Matthew 22

Ilonggo (Ang Biblia (1982))

← Chapter 21 Jump to: Chapter 23 →

1Kag si Jesus nagpamolong liwat sa ila sa mga paanggid,

2“Ang ginharian sang langit kaangay sa isa ka hari nga naghimo sing sinalosalo sang kasal sa iya anak,

3kag ginpakadto niya ang iya mga ulipon sa pagtawag sang mga inagda sa sinalosalo sang kasal; apang indi sila magkari.

4Liwat ginpakadto niya ang iban nga mga ulipon, nga nagasiling, ‘Sugiri ninyo ang mga inagda, Yari karon, nahanda ko ang akon pagkaon, ang akon mga baka kag mga tinday nga pinatambok naihaw, kag ang tanan nahanda na; kari kamo sa sinalosalo sang kasal.’

5Apang sila wala magsapak sini kag naglakat sila, ang isa sa iya uma, ang isa sa iya palangitan-an,

6kag ang iban nagdakup sang iya mga ulipon, nagpasipala, kag nagpatay sa ila.

7Ang hari naalipungut, kag ginpadala niya ang iya mga mangangaway kag ginlaglag yadtong mga manugpatay kag ginsonog ang banwa nila.

8Niyan nagsiling sia sa iya mga ulipon, ‘Ang kasal handa na, apang ang mga inagda indi takus.

9Busa kadto kamo sa mga dalan, kag ang kapid-an nga makita ninyo agdaha sa sinalosalo sang kasal.’

10Kag yadtong mga ulipon naglakat sa mga dalan, kag gintipon nila ang tanan nga ila nakita, mga malauton kag mga maayo; gani ang sinalosalo napuno sang mga inagda.

11“Apang sang nagsulud ang hari sa pagtan-aw sang mga inagda, nakita niya didto ang isa ka tawo nga walay panapton nga sa kasal;

12kag nagsiling sia sa iya, ‘Abyan, paano bala nga nagsulud ka diri nga walay panapton nga sa kasal?’ Kag naorongan sia.

13Niyan ang hari nagsiling sa mga alagad, ‘Gapusa ninyo sia sa kamut kag sa tiil kag ipilak sa kadudulman nga sa gowa; didto ang mga tawo magahibi kag magabagrut sang ila mga ngipon.’

14Kay madamu ang ginatawag, apang pila lamang ang ginapili.”

15Niyan naghalin ang mga Fariseo kag nagsinapul kon paano nga masiod nila sia sa iya hambal.

16Kag ginpakadto nila sa iya ang ila mga gintoton-an, upud sang mga Herodianhon, nga nagasiling, “Manunudlo, nahibaloan namon nga ikaw maminatud-on, kag nagatudlo ka sang dalanon sang Dios sa kamatooran, kag wala nagapasulabi sa bisan kay sin-o; kay wala ka nagatamud sang pagkahimtang sang mga tawo.

17Busa sugiri kami, ano bala sa hunahuna mo? Tugut bala ang pagbayad sing buhis kay Cesar, ukon indi?”

18Apang si Jesus nakahantup sang kalautan nila, kag nagsiling, “Ngaa bala ginatilawan ako ninyo, kamo nga mga salimpapaw?

19Ipakita sa akon ang cuarta sa buhis.” Kag gindalhan sia nila sing isa ka denario.

20Kag nagpamangkot sia sa ila, “Kay sin-o bala ini dagway kag sinulat?”

21Nagsabat sila sa iya, “Kay Cesar.” Niyan nagsiling sia sa ila, “Busa ihatag kay Cesar ang mga butang nga iya ni Cesar, kag sa Dios ang mga butang nga iya sang Dios.”

22Sang nabatian nila ini, natingala sila; kag ginbayaan sia nila kag naghalin.

23Sa sadtong adlaw nagpalapit sa iya ang mga Saduceo, sila nga nagasiling nga walay pagkabanhaw; kag nagpamangkot sila sa iya,

24nga nagasiling, “Manunudlo, si Moises nagsiling, ‘Kon ang isa ka lalaki mapatay, nga walay mga anak, ang iya utud magpangasawa sang asawa niya, kag magbangon sing mga anak sa iya utud.’

25Karon sa amon may pito ka mag-ulutud nga lalaki; ang nahauna nagpangasawa, kag napatay, kag sa walay mga anak ginbilin niya ang iya asawa sa iya utud.

26Subong man ang ikaduha, kag ang ikatlo, tubtub sa ikapito.

27Sa olihi nila nga tanan, napatay ang babayi.

28Busa sa pagkabanhaw kay sin-o bala sang pito mangin-asawa sia? Kay tanan sila nakapangasawa sa iya.”

29Apang si Jesus nagsabat sa ila, “Nagasayup kamo, kay wala kamo makahibalo sang mga kasulatan ukon sang gahum sang Dios.

30Kay sa pagkabanhaw wala sila nagapalangasawa ukon ginapabanhan, kondi kaangay sang mga manugtunda [sang Dios] sa langit.

31Apang nahanungud sa pagkabanhaw sang mga patay, wala bala ninyo mabasahi ang ginpamolong sang Dios sa inyo,

32‘Ako amo ang Dios ni Abraham, kag ang Dios ni Isaac, kag ang Dios ni Jacob’? Ang Dios indi Dios sang mga patay, kondi sang mga buhi.”

33Kag sang nabatian ini sang mga kadam-an, natingala sila sa iya pagtolon-an.

34Apang sang nakabati ang mga Fariseo nga napahipus niya ang mga Saduceo, nagtilipon sila sing tingub.

35Kag ang isa sa ila, nga mangin-alamon sa kasogoan, nagpamangkot, sa pagtilaw sa iya.

36“Manunudlo, ano bala ang dakung sogo sa kasogoan?”

37Kag nagsabat sia sa iya, “Higugmaa ang Ginoo nga imo Dios sa bug-os mong tagiposoon, kag sa bug-os mong kalag, kag sa bug-os mong hunahuna.

38Ini amo ang daku kag nahaunang sogo.

39Kag ang ikaduha kaangay sini, Higugmaa ang imo isigkatawo subong sa imo kaugalingon.

40Sa sining duha ka sogo natingub ang bug-os nga kasogoan kag ang mga manalagna.”

41Karon sang nagtilipon ang mga Fariseo, si Jesus nagpamangkot sa ila,

42nga nagasiling, “Ano bala sa hunahuna ninyo ang Cristo? Kay sin-o bala sia anak?” Nagsabat sila sa iya, “Anak ni David.”

43Nagsiling sia sa ila, “Paano bala niyan nga si David, nga nadaldal sang Espiritu, nagatawag sa iya nga Ginoo, nga nagasiling,

44‘Ang Ginoo nagsiling sa akon Ginoo, Lingkod ka sa akon too, tubtub nga mapahamtang ko ang imo mga kaaway sa idalum sang imo mga tiil’?

45Kon si David niyan nagatawag sa iya nga Ginoo, paano bala nga sia anak niya?”

46Kag wala sing bisan sin-o nga makasabat sa iya sing isa ka polong, ukon may tawo nga nagpangahas sa pagpamangkot sa iya kutub sadtong adlaw.

← Chapter 21 Jump to: Chapter 23 →