Matthew 20

Ilonggo (Ang Biblia (1982))

← Chapter 19 Jump to: Chapter 21 →

1“Kay ang ginharian sang langit kaangay sa agalon sang panimalay nga naglakat sa kaagahon pa sa pagsohol sing mga mamumugon sa iya ulubasan.

2Sang nakapakigsugut sia sa mga mamumugon sa isa ka denario ang adlaw, ginpadala niya sila sa iya ulubasan.

3Kag sang nagalakat sia sa mga ikatlong takna nakita niya ang iban nga nagatindug nga wala sing ginahimo sa balaligyaan;

4kag nagsiling sia sa ila, ‘Kadto man kamo sa ulubasan, kag hatagan ko kamo sang nagakaigo.’ Gani nagkadto sila.

5Sang nagalakat sia liwat sa mga ikan-um kag ikasiam nga takna, naghimo sia sing subong man.

6Kag sa mga ikanapulog isa nga takna naglakat sia kag nakita niya ang iban pa nga nagatindug; kag nagsiling sia sa ila, ‘Ngaa bala nagatindug kamo diri sa bug-os nga adlaw nga wala sing ginahimo?’

7Nagsabat sila sa iya, ‘Kay wala sing nagsohol sa amon.’ Nagsiling sia sa ila, ‘Kadto man kamo sa ulubasan.’

8Kag sang kahaponon na, nagsiling ang agalon sang ulubasan sa iya tulugyanan, ‘Tawga ang mga mamumugon kag bayari sila sang ila mga sohol, sumugud sa mga naolihi, tubtub sa mga nahauna.’

9Kag sang nag-abut yadtong mga ginsoholan sa mga ikanapulog isa nga takna, nagbaton ang tagsa ka tawo sing isa ka denario.

10Karon sang nag-abut ang mga nahauna, naghunahuna sila nga magabaton sing laban; apang ang tagsa ka tawo man nagbaton sing isa ka denario.

11Kag sang ila nabaton ini nagkumud sila batok sa agalon sang panimalay,

12nga nagasiling, ‘Ini nga mga naolihi nagpangabudlay sing isa ka takna lamang, kag ginhimo mo sila nga kaangay sa amon nga nagbatas sang kabug-atan sang adlaw kag sang tagiti nga init.’

13Apang nagsabat sia sa isa sa ila, ‘Abyan, wala ako nagalimolimo sa imo; wala bala ikaw magpakigsugut sa akon sa isa ka denario?

14Kuhaa ang imo, kag lakat ka; akon kabubut-on ang paghatag sa sining naolihi sing subong sa imo.

15Indi bala tugut sa akon ang paghimo sang buut ko sang akon? Ukon malain bala ang imo panolok bangud nga ako maayo?’

16Gani ang mga naolihi mahauna, kag ang mga nahauna maolihi.”

17Kag sang nagtaklad si Jesus sa Jerusalem, gin-upud niya sing pahain ang napulog duha ka gintoton-an, kag sa dalanon nagsiling sia sa ila,

18“Yari karon, nagataklad kita sa Jerusalem; kag ang Anak sang tawo itugyan sa mga puno nga sacerdote kag mga escriba, kag sila magatagudili sa iya sa kamatayon,

19kag magatugyan sa iya sa mga Gentil nga uligyaton kag bunalon kag ilansang sa cruz, kag sa ikatlong adlaw banhawon sia.”

20Niyan nagpalapit sa iya ang iloy sang mga lalaking anak ni Zebedeo, upud ang iya mga anak, kag sang nagayaub sia sa iya nagpangayo sia sing isa ka butang sa iya.

21Kag nagpamangkot sia sa iya, “Ano bala ang buut mo?” Ang babayi nagsabat sa iya, “Isogo nga ining duha ko ka anak maglingkod, ang isa sa imo too kag isa sa wala, sa imo ginharian.”

22Apang si Jesus nagsabat, “Wala ninyo mahibaloi ang inyo ginapangayo. Sarang bala kamo makainum sa tagayan nga akon imnan?” Nagsabat sila sa iya, “Sarang kami.”

23Nagsiling sia sa ila, “Ang akon tagayan maimnan ninyo, apang ang paglingkod sa akon too kag sa akon wala indi akon ang paghatag, kondi ila ini sang gin-amanan sang akon Amay.”

24Kag sang nabatian ini sang napulo, nagsingkal sila sa duha ka mag-utud.

25Apang gintawag ni Jesus sila sa iya kag nagsiling, “Nahibaloan ninyo nga ang mga punoan sang mga Gentil nagapakaginoo sa ila, kag ang ila mga kadalagkuan nagagamit sing pagbulut-an sa ila.

26Indi mangin-subong sini sa inyo; kondi ang bisan sin-o sa inyo nga buut mangindaku mangin-alagad ninyo,

27kag ang bisan sin-o sa inyo nga buut mangin-nahauna mangin-ulipon ninyo;

28subong nga ang Anak sang tawo wala magkari nga alagdon kondi sa pag-alagad, kag sa paghatag sang iya kabuhi nga gawad sang madamu.”

29Kag sang paggowa nila sa Jerico, nagsonod sa iya ang isa ka daku nga kadam-an.

30Kag yari karon, may duha ka bulag nga nagalingkod sa higad sang dalan, sang nakabati sila nga si Jesus nagaligad, nagsinggit, “Ginoo, kalooyi kami, Anak ni David!”

31Ang kadam-an nagsabdong sa ila, nga maghipus sila; apang nagdugang pa gid ang ila pagsinggit, “Ginoo, kalooyi kami, Anak ni David!”

32Kag si Jesus nagdolog kag nagtawag sa ila, kag nagpamangkot, “Ano bala ang buut ninyo nga buhaton ko sa inyo?”

33Nagsabat sila sa iya, “Ginoo, nga makakita ang amon mga mata.”

34Kag si Jesus nga nalooy nagtandug sang ila mga mata, kag sa gilayon nakakita sila kag nagsonod sila sa iya.

← Chapter 19 Jump to: Chapter 21 →