Revelation 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1ฆะฮ้า เยีย ไฮ์ เยียม ทิน-ต้อง ม่าย เฉีย บุย ฮนั้ง เมี่ยน ธั้ม! ไห่ กั๊บ ฒุ้น เญย เฉีย บุย นอ. นิ่น บัว เห่ว เจี๊ยน ก๊อง, “อาเลลูยา! เหฌียว เอน, ฌัง-หล่าง เหธา ชะ เซ บัว เญย ทิน-ฮู่ง เญย.

2นิ่น ตี่ง เมี่ยน เญย ฒุ์ย เซ ตี่ง ตุ๊ เฒียน เญย, แป้ง ฟิม เญย. นิ่น ตี่ง โหฒว โฮล วั้ว เต้า หม่าย ป๊วน-ซิน เญย มเซียะ ตอน เญย ฒุ์ย, เหว่ย หฒุ วั้ว เต้า มเซียะ ตอน หล่ง นิ่น เหฮยียน โหฆ เญย ฒุ์ย โหฒว ปุน ป้าม เกน หว่าย เหฑ่ง หมี่ อ๊ะ. ทิน-ฮู่ง หย่า จ๊าว วิน หลาย วั้ว เต้า มเซียะ ตอน ไต๋ ทิน-ฮู่ง เญย โปว ปุน ฑย้าม เหลี่ยว ธ้วด เญย ฒุ์ย.”

3นิ่น บัว แอ๋ง เห่ว หฑุ่น ก๊อง, “อาเลลูยา! เหฒียะ เจี๊ยน น้าย นอม ต้ม ฒี่ง เญย โต์ว-เสียว อ๋อย เหยียด ลิ์ว ธุดๆ เญย ฝาว เถา หม่าน โก๊ว หม่าน ต่อย.”

4วั้ว เต๋ย หญี่ เหฒียบ เฝย เต้า เมี่ยน โก๋ เหธา วั้ว เต๋ย เปยย เต้า นั่ง เญย กะน้าย ฯฒฯ พัวะ เหฌี่ย ป๋าย เฒว์ย เจี๊ยน ฮู่ง เหว่ย เญย ทิน-ฮู่ง, หย่า ก๊อง, “ อา เมน! อาเลลูยา!”

5แอ๋ง ม่าย เฉีย เยียม ฮู่ง เหว่ย ต้าย ก๊อง, “ทิน-ฮู่ง เญย หฒวัง โปว เหธา เหยียด ฒู้ง ท่าย นิ่น เญย เมี่ยน ไม้ กุ๊น โหฒว โฮล โหฒว ไฝ, อ๋อย หฒุ เธง บัว เญย ทิน-ฮู่ง.”

6เยีย แอ๋ง ไฮ์ เฉีย ฮนั้ง เมี่ยน ธั้ม! เญย กั๊บ ฒุ้น นอ, เซ ฮนั้ง ววม ปวั๊ง โม่ว นอ บุย, หย่า ฮนั้ง ป์อง ต้ม บะอง นอ บุย. เฉีย ก๊อง, “อาเลลูยา! เหว่ย หฒุ บัว เญย เฒี้ยว, เน่น เจี๋ย เญย ทิน-ฮู่ง, ตุ๊ โหฒว ฮู่ง กุ๊น เจี๊ยน อ๊ะ.

7บัว อ๋อย หฒุ เฌียน-โย่ว ออน-เหลาะ, ท่าย นิ่น โหฒว โฮล, เหว่ย หฒุ ปะกี ยู่ง ตอน เญย ธีง-จา-ยิ่น เถา อ๊ะ. นิ่น เญย เซียง-บวั์ง เบ่น เหฒียง เหฑ่ง อ๊ะ.

8ทิน-ฮู่ง ปุน นิ่น ฒุ ธีง-เหฑ่ง เญย, บ๊บ แปะ เญย, ล่าม่า เดีย-หม่วน.” (น้าย ล่าม่า เดีย-หม่วน เซ ทิน-ฮู่ง เญย แปะ ฝีง โหฒว เญย คู้ สี่.)

9วั้ว เต้า ฟิน-เมี่ยน ฯฒฯ ก๊อง บั๋ว เยีย, “อ๋อย หฒุ เฟี้ย เจี๊ยน น้าย เต๋ย หว่า โอ่. ‘ทิน-ฮู่ง เห่ว ต้าย หญั่น ปะกี ยู่ง ตอน เญย ธีง-จา หฮนาง วั้ว เต๋ย หฒะเก้ง ออน-เหลาะ ไห่.’” ฟิน-เมี่ยน แอ๋ง ก๊อง, “น้าย เต๋ย หว่า หฒะเก้ง ทิน-ฮู่ง เญย เฒียน หว่า.”

10เยีย ฯฒฯ พัวะ เหฌี่ย ฟิน-เมี่ยน เญย เหฒา-เฮลน อ๋อย ป๋าย นิ่น มป่า นิ่น ก๊อง, “ไม้ ตู๋ง ฮนั้ง น้าย นอ โหฒว ม่าะ! เยีย เหธา เม่ย แอ๋ง เหธา เม่ย เญย ก๋อ-โย์ว, ต้ง เสียน ว้วน เยซู โหฒว ฒอง-เหฒง ก๊อง เญย เฒียน เล์ย วั้ว เต๋ย, ล่ม ฑ่อย โหฒว โปว. อ๋อย หฒุ ป๋าย ทิน-ฮู่ง ฮนั้ง. เหว่ย หฒุ เถง เยซู โหฒว ฒอง-เหฒง เซ โหฒว โต่ว ทิน-ฮู่ง เญย หว่า เญย ฟิม.”

