Revelation 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1ตะฮม์ เต้า ฟิน-เมี่ยน เยี้ยด ปย๊ม นิ่น เญย หฑัด, เยีย ปวัด นอม เหฮลย เยียม วั้ว ลู่ง ด๊อด เหฌี่ย เดา. น้าย นอม เหฮลย ตุ๊ ฒิบ นอม ฟ้อ-เฒ่ย, ต้ง คอย วั้ว นอม โด ไห่ เญย ค้วด เญย ฟ้อ-เฒ่ย.

2วั้ว นอม เหฮลย คอย ฆอย ค้วด ฯฒฯ ม่าย โต์ว-เสียว ธุดๆ เญย ธ้วด ฮนั้ง ปั๊ว ต้ม! โต์ว ธ้วด เสียว นอ. บะฮนอย เหธา ลู่ง ฯฒฯ หฮมวัง มี่ง หลาย ค้วด ธ้วด เญย เสียว อม เจี๊ยน.

3แอ๋ง ม่าย จ๊บ-เหญ่ย เยียม โต์ว-เสียว ธ้วด ต้าย แอ๋ง เหฌี่ย เถา เดา. จ๊บ-เหญ่ย ตุ๊ ฒิบ ชะ ห่อย เมี่ยน ฮนั้ง เหฒียบ เหญ่ย ด้าง เญย ชะ นอ.

4ม่าย หว่า หัด นิ่น บัว ไม้ ปุน ห่อย เมี้ย ไฟ หาย หญู่ง กะน้าย-หฒวัง ไฟ เดี๋ยง. ขูง ไฮ่ ห่อย ไม้ ม่าย ทิน-ฮู่ง เญย เหยียน ฆ้าบ เจี๊ยน ปย้อง วั้ว เต๋ย เมี่ยน ฮนั้ง.

5จ๊บ-เหญ่ย หย่า ไม้ ตุ๊ ห่อย น้าย เต๋ย เมี่ยน ไต่, ขูง ตุ๊ เหฒย นิ่น บัว ปยา หฮลา เหญียะ ฮนั้ง. เมี่ยน หฒุ จ๊บ-เหญ่ย เหฒย เซ ฮนั้ง หฒุ เหฒียบ เหญ่ย ด้าง ตั๋น วั้ว นอ มุน.

6วั้ว เต๋ย ปยา หฮลา เหญียะ กะญั์ว, เมี่ยน อ๋อย ล์อ เจ๊า ไต่ หย่า ล์อ ไม้ ตุ๊, ไม้ หน่อย ตุ๊ ไต่. นิ่น บัว อ๋อย ไต่ ไห่ อ๊ะ, มป่า ไม้ ไฮ่ ไต่.

7น้าย เต๋ย จ๊บ-เหญ่ย ปวัด ฮนั้ง ฒอง เจี๊ยน มี่ง เบ๊าะ จ๋า เญย ม์า นอ. นิ่น บัว เญย มฆ้อง ด๋ง เจี๊ยน กะน้าย ปวัด ฮนั้ง เจียม-นี้ง นอ. นิ่น บัว เญย เฮมียน หย่า ฮนั้ง เมี่ยน เญย เฮมียน,

8บะเปยย ฮนั้ง มเซียะ ตอน เญย บะเปยย. ญ่า หย่า ฮนั้ง เซี่ยน เญย ญ่า นอ.

9นิ่น บัว เญย หละค้วด ม่าย หญู่ง กะน้าย ปวัง เจี๊ยน ฮนั้ง เฮลียะ-จ๊าบ นอ. ด๊าด หย่า บุย ฮนั้ง ม์า-เธีย ธั้ม เญย ถิว มี่ง เบ๊าะ จ๋า วั้ว นอ บุย.

10นิ่น บัว ม่าย เตว๊ย ฮนั้ง เหฒียบ เหญ่ย ด้าง เญย เตว๊ย นอ, หย่า ไฮ่ ตั๋น เมี่ยน. เซ ต้ง จ๊บ-เหญ่ย เญย เตว๊ย ม่าย ชะ ห่อย เมี่ยน ปยา หฮลา เหญียะ กะญั์ว.

11แอ๋ง ม่าย เต้า ฮู่ง กุ๊น เจี๊ยน นิ่น บัว, เซ ต้ง กุ๊น โด ไห่ วั้ว นอม ค้วด เญย ฟิน-เมี่ยน. นิ่น เญย บั๋ว, ฮิบลู หว่า ก๊อง, อาบัดโดน. กีก หว่า ก๊อง, อาปอลิโยน.

