapamangkot, “Sin-o bala ini?”

11Kag ang mga kadam-an nagsabat, “Ini amo ang manalagna nga si Jesus gikan sa Nazaret sang Galilea.”

12Kag si Jesus nagsulud sa templo sang Dios kag ginsobol ang tanan nga nagbaligya kag nagbakal sa templo, kag ginpamaliskad ang mga latok sang mga manugbaylo sang cuarta kag ang mga lingkoran sang mga nagbaligya sing mga salampati.

13Nagsiling sia sa ila, “Nasulat na, ‘Ang akon balay tawgon nga balay nga palangamuyoan’; apang ginahimo ninyo ini nga lungib sang mga buyong. ”

14Kag ang mga bulag kag mga piang nagpalapit sa iya sa templo, kag gin-ayo sila niya.

15Apang sang nakita sang puno nga mga sacerdote kag sang mga escriba ang makatilingala nga mga butang nga iya ginhimo, kag ang kabataan nga nagahulugyaw sa templo, “Hosanna sa Anak ni David!” nagsingkal sila;

16kag nagsiling sila sa iya, “Nabatian mo bala ang ginasiling nila sini?” Si Jesus nagsabat sa ila, “Hoo; wala bala ninyo mabasahi, ‘Sa baba sang kabataan kag sang mga nagasoso gin-aman mo ang himpit nga pagdayaw’?”

17Kag iya sila ginbayaan, kag naggowa sia sa banwa pa Betania kag nagdayon didto.

18Sa kaagahon, sang nagbalik sia sa banwa, gingutum sia.

19Kag sang nakita niya ang higuera sa higad sang dalan nagpalapit sia sa sini, kag wala sia sing nakita sa sini kondi mga dahon lamang. Kag nagsiling sia sa sini, “Wala na gid sing bunga sa imo kutub karon tubtub sa gihapon!” Kag sa gilayon nalaya ang higuera.

20Sang nakita ini sang mga gintoton-an natingala sila, nga nagasiling, “Paano bala nga sa gilayon nalaya ang higuera?”

21Kag si Jesus nagsabat sa ila, “Sa pagkamatuud, nagasiling ako sa inyo, kon may pagtoo kamo kag wala sing pangduhaduha, indi lamang ninyo mahimo ang nahimo sa higuera, kondi bisan pa kon magsiling kamo sa sining bukid, ‘Halin ka kag lukso sa dagat,’ mahimo ina.

22Kag ang bisan ano nga inyo pangayoon sa pangamuyo, mabaton ninyo, kon may pagtoo kamo.”

23Kag sang nakasulud sia sa templo, ang puno nga mga sacerdote kag ang mga tigulang sang katawohan nagpalapit sa iya sang sia nagapanudlo, kag nagpamangkot, “Sa ano bala nga pagbulut-an nagahimo ka sining mga butang, kag sin-o bala ang naghatag sa imo sining pagbulut-an?”

24Si Jesus nagsabat sa ila, “Ako man mamangkot sa inyo sing isa ka pamangkot; kag kon inyo masugid sa akon ang sabat, niyan ako man magasugid sa inyo kon sa ano nga pagbulut-an ginahimo ko ining mga butang.

25Ang bautismo ni Juan, diin bala ini magikan? Sa langit ukon sa mga tawo?” Kag nagbinaisay sila, “Kon magsiling kita, ‘Gikan sa langit,’ magasiling sia sa aton, ‘Ngaa man bala wala kamo magtoo sa iya?’

26Apang kon magsiling kita, ‘Gikan sa mga tawo,’ mahadluk kita sa kadam-an; kay ang tanan nagakabig kay Juan nga manalagna.”

27Gani nagsabat sila kay Jesus, “Wala kami makahibalo.” Sia man nagsiling sa ila, “Indi man ako magsugid sa inyo kon sa ano nga pagbulut-an ginahimo ko ining mga butang.

