Revelation 10

Mien Bible (Thai Script) © Thailand Bible Society, 2007

← Chapter 9 Jump to: Chapter 11 →

1เยีย แอ๋ง ปวัด เต้า เฮ้น ไห่ เญย ฟิน-เมี่ยน เยียม วั้ว ลู่ง เหฌี่ย ต้าย. ม่าย ต๊อ บ๋วน เปว เจี๊ยน นิ่น ฮนั้ง ต้ม ลุย- ด๊าว นอ. นิ่น เญย มฆ้อง กู้ หงว่าย ม่าย ติ้ว จูง. นิ่น เญย เฮมียน ฮนั้ง บะฮนอย นอ. นิ่น เญย เหฒา หย่า ฮนั้ง โต์ว-เดี้ยว.

2นิ่น เญย ปั์ว นั้น เจี๊ยน โซว-หฌุ่น ตอน, เซ คอย ฆอย เญย. นิ่น เญย บย่าว เจี๊ยะ เหฒา ธ้าย ค้อย, หฒาย เจี๊ยะ ธ้าย เบี๋ยน.

3นิ่น เห่ว เฉีย บุย ฮนั้ง เซี่ยน เห่ว นอ, ฌุ่นๆ เญย บุย. เห่ว วั้ว หฒั่น, เสี่ย นอม บะอง ฯฒฯ บุย อ๊ะ.

4เสี่ย นอม บะอง เยี้ยด บุย วั้ว หฒั่น, เยีย อ๋อย เหฌี่ย ปั์ว เฟี้ย มป่า ม่าย เฉีย เยียม วั้ว ทิน-ต้อง ก๊อง, “ไม้ ตู๋ง เฟี้ย ม่าะ! อ๋อย หฒุ เกม เจี๊ยน น้าย เต๋ย เสี่ย นอม บะอง ก๊อง เญย หว่า.”

5เยีย ฯฒฯ ปวัด ธ้าย เจี๊ยน ค้อย, ธ้าย เจี๊ยน เบี๋ยน วั้ว เต้า ฟิน-เมี่ยน ซูง นิ่น เญย บย่าว เจี๊ยะ ปั์ว เฒี้ยง ลู่ง,

6หย่า เฒี้ยง เจี๊ยน เหยียด ลิ์ว เฒี่ยง เจี๊ยน เถา หม่าน โก๊ว หม่าน ต่อย เญย ทิน-ฮู่ง, ต้ง เหฒย ลู่ง เหธา เยียม ลู่ง เญย หม่าน หมวด, เหฒย เดา เหธา เยียม เดา เญย หม่าน หมวด, หย่า เหฒย ค้อย เหธา เยียม ค้อย เญย หม่าน หมวด วั้ว เต้า, โฮ้ว หว่า. ฟิน-เมี่ยน ก๊อง, “ไม้ ตู๋ง แอ๋ง ไง่ อ๊ะ!

7เถา ตะเธี้ยด เต้า ฟิน-เมี่ยน ปย๊ม หฑัด วั้ว หฒั่น, ทิน-ฮู่ง ฯฒฯ โหฒว เหฒียง นิ่น ไม้ แก้ง ปุน บย๋าง ย่าง เญย สี่, ฮนั้ง นิ่น บั๋ว เจี๋ย นิ่น เญย โปว วั้ว เต๋ย โต่ว หว่า เมี่ยน นอ.”

8เยีย ไฮ์ ฒิ่น ด่าง เยียม ทิน-ต้อง ก๊อง หว่า วั้ว หญู่ง เฉีย แอ๋ง เหธา เยีย ก๊อง, “มี่ง เฒาะ ธ้าย เจี๊ยน ค้อย, ธ้าย เจี๊ยน เบี๋ยน วั้ว เต้า ฟิน-เมี่ยน เญย ปั์ว นั้น เจี๊ยน คอย ฆอย วั้ว หฌุ่น โซว ต้าย ม่าะ!”

9เยีย ฯฒฯ มี่ง เถา ฟิน-เมี่ยน โท้ นิ่น ปุน วั้ว หฌุ่น โซว-ตอน เยีย. ฟิน-เมี่ยน บั๋ว เยีย, “เฒาะ มี่ง หญั่น ม่าะ! หญั่น เหฌี่ย, เม่ย เญย กะเซีย ฯฒฯ อิม. มป่า เยียม เม่ย เญย ฑุ่ย เซ ฮนั้ง เมว์ย-ต้อง นอ กาม.”

10เยีย ฯฒฯ เฒาะ เยียม ฟิน-เมี่ยน เญย ปั์ว โซว-หฌุ่น ตอน ต้าย หญั่น. เยียม เยีย เญย ฑุ่ย ไฮ์ ฮนั้ง เมว์ย-ต้อง นอ กาม, มป่า หญั่น เหฌี่ย เถา กะเซีย, กะเซีย ไฮ์ อิม เญย.

11แอ๋ง ม่าย หว่า บั๋ว เยีย, “เม่ย อ๋อย หฒุ โต่ว ทิน-ฮู่ง เญย หว่า ก๊อง เถา ธั้ม-นอม กั๊วะ, ธั้ม-ฝีง เมี่ยน, ธั้ม-หญู่ง หว่า เหธา ธั้ม-เต้า ฮู่ง เตี๋ย.”

← Chapter 9 Jump to: Chapter 11 →