Matthew 23

Ilonggo (Ang Biblia (1982))

← Chapter 22 Jump to: Chapter 24 →

1Niyan si Jesus nagpamolong sa mga kadam-an kag sa iya mga gintoton-an,

2“Ang mga escriba kag ang mga Fariseo nagalingkod sa lingkoran ni Moises;

3busa ang bisan ano nga ila ginasiling sa inyo buhata kag bantayi, apang dili ang ila ginabuhat; kay sila nagawali, apang wala nagahimo.

4Sila nagabugkos sing mga lulan nga mabug-at, maiwat nga dalhon, kag ginabutang nila ini sa abaga sang mga tawo; apang indi sila buut magpahulag sini sa ila tudlo.

5Sila nagahimo sang tanan nilang buluhaton agud tan-awon sang mga tawo; kay nagapalapad sila sang ila mga filacteria kag nagapalaba sang ila mga plekos,

6kag nagahingamo sang pinasulabi nga duug sa mga sinalosalo kag sang pinasulabi nga mga lingkoran sa mga sinagoga,

7kag sang mga pag-abiabi sa mga balaligyaan, kag nga pagtawgon Rabbi sang mga tawo.

8Apang dili kamo magpatawag nga Rabbi kay isa lamang ang inyo manunudlo, kag kamo tanan mag-ulutud.

9Kag dili kamo magtawag nga amay bisan kay sin-ong tawo sa duta, kay isa lamang ang inyo Amay, ang yara sa langit.

10Dili kamo magpatawag nga mga agalon, kay isa lamang ang inyo agalon, ang Cristo.

11Ang labing daku sa inyo mangin-alagad ninyo;

12ang bisan sin-o nga magpakataas sang iya kaugalingon paubson, kag ang bisan sin-o nga magpaubus sang iya kaugalingon pataason.

13“Apang kailo kamo, mga escriba kag mga Fariseo, mga salimpapaw! bangud nga ginatakpan ninyo ang ginharian sang langit sa mga tawo; kay wala kamo inyo nagasulud, ukon nagatugut sa mga manugsulud sa pagsulud. [

14Kailo kamo, mga escriba kag mga Fariseo, mga salimpapaw! kay ginahalunhon ninyo ang mga balay sang mga babaying balo, nga sa pamalibad nagahimo kamo sing malawig nga mga pangamuyo; gani magabaton kamo sing labi pa nga katagudilian.]

15Kailo kamo, mga escriba kag mga Fariseo, mga salimpapaw! kay nagalibut kamo sa kadagatan kag sa kadutaan sa paghimo sing isa ka pinaliso, kag kon pinaliso na sia, ginahimo ninyo sia sing makaduha pa nga anak sang infierno subong sa inyo.

16“Kailo kamo, mga tuytuy nga bulag, nga nagasiling, ‘Kon may magsumpa sa templo, ina walay ano man; apang kon may magsumpa sa bulawan sang templo nagapus sia sang iya sumpa.’

17Mga buangbuang nga bulag! Kay diin bala ang labi pa kadaku, ang bulawan ukon ang templo nga nagpabalaan sang bulawan?

18Kag kamo nagasiling, ‘Kon magsumpa sa halaran, ina walay ano man; apang kon may magsumpa sa dolot nga sa ibabaw sang halaran, nagapus sia sang iya sumpa.’

19Mga bulag! Kay diin bala ang labi pa kadaku, ang dolot ukon ang halaran nga nagapabalaan sang dolot?

20Busa ang nagasumpa sa halaran, nagasumpa sa sini kag sa tanan nga butang nga yara sa sini;

21kag ang nagasumpa sa templo, nagasumpa sa sini kag sa nagapuyo sa sini;

22kag ang nagasumpa sa langit, nagasumpa sa trono sang Dios kag sa nagalingkod sa sini.

23“Kailo kamo, mga escriba kag mga Fariseo, mga salimpapaw! kay nagahatag kamo sang ikapulo sang hierbabuena kag sang anis kag sang comino, kag ginbayaan ninyo ang mga pagsolondan sang kasogoan nga dalagku pa, ang katarungan kag ang kalooy kag ang pagtoo; apang ini sila ang dapat ninyo kuntani buhaton, kag dili pagbayaan ang iban.

24Mga tuytuy nga bulag, nga nagasala sang hamlok kag nagahalunhon sang camelyo!

25“Kailo kamo, mga escriba kag mga Fariseo, mga salimpapaw! kay ginatinloan ninyo ang gowa sang tagayan kag sang pinggan, apang sa sulud puno sila sang panglugus kag patuyang.

26Fariseo nga bulag! tinloi anay ang sulud sang tagayan kag pinggan, agud nga ang gowa nila magtinlo man.

27“Kailo kamo, mga escriba kag mga Fariseo, mga salimpapaw! kay kaangay kamo sang mga lulubngan nga ginpaputi, nga sa gowa nagapakita nga matahum, apang sa sulud puno sang mga tul-an sang mga minatay kag sang tanan nga kahigkoan.

28Subong man kamo sa gowa ninyo nagapakita nga matarung sa atubangan sang mga tawo, apang sa sulud puno kamo sang pagkasalimpapaw kag kalautan.

29“Kailo kamo, mga escriba kag mga Fariseo, mga salimpapaw! kay nagahimo kamo sing mga lulubngan sang mga manalagna kag nagapuni kamo sang mga monumento sang mga matarung,

30nga nagasiling, ‘Kon abi nagkabuhi kami sa mga adlaw sang amon mga ginikanan, wala kami kuntani maumid nila sa dugo sang mga manalagna.’

31Gani nagasaksi kamo sa inyo kaugalingon, nga kamo mga anak sang mga nagpamatay sang mga manalagna.

32Niyan pun-a ninyo ang sulukban sang inyo mga ginikanan.

33Mga man-ug, kaliwat sang mga man-ug, paano bala ang paglikaw ninyo sa katagudilian sang infierno?

34Busa ako nagapadala sa inyo sing mga manalagna kag mga maalam kag mga escriba, ang iban sa ila inyo patyon kag ilansang sa cruz, kag ang iban sa ila bunalon ninyo sa inyo mga sinagoga kag hingabuton ninyo sa banwabanwa,

35agud nga mag-abut sa inyo ang tanan nga dugo sang mga matarung nga gin-ula sa duta, kutub sa dugo ni Abel nga matarung tubtub sa dugo ni Zacarias nga anak ni Baraquias, nga ginpatay ninyo sa gin-utlan sang santuario kag sang halaran.

36Sa pagkamatuud, nagasiling ako sa inyo, tanan ini nga butang magaabut sa sining kaliwatan.

37“O Jerusalem, Jerusalem, nga nagapatay sang mga manalagna kag nagabato sang mga pinadala sa imo! Makapila kuntani nga buut ko tiponon ang imo mga anak subong sang isa ka munga nga nagatipon sang iya mga piso sa idalum sang iya mga pakpak, kag indi ka buut!

38Yari karon, ang inyo balay ginabayaan nga mamingaw.

39Kay nagasiling ako sa inyo, kutub karon indi ninyo ako makita, tubtub nga magsiling kamo, ‘Pagdayawon ang nagakari sa ngalan sang Ginoo.’ ”

← Chapter 22 Jump to: Chapter 24 →