Matthew 19

Ilonggo (Ang Biblia (1982))

← Chapter 18 Jump to: Chapter 20 →

1Karon sang nakatapus si Jesus sining mga polong, naghalin sia sa Galilea kag nag-abut sa duug sang Judea sa unhan sang Jordan;

2kag nagsonod sa iya ang dakung mga kadam-an, kag gin-ayo sila niya didto.

3Kag nagpalapit sa iya ang mga Fariseo kag nagtilaw sa iya sa nagpamangkot, “Tugut bala sa isa ka tawo ang pagsikway sang iya asawa sa bisan anong kabangdanan?”

4Nagsabat sia, “Wala bala ninyo mabasahi nga ang nagbuhat sa ila sa ginsuguran nagbuhat sa ila nga lalaki kag babayi,

5kag nagsiling, ‘Bangud sini bayaan sang lalaki ang iya amay kag iloy kag maghiusa sa iya asawa, kag ang duha mangin-isa’?

6Sa bagay nga indi na sila duha kondi isa. Busa ang gintingub sang Dios, dili pagbulagon sang tawo.”

7Nagpamangkot sila sa iya, “Niyan ngaa bala nagsogo si Moises sa paghatag sing sulat sa pagbulagay, kag sa pagsikway sa iya?”

8Nagsabat sia sa ila, “Bangud sang katig-a sang inyo tagiposoon si Moises nagtugut sa inyo sa pagbulag sa inyo mga asawa, apang kutub sa ginsuguran indi amo ini.

9Kag ako nagasiling sa inyo: ang bisan sin-o nga magbulag sa iya asawa, kon indi bangud sa pagpakighilawas, kag magpangasawa sing iban, nagapanglahi [kag ang nagapangasawa sang binulagan nagapanglahi]. ”

10Ang mga gintoton-an nagsabat sa iya, “Kon amo ina ang kahimtangan sang tawo upud sa iya asawa, maayo nga indi magpangasawa.”

11Apang nagsabat sia sa ila, “Indi ang tanan nga tawo makabaton sining polong, kondi yadtong mga ginahatagan sini.

12Kay may mga tawo nga eunuco sa ila pagkatawo, kag may mga eunuco nga ginhimo sang tawo sing subong; kag may mga eunuco nga naghimo sang ila kaugalingon sing subong bangud sa ginharian sang langit. Ang makasarang sa pagbaton sini, magbaton sia.”

13Niyan gindala sa iya ang kabataan agud nga pandongan niya sila sang iya mga kamut kag pangamuyoan. Ang mga gintoton-an nagsabdong sang katawohan;

14apang si Jesus nagsiling, “Tuguti ninyo ang kabataan, kag dili ninyo pagdumilian sa pagkari sa akon; kay ang ginharian sang langit ila sang mga kasubong nila.”

15Kag ginpandongan niya sila sang iya mga kamut kag nagtaliwan didto.

16Kag yari karon, may isa nga nagpalapit sa iya kag nagpamangkot, “Manunudlo [nga maayo], ano bala nga maayo nga butang ang buhaton ko, agud nga akon maangkon ang kabuhi nga walay katapusan?”

17Kag nagsabat sia sa iya, “Ngaa bala nagapamangkot ka sa akon kon ano ang maayo? Isa lamang ang maayo. Kon buut ka magsulud sa kabuhi, bantayi ang mga sogo.”

18Nagpamangkot sia sa iya, “Ang diin bala?” Kag si Jesus nagsabat, “Dili ka magpatay. Dili ka magpanglahi, Dili ka magpangawat, Dili ka magsaksi sing dimatuud,

19Tahora ang imo amay kag ang imo iloy, kag, Higugmaa ang imo isigkatawo subong sang imo kaugalingon. ”

20Ang pamatan-on nagsabat sa iya, “Tanan ining butang ginbantayan ko; ano pa bala ang nakulang sa akon?”

21Si Jesus nagsiling sa iya, “Kon buut ka maghimpit, lakat ka, ibaligya ang imo pagkabutang kag ihatag sa mga imol, kag may bahandi ka sa langit; kag kari ka, sonod sa akon.”

22Sang nabatian sang pamatan-on ang polong naghalin sia nga masinulub-on; kay sia may daku nga mga pagkabutang.

23Kag si Jesus nagsiling sa iya mga gintoton-an, “Sa pagkamatuud, nagasiling ako sa inyo, maiwat sa isa ka manggaranon ang pagsulud sa ginharian sang langit.

24Liwat nagasiling ako sa inyo, nga mahapus pa sa camelyo nga maglapus sa boho sang dagum sang sa isa ka manggaranon nga magsulud sa ginharian sang Dios.”

25Sang nabatian ini sang mga gintoton-an natingala sila sing lakas, nga nagapamangkot, “Niyan sin-o bala ang maluwas?”

26Apang si Jesus nga nagatolok sa ila nagsiling, “Sa mga tawo ini indi mahimo, apang sa Dios ang tanan nga butang mahimo.”

27Niyan nagsabat si Pedro, “Yari karon, ginbayaan namon ang tanan kag nagsonod kami sa imo. Ano bala niyan ang maangkon namon?”

28Si Jesus nagsiling sa ila, “Sa pagkamatuud, nagasiling ako sa inyo, nga sa bag-ong kalibutan, kon ang Anak sang tawo maglingkod sa iya trono nga mahimayaon, kamo nga nagasonod sa akon magalingkod man sa napulog duha ka trono, nga nagahukom sa napulog duha ka kabikahan sang Israel.

29Kag ang tagsatagsa nga nagabiya sang mga balay ukon mga utud nga lalaki ukon mga utud nga babayi ukon amay ukon iloy [ukon asawa] ukon kabataan ukon mga duta, bangud sa akon ngalan, magabaton sing isa ka gatus ka pilo, kag magapanubli sang kabuhi nga walay katapusan.

30Apang madamu ang mga nahauna nga maolihi, kag mga naolihi nga mahauna.

← Chapter 18 Jump to: Chapter 20 →