12ตะเยี้ยด หญู่ง หฒุ โค้ว เญย สี่ เจี๋ย หมี่ อ๊ะ. ฆะฮ้า แอ๋ง ม่าย อี หญู่ง หฒุ โค้ว เญย สี่ อ๋อย ธ้วด.

13ตะหลัวะ เต้า ฟิน-เมี่ยน เยี้ยด ปย๊ม นิ่น เญย หฑัด, เยีย ฯฒฯ ไฮ์ ม่าย เฉีย เยียม ทิน-ฮู่ง เญย หฑะเฮมียน วั้ว นอม ปั๊ว ฮูง เญย เจียม-เตี้ย เปยย นอม เก๊าะ เญย จอง ธ้วด.

14น้าย หญู่ง เฉีย ก๊อง บั๋ว ตะหลัวะ เต้า ฟิน-เมี่ยน, “อ๋อย หฒุ ปู๋ง ฆอย เยียม ต้ม ยูเฟติด ด้าย หฒุ โด้ เจี๊ยน วั้ว เต๋ย เปยย เต้า ฟิน-เมี่ยน.”

15น้าย เต๋ย เปยย เต้า ฟิน-เมี่ยน ฯฒฯ ตุ๊ ปู๋ง ฆอย อ๊ะ. นิ่น บัว เซ หลิ่ว เล์ย เหฒียง เลี่ยว เจี๊ยน เถา น้าย นอม เฒี่ยง โห่, น้าย นอม ฮนอย, น้าย นอม หฮลา, น้าย นอม หฮญัง, เหว่ย ไต๋ ป้าม เมี่ยน ปัว โก๊ว เญย เหยียด โก๊ว.

16เยีย ไฮ์ ก๊อง เก้ ม์า เญย แปง ม่าย บัวะ เหฒีย เต้า. เหยียด ฒู้ง ม่าย อี หว่านๆ เต้า.

17เยียม น้าย เต๋ย หิ่น ย่าง เญย สี่ เยีย ปวัด น้าย เต๋ย ม์า เหธา เก้ ม์า เญย แปง ฮนั้ง น้าย นอ. แปง เญย หละค้วด ม่าย เฮลียะ-จ๊าบ ซิ เญย ฮนั้ง โต์ว นอ, บั๊ว เญย ฮนั้ง บั๊ว เญย หละเปย๊ย-จ๋าย, หย่า ยั่ง เญย ฮนั้ง ฮู่ง นอ. ม์า เญย มฆ้อง ฮนั้ง เซี่ยน เญย มฆ้อง หย่า ม่าย โต์ว, ม่าย โต์ว-เสียว, ม่าย ฮู่ง เยียม ม์า เญย ฑุ่ย แป๋ง ธ้วด.

18ฑุ่ย แป๋ง ธ้วด ต้าย เญย โต์ว เหธา โต์ว-เสียว เหธา ฮู่ง โหฒว ปัว หญู่ง เหฒะ หน่าน ปุน ป้าม เมี่ยน หฒุ ไต่ ปัว โก๊ว เญย เหยียด โก๊ว.

19น้าย เต๋ย ม์า เญย ชะ เยียม ม์า เญย ฑุ่ย แป๋ง เหธา เตว๊ย. เตว๊ย เซ ฮนั้ง นาง นอ, หย่า ม่าย มฆ้อง ฯฒฯ หล่ง ห่อย เมี่ยน.

20เหฒ่ง เหฌี่ย เญย ป้าม เมี่ยน, ต้ง ไม้ หฒุ วั้ว เต๋ย เหฒะ หน่าน ไต๋ เญย เมี่ยน, ไม้ ก๊อย เฮญี้ยว กวั่ง กั้น เญย ปั์ว โหฒว ต้าย เญย กะน้าย. นิ่น บัว หธ่อ หฒั่ง เมี้ยน ไฟ ป๋าย หล่ง เจียม, หล่ง ญ่าน, หล่ง ต้ง, หล่ง หละเปย๊ย, หล่ง เดี๋ยง โหฒว ต้าย เญย หมิ่ว-ฝัง, ต้ง ไม้ ไฮ่ หมั่ง ตุ๊ ปวัด, ไม้ ไฮ่ หมวัง ตุ๊ ไฮ์ หย่า ไม้ ไฮ่ ยั่ง เจ๊า เญย หมิ่ว-ฝัง.

21นิ่น บัว ไม้ ก๊อย เฮญี้ยว กวั่ง ไต๋ เมี่ยน เญย สี่, โหฒว ฟ้าด, โหฒว ปวั้ง เลี่ยว เญย สี่, ไฟ โหฒว หฒะ.

← Chapter 8 Jump to: Chapter 10 →