11เจี๋ย ต้าย เยีย ปวัด ทิน-ต้อง ฆอย, แอ๋ง ม่าย เต้า ม์า-แปะ เยียม วั้ว. เก้ ม์า วั้ว เต้า เญย บั๋ว เห่ว, “เหฒียบ ฒัวะ เญย, เฒียน เญย วั้ว เต้า.” นิ่น แป้ง ฟิม เญย เซี้ยม ฒุ์ย หย่า แป้ง ฟิม เญย เบ๊าะ จ๋า.

12นิ่น เญย มฒีง ฮนั้ง โต์ว-เบียด นอ. มฆ้อง หย่า ด๋ง เจี๊ยน ธั้ม-นอม นี้ง. นิ่น หย่า ม่าย นอม บั๋ว เฟี้ย เจี๊ยน นิ่น เญย ซิน. ธ้วด ลิ์ว นิ่น กั้น ไม้ ม่าย หาย เต้า ฮิ้ว ตุ๊ น้าย นอม บั๋ว.

13นิ่น ฒุ เจี๊ยน เหฒียม เจี๋ย ฑย้าม เญย ต้ม ลุย-ด๊าว. นิ่น เญย บั๋ว เห่ว, “ทิน-ฮู่ง เญย โต์.”

14ทิน-ต้อง เญย หฒวัง แปง เก้ เจี๊ยน ม์า-แปะ, ฒุ เจี๊ยน ธีง-เหฑ่ง เญย, บ๊บ แปะ เญย, ล่าม่า เดีย-หม่วน กัน เจี๊ยน นิ่น มี่ง.

15เยียม นิ่น เญย ฑุ่ย ธ้วด ฒูง ไหล่ ไห่ เญย หฑุ ด๊าว. นิ่น อ๋อย หล่ง น้าย ฒูง หฑุ ด๊าว เบ๊าะ ฮี่ง หม่าน กั๊วะ เญย เมี่ยน. หย่า อ๋อย หล่ง เฮลียะ-ปย๊า กุ๊น นิ่น บัว, หย่า อ๋อย เญว่ย เยียม ฒ่อง เญย เปี๊ยว, ต้ง ปิ๋ว เม่ง เน่น เจี๋ย เญย ทิน-ฮู่ง เฉีย เจี์ย, โน์ว ฒุ์ย วั้ว นอม ฒ่อง.

16นิ่น เญย ต้ม ลุย-ด๊าว เหธา นิ่น เญย ธั่ม ฒุ่ย เฟี้ย เจี๊ยน บั๋ว ก๊อง, “หม่าน ฮู่ง เญย ฮู่ง, หม่าน เฒี้ยว เญย เฒี้ยว.”

17เยีย แอ๋ง ปวัด เต้า ฟิน-เมี่ยน โซ้ว เจี๊ยน บะฮนอย. นิ่น เห่ว เจี๊ยน บุย เญย ก๊อง บั๋ว ได๋ ด๊าม-ลู่ง เญย เหยียด ฒู้ง เหนาะ, “ต้าย ม่าะ! กั๊บ ฒุ้น ต้าย หญั่น ทิน-ฮู่ง เบ่น ต้าย เญย ต้ม ยิ่น หวุ่ย.

18ต้าย หญั่น ฮู่ง เตี๋ย เญย อ๊อ, เหธา แปง-เปย๊ย เญย อ๊อ, เหธา เฮ้น ไห่ เญย เมี่ยน เญย อ๊อ, เหธา ม์า เหธา เก้ ม์า เมี่ยน เญย อ๊อ, เหธา หฒวัง เมี่ยน เญย อ๊อ, ไม้ กุ๊น โหฒว โน่ว ไฟ ไม้ โหฒว โน่ว เญย, โหฒว โฮล ไฟ โหฒว ไฝ.”

19เยีย แอ๋ง ปวัด วั้ว เต้า เฮยี่ย กะน้าย เหธา ป้าม เกน เญย หฒวัง ฮู่ง เหธา นิ่น บัว เญย กวั้นๆ แปง กั๊บ ฒุ้น ต้าย อ๋อย เหธา เก้ เจี๊ยน ม์า วั้ว เต้า เหธา วั้ว เต้า เญย แปง เบ๊าะ จ๋า.

20มป่า เฮยี่ย กะน้าย เหธา วั้ว เต้า จ๊า โต่ว หว่า เมี่ยน, ต้ง เยียม เฮยี่ย กะน้าย เญย หฑะเฮมียน โหฒว บัวะ ฮ่อง เญย จั๋ง-โห่ วั้ว เต้า, หฒุ เฒาะ หมี่ อ๊ะ. เซ น้าย เต้า หล่ง จั๋ง-โห่ ดั๊ว ต้ง ฆ้าบ เจี๊ยน เฮยี่ย กะน้าย เญย เหยียน เหธา ป๋าย เฮยี่ย กะน้าย เญย ฝัง วั้ว เต๋ย. เฮยี่ย กะน้าย เหธา วั้ว เต้า จ๊า โต่ว หว่า เมี่ยน ฯฒฯ หฒุ เลี่ยม นั่ง ฒอย เหฌี่ย เหฒียะ เจี๊ยน ฮู่ง เญย โต์ว-ค้อย.

21เหฒ่ง เหฌี่ย เญย เมี่ยน หฒุ เก้ ม์า วั้ว เต้า เญย ฑุ่ย ธ้วด วั้ว ฒูง หฑุ ด๊าว ฮงะ ไต่ เหฑ่ง หมี่ อ๊ะ. เหยียด ฒู้ง เหนาะ ต้าย หญั่น วั้ว เต๋ย อ๊อ เป๊ว, หฒูง เหฑ่ง.

← Chapter 18 Jump to: Chapter 20 →