Matthew 4

Ilonggo (Ang Biblia (1982))

← Chapter 3 Jump to: Chapter 5 →

1Niyan si Jesus ginpataklad sang Espiritu sa kamingawan nga sulayon sang yawa.

2Kag sang nakapuasa sia sing kap-atan ka adlaw kag kap-atan ka gab-i, sa olihi gingutum sia.

3Kag nagpalapit ang panulay kag nagsiling sa iya, “Kon ikaw ang Anak sang Dios, sogoa ining mga bato nga mangintinapay.”

4Apang nagsabat sia, “Nasulat na, ‘Indi lamang sa tinapay mabuhi ang tawo, kondi sa tagsa ka polong nga nagagowa sa baba sang Dios.’ ”

5Niyan gindala sia sang yawa sa banwang balaan, kag ginpahamtang niya sia sa alibungan sang templo,

6kag nagsiling sa iya, “Kon ikaw Anak sang Dios, lukso ka paidalum; kay nasulat na, ‘Magasogo sia sa iya mga manugtunda sa pagtatap sa imo,’ kag ‘Bayawon ka nila sa ila mga kamut, basi nga makasandad ang imo tiil sa bato.’ ”

7Si Jesus nagsiling sa iya, “Nasulat na man, ‘Dili mo pagsulayon ang Ginoo nga imo Dios.’ ”

8Sa liwat, gindala sia sang yawa sa isa ka bukid nga labing mataas, kag ginpakita sa iya ang tanan nga ginharian sa kalibutan kag ang ila himaya;

9kag nagsiling sia sa iya, “Tanan ini nga butang ihatag ko sa imo, kon magyaub ka kag magsimba sa akon.”

10Niyan si Jesus nagsiling sa iya, “Palayo ka, Satanas! kay nasulat na, ‘Magsimba ka sa Ginoo nga imo Dios kag sa iya lamang mag-alagad ka.’ ”

11Niyan ginbayaan sia sang yawa, kag yari karon, ang mga manugtunda nag-abut kag nag-alagad sa iya.

12Karon sang nabatian ni Jesus nga si Juan gindakup, naglikaw sia pa Galilea;

13kag sang ginbayaan niya ang Nazaret nagkadto sia kag nagpuyo sa Capernaum nga yara sa ubay sang dagat, sa ginsakpan sang Zabulon kag Neftali,

14agud nga matuman ang ginpamolong sang manalagna nga si Isaias:

15“Ang duta sang Zabulon kag ang duta sang Neftali, nayon sa dagat, sa unhan sang Jordan, Galilea sang mga Gentil—

16ang katawohan nga naglingkod sa kadudulman nakakita sing daku nga kapawa, kag sa mga naglingkod sa ginsakpan kag sa landong sang kamatayon ang kapawa nagdilag.”

17Kutub niyan nagsugud si Jesus sa pagwali, nga nagasiling, “Hinulsul kamo, kay ang ginharian sang langit malapit na.”

18Sang nagalakat si Jesus sa ubay sang Dagat sang Galilea, nakita niya ang duha ka mag-utud, si Simon nga ginatawag Pedro kag si Andres nga iya utud, nga nagaladlad sing pukot sa dagat; kay sila mga mangingisda.

19Kag nagsiling sia sa ila, “Sonod kamo sa akon, kag himoon ko kamo nga mga mangingisda sang mga tawo.”

20Sa gilayon ginbayaan nila ang mga pukot kag nagsonod sa iya.

21Kag sang nagapadayon sia gikan didto nakita niya ang iban nga duha ka mag-utud, si Santiago nga anak ni Zebedeo kag si Juan nga iya utud, sa sakayan kaupud ni Zebedeo nga amay nila, nga nagapuna sang ila mga pukot, kag gintawag niya sila.

22Sa gilayon ginbayaan nila ang sakayan kag ang ila amay, kag nagsonod sa iya.

23Kag si Jesus naglibut sa bug-os nga Galilea, nga nagapanudlo sa mga sinagoga nila kag nagawali sang maayong balita sang ginharian kag nagapang-ayo sang tanan nga balatian kag sang tanan nga masakit sa katawohan.

24Gani ang kabantugan niya nagtugub sa bug-os nga Siria, kag gindala sa iya ang tanan nga nagamasakit, ang mga nagaantus sang sarisari nga mga balatian kag mga kasakit, ang may mga yawa, ang mga alabuton, kag ang mga nagakalamatay ang lawas, kag gin-ayo niya sila.

25Kag nagsonod sa iya ang daku nga mga kadam-an gikan sa Galilea kag sa Decapolis kag sa Jerusalem kag sa Judea kag gikan sa tabok sang Jordan.

← Chapter 3 Jump to: Chapter 5 →