28“Ano bala sa hunahuna ninyo? Ang isa ka tawo may duha ka anak nga lalaki; kag nagpalapit sia sa nahauna kag nagsiling, ‘Anak ko, kadto ka sa pagpangabudlay karon sa ulubasan.’

29Kag nagsabat sia, ‘Indi ako buut’; apang sang olihi naghinulsul sia kag nagkadto.

30Kag nagpalapit sia sa ikaduha kag nagsiling sing amo man; kag nagsabat sia, ‘Makadto ako, ginoo,’ apang wala magkadto.

31Sin-o bala sa ila nga duha ang naghimo sang kabubut-on sang iya amay?” Nagsabat sila, “Ang nahauna.” Si Jesus nagsiling sa ila, “Sa pagkamatuud, nagasiling ako sa inyo, nga ang mga manugsukot sang buhis kag ang makihilawason nga mga babayi nagasulud sing una sa inyo sa ginharian sang Dios.

32Kay nagkari si Juan sa inyo sa dalan sang pagkamatarung, kag wala kamo magtoo sa iya, apang ang mga manugsukot sang buhis kag ang makihilawason nga mga babayi nagtoo sa iya; kag bisan nakita ninyo ini, wala gid kamo maghinulsul sang olihi kag magtoo sa iya.

33“Pamatii ninyo ang isa pa ka paanggid. May isa ka agalon sang panimalay nga naghimo sing ulubasan, kag ginpalibutan niya sing isa ka habong, kag ginpakutkutan sing linasan sang uvas, kag ginpatindugan sing balantayan, kag ginpaagsahan niya sa mga mangunguma, kag nagpanlakatan sa malayo nga duta.

34Sang malapit na ang panag-on sang patubas, ginpakadto niya ang iya mga ulipon sa mga mangunguma, sa pagbaton sang iya mga patubas;

35kag gindakup sang mga mangunguma ang iya mga ulipon kag ang isa ginbunal, ang isa ginpatay, kag ang isa ginbato.

36Liwat ginpakadto niya ang iban nga mga ulipon, nga madamu pa sa mga nahauna; kag ginhimo nila sa ila ang subong man.

37Sa katapusan ginpakadto niya sa ila ang iya anak, nga nagasiling, ‘Tahoron nila ang akon anak.’

38Apang sang nakita sang mga mangunguma ang anak, nagsinilingay sila, ‘Ini amo ang manunubli; kari kamo, patyon ta sia kag kuhaon ang iya panublion.’

39Kag gindakup nila sia kag ginpahabog sia sa gowa sang ulubasan, kag ginpatay sia.

40Busa kon magkari ang agalon sang ulubasan, ano bala ang himoon niya sadtong mga mangunguma?”

41Nagsabat sila sa iya, “Sia magalaglag nga wala sing kalooy sadtong makalolooy nga mga tawo, kag paagsahan niya ang ulubasan sa iban nga mga mangunguma nga magahatag sa iya sang mga patubas sa ila mga panag-on.”

42Si Jesus nagsiling sa ila, “Wala gid bala ninyo mabasahi sa mga kasulatan: ‘Ang bato nga ginsikway sang mga manunukud amo man ang ginhimo nga pangolo sang pamag-ang; ini nagikan sa Ginoo, kag makatilingala ini sa aton mga mata’?

43Busa nagasiling ako sa inyo, ang ginharian sang Dios kuhaon sa inyo kag ihatag sa pungsud nga makapatubas sing mga bunga sa sini. [

44Kag ang maholog sa sini nga bato mapusa; apang ang bisan sin-o nga mahologan sini, was-agon sia subong sang yab-ok.]”

45Sang nabatian sang mga puno nga mga sacerdote kag sang mga Fariseo ang iya mga paanggid, nahantupan nila nga sia naghambal nahanungud sa ila.

46Apang sang ginhimulatan nila sia sa pagdakup, nahadluk sila sa mga kadam-an, kay ginkabig nila sia nga manalagna.

← Chapter 20 Jump to: Chapter 22 →