Matthew 9

Ilonggo (Ang Biblia (1982))

← Chapter 8 Jump to: Chapter 10 →

1Kag sang nagsakay sia sa sakayan nagtabok sia kag nag-abut sa iya kaugalingon nga banwa.

2Kag yari karon, gindala nila sa iya ang tawong paralitiko, nga nagahamyang sa higdaan; kag si Jesus nga nakakita sang ila pagtoo nagsiling sa paralitiko, “Anak, magkalipay ka; ang imo mga sala pinatawad.”

3Kag yari karon, ang pila sang mga escriba nagsiling sa ila kaugalingon, “Ining tawo nagapasipala.”

4Apang si Jesus, nga nakahibalo sang ila mga hunahuna, nagsiling, “Ngaa bala nagahunahuna kamo sing malaut sa inyo mga tagiposoon?

5Kay ano bala ang mahapus pa, ang pagsiling, ‘Pinatawad ang imo mga sala,’ ukon ang pagsiling, ‘Tindug kag maglakat’?

6Apang agud nga inyo mahibaloan nga ang Anak sang tawo may pagbulut-an sa duta sa pagpatawad sang mga sala”—niyan nagsiling sia sa paralitiko—“Tindug ka, kag dalha ang imo higdaan kag magkadto sa imo balay.”

7Kag nagtindug sia kag nagkadto sa iya balay.

8Sang nakita ini sang mga kadam-an, hinadlukan sila, kag naghimaya sa Dios, nga nakahatag sing subong nga pagbulut-an sa mga tawo.

9Kag sang naglabay si Jesus didto, nakita niya ang tawo nga gintawag si Mateo nga nagalingkod sa buluhisan; kag nagsiling sia sa iya, “Sonod ka sa akon.” Kag nagtindug sia kag nagsonod sa iya.

10Kag sang sia naglingkod sa pagkaon sa balay, yari karon, nag-abut ang madamung manugsukot sang buhis kag mga makasasala kag naglingkod upud kay Jesus kag sa iya mga gintoton-an.

11Kag sang nakita ini sang mga Fariseo, nagsiling sila sa mga gintoton-an niya, “Ngaa bala nagakaon ang inyo manunudlo upud sa mga manugsukot sang buhis kag mga makasasala?”

12Apang sang nabatian ini ni Jesus, nagsiling sia sa ila, “Ang mga maayo walay kinahanglan sang manugbulong, kondi ang mga nagamasakit.

13Lakat kag magtoon kon ano ang kahologan sini, ‘Buut ko ang kalooy, kag indi ang halad.’ Kay wala ako magkari sa pagtawag sang mga matarung, kondi sang mga makasasala.”

14Niyan nagpalapit kay Jesus ang mga gintoton-an ni Juan, nga nagapamangkot, “Ngaa bala nagapuasa sing masunsun kami kag ang mga Fariseo, apang ang imo mga gintoton-an wala nagapuasa?”

15Kag si Jesus nagpamangkot sa ila, “Magkasubu bala ang mga inagda sa kasal samtang ang nobyo kaupud nila? Magaabut ang mga adlaw, nga kuhaon sa ila ang nobyo, kag niyan magapuasa sila.

16Kag walay tawo nga nagabutang sing tukap nga bag-o gid sa panapton nga daan kay ang tukap nagabingkas sang panapton, kag nagadandan tapat ang gisi.

17Wala man sing tawo nga nagasulud sang bag-o nga alak sa mga panit nga daan; kay sa iban nga bagay, mabusdik ang mga panit, kag ang alak mauyang, kag ang mga panit malaglag; apang ginasulud nila ang bag-ong alak sa mga panit nga bag-o, kag silang duha nagadugay.”

18Samtang nagahambal pa sia sa ila sining mga butang, yari karon, nag-abut ang isa ka punoan kag nagyaub sa iya, nga nagasiling, “Ang akon anak nga babayi napatay karon gid lamang; apang kari ka kag takdungi sia sang imo kamut, kag mabuhi sia.”

19Kag nagtindug si Jesus kag nagsonod sa iya, upud ang iya mga gintoton-an man.

20Kag yari karon, isa ka babayi nga may tagas sang dugo sa sulud sang napulog duha ka tuig, nagpalapit sa likod niya kag nagtandug sang sidsid sang iya kunup;

21kay nagsiling sia sa iya kaugalingon, “Kon matandug ko lamang ang iya kunup, magaayo ako.”

22Si Jesus nagbalikid, kag sang nakita niya sia nagsiling, “Magkalipay ka, anak; ang imo pagtoo nag-ayo sa imo.” Kag ang babayi nag-ayo gilayon.

23Kag sang nagsulud si Jesus sa balay sang punoan, kag nakita ang mga manuglantoy, kag ang punsok nga nagaginahud,

24nagsiling sia, “Hawa kamo; kay ang dalagita indi patay kondi nagakatolog.” Kag ginkadlawan nila sia.

25Apang sang ginpagowa ang punsok, nagsulud sia kag gin-uyatan ni Jesus sia sa kamut, kag nagbangon ang dalagita.

26Kag naglapnag ang kabantugan sini sa bug-os sadtong duta.

27Kag sang naglabay didto si Jesus, nagsonod sa iya ang duha ka bulag, nga nagasinggit sing mabaskug, “Kalooyi kami, Anak ni David.”

28Sang nagsulud sia sa balay, nagpalapit sa iya ang mga bulag; kag si Jesus nagpamangkot sa ila, “Nagatoo bala kamo nga sarang ako makahimo sini?” Nagsabat sila sa iya, “Hoo, Ginoo.”

29Niyan gintandug niya ang ila mga mata, nga nagasiling, “Sono sa inyo pagtoo amo ang himoon sa inyo.”

30Kag nakakita ang ila mga mata. Kag si Jesus nagtugon sa ila sing matigdas, “Andam kamo nga wala sing tawo nga makahibalo sini.”

31Apang naggowa sila kag ginpalapnag ang kabantugan niya sa bug-os sadtong duta.

32Sang paggowa nila, yari karon, gindala sa iya ang tawong apa nga may yawa.

33Kag sang nasobol na ang yawa, naghambal ang apa; kag natingala ang mga kadam-an, nga nagasiling, “Wala pa gid makita ang subong sa Israel.”

34Apang ang mga Fariseo nagsiling, “Paagi sa principe sang mga yawa nagasobol sia sang mga yawa.”

35Kag si Jesus naglibut sa tanan nga banwa kag mga minoro, nga nagapanudlo sa ila mga sinagoga kag nagawali sang maayong balita sang ginharian, kag nagapang-ayo sang tanan nga bagay sang balatian kag tanan nga bagay sang masakit.

36Sang nakita niya ang mga kadam-an, nalooy sia sa ila, kay ginlapyo sila kag nag-aplaag, subong sang mga carnero nga walay manugpahalab.

37Niyan nagsiling sia sa iya mga gintoton-an, “Sa pagkamatuud ang alanyon bugana apang, pila lamang ang mga mangangani;

38busa pangamuyo kamo sa Agalon sang alanyon agud nga magpadala sia sing mga mangangani sa iya alanyon.”

← Chapter 8 Jump to: Chapter 10 →