Matthew 14

Ilonggo (Ang Biblia (1982))

← Chapter 13 Jump to: Chapter 15 →

1Sa sadtong tion si Herodes nga tetrarca nakabati sang kabantugan ni Jesus;

2kag nagsiling sia sa iya mga sologoon, “Ini amo si Juan Bautista, nabanhaw sia; kag gani ining mga gahum nagahikot sa iya.”

3Kay ginpadakup ni Herodes si Juan kag ginpagapus sia kag ginpasulud sia sa bilanggoan, tungud kay Herodias, ang asawa ni Felipe nga iya utud;

4kay si Juan nagsiling kay Herodes, “Indi tugut sa imo ang paghuput sa iya. ”

5Kag sang ipapatay niya kuntani si Juan, ginhadlukan sia sang katawohan, kay ginpakamanalagna nila sia.

6Apang sang nag-abut ang adlaw nga natawohan ni Herodes, ang anak nga babayi ni Herodias nagsaut sa tunga nila, kag nagpahamuut kay Herodes,

7bangud sini si Herodes nagtug-an nga may sumpa sa paghatag sa iya sang bisan ano nga iya pangayoon.

8Bangud nga ginsutsut sang iya iloy, sia nagsiling, “Ihatag mo diri sa akon sa bandiha ang olo ni Juan Bautista.”

9Kag ang hari nagkasubu; apang bangud sang iya mga sumpa kag sa ila nga naglingkod kaupud niya sa pagkaon nagsogo sia nga ihatag ini;

10ginpakadtoan niya kag ginpapugutan si Juan sa bilanggoan,

11kag gindala ang iya olo sa bandiha kag ginhatag sa dalaga, kag sia nagdala sini sa iya iloy.

12Kag nag-abut ang mga gintoton-an ni Juan kag nagkuha sang bangkay kag ginlubung nila sia; kag nagkadto sila kag nagbalita kay Jesus.

13Karon sang nabatian ini ni Jesus, naglikaw sia gikan didto nga nagasakay sa sakayan pakadto sa baw-ing nga duug. Kag sang nabatian ini sang mga kadam-an, nagsonod sila sa iya nga nagalakat gikan sa mga banwa.

14Sang nagtakas si Jesus nakita niya ang daku nga kadam-an; kag nalooy sia sa ila, kag gin-ayo niya ang ila mga masakiton.

15Sang kahaponon na, nagpalapit sa iya ang iya mga gintoton-an nga nagasiling, “Ang duug baw-ing, kag ang tion nagligad na; papaulia ang mga kadam-an agud nga magkadto sila sa mga minoro kag magbakal sing pagkaon.”

16Si Jesus nagsiling sa ila, “Indi kinahanglan nga maghalin sila; hatagi sila sing pagkaon.”

17Nagsiling sila sa iya, “May amon kami diri nga lima lang ka tinapay kag duha ka isda.”

18Kag nagsiling sia, “Dalha ninyo sila diri sa akon.”

19Niyan nagsogo sia sa mga kadam-an nga maglingkod sa hilamon; kag sang nagakuha sang lima ka tinapay kag sang duha ka isda naghangad sia sa langit, kag ginpakamaayo, kag gintipiktipik kag ginhatag ang mga tinapay sa mga gintoton-an, kag ang mga gintoton-an naghatag sini sa mga kadam-an.

20Kag nagkalaon sila tanan kag nabusug. Kag ginhimos nila ang napulog duha ka alat nga puno sang mga tinipik nga nabilin.

21Kag ang mga nagkalaon may mga lima ka libo ka lalaki, walay labut ang mga babayi kag kabataan.

22Niyan ginpilit ni Jesus ang iya mga gintoton-an sa pagsakay sa sakayan kag sa pag-una sa iya sa tabok, samtang nga iya ginapapauli ang mga kadam-an.

23Kag sang napapauli niya ang mga kadam-an, nagtaklad sia sing pahain sa mga bakolod sa pagpangamuyo. Sang kahaponon na, isa lamang sia didto,

24apang ang sakayan yadto na sa tunga sang dagat, nga ginabatibati sang mga balud; kay ang hangin sumpung.

25Kag sang ikap-at nga bahin sang pulaw nagkadto sia sa ila, nga nagalakat sa dagat.

26Apang sang nakita sang mga gintoton-an nga nagalakat sia sa dagat, nagkalalisang sila, nga nagasiling, “Bagat ini!” Kag nagsinggit sila sa kahadluk.

27Apang sa gilayon si Jesus nagpamolong sa ila, nga nagasiling, “Pakaisug kamo, ako ini; dili kamo mahadluk.”

28Kag si Pedro nagsabat sa iya, “Ginoo, kon ikaw ina, sogoa ako sa pagkara sa imo sa ibabaw sang tubig.”

29Nagsiling sia, “Kari.” Gani nagpanaug si Pedro sa sakayan kag naglakat sa ibabaw sang tubig sa pagkadto kay Jesus;

30apang sang nakita niya ang hangin nga mabaskug, nahadluk sia, kag sang nagakalugdang nagsinggit sia, “Ginoo, luwasa ako.”

31Sa gilayon gin-untay ni Jesus ang iya kamut kag ginkaptan sia, kag nagsiling sa iya, “Ikaw nga diotay sing pagtoo, ngaa bala nagduhaduha ka?

32Kag sang nakasakay sila sa sakayan, nagtunong ang hangin.

33Kag ang mga yadto sa sakayan nagsimba sa iya, nga nagasiling, “Matuud gid, nga ikaw Anak sang Dios.”

34Kag sang nakatabok sila, nag-abut sila sa duta sa Genezaret.

35Kag sang nakilala si Jesus sang katawohan didto sadtong duug, nagpadala sila sing balita sa palibut sadtong bug-os nga ginsakpan kag gindala nila sa iya ang tanan nga nagmasakit,

36kag nagpakilooy sila sa iya nga makatandug lamang sila sang sidsid sang iya panapton; kag ang kapid-an nga nagtandug nag-ayo.

← Chapter 13 Jump to: Chapter 15 →