Revelation 6

Mien Bible (Thai Script) © Thailand Bible Society, 2007

← Chapter 5 Jump to: Chapter 7 →

1เยีย หมั่ง ปวัด ปะกี ยู่ง ตอน แมะ ฆอย วั้ว เต๋ย เสี่ย นอม เหยียน เญย ต้าว นอม วั้ว หฒั่น, ฯฒฯ ไฮ์ วั้ว เต๋ย เปยย เต้า นั่ง เญย กะน้าย ม่าย เต้า เห่ว เฉีย โฮล เญย ฮนั้ง บะอง บุย นอ ก๊อง, “ต้าย ม่าะ!”

2เยีย หมั่ง ฯฒฯ ปวัด ม่าย เต้า ม์า-แปะ. เก้ ม์า วั้ว เต้า นั้น เจี๊ยน จวัง-หฒิน หย่า ตุ๊ ฒิบ นอม เหธย ปุน นิ่น เญย นี้ง. นิ่น เก้ ม์า ธ้วด มี่ง ฮี่ง เจี๋ย, แอ๋ง อ๋อย ฮี่ง เจี๋ย.

3ปะกี ยู่ง ตอน แมะ ฆอย ตะเหญ่ย นอม เหยียน วั้ว หฒั่น, เยีย ไฮ์ ตะเหญ่ย เต้า นั่ง เญย กะน้าย ก๊อง, “ต้าย ม่าะ!”

4แอ๋ง ม่าย เต้า ม์า ธ้วด ต้าย, เซ ม์า-ซิ. เก้ ม์า วั้ว เต้า ตุ๊ ฒิบ หลี่ง ปุน ป้าม เกน ไม้ ม่าย ถาย-แป้ง เหว่ย ปุน ป้าม เมี่ยน ล่าน ไต๋ ล่าน. วั้ว เต้า หย่า ตุ๊ ฒิบ ฒูง ต้ม หฑุ ด๊าว.

5ปะกี ยู่ง ตอน แมะ ฆอย ตะฟาม นอม เหยียน วั้ว หฒั่น, เยีย ไฮ์ ตะฟาม เต้า นั่ง เญย กะน้าย ก๊อง, “ต้าย ม่าะ!” เยีย หมั่ง ฯฒฯ ปวัด เต้า ม์า-เจี๊ยะ. เก้ ม์า วั้ว เต้า เญย ปั์ว นั้น แป๋ง เหฑียง.

6เยีย ฯฒฯ ไฮ์ ฮนั้ง ก๊อง หว่า เญย เฉีย เยียม วั้ว เต๋ย เปยย เต้า นั่ง เญย กะน้าย บุด๋ง ก๊อง, “เหยียด ฮนอย เญย กง-ฒิ่น ขูง ม์าย ตุ๊ เหยียด จาน เบย้า วิด เฮม้ย ไฟ ปัว จาน เบย้า บาลี เญย เฮม้ย ฮนั้ง. หย่า ไม้ ตู๋ง โหฒว หว่าย กะลั้น โย่ว เหธา อะหงุ่น ติ๊ว.”

7ปะกี ยู่ง ตอน แมะ ฆอย ตะเฝย นอม เหยียน วั้ว หฒั่น, เยีย ฯฒฯ ไฮ์ ตะเฝย เต้า นั่ง เญย กะน้าย ก๊อง, “ต้าย ม่าะ!”

8เยีย หมั่ง ฯฒฯ ปวัด เต้า ม์า, เซ้ด แมง-หลุน. เก้ ม์า วั้ว เต้า เญย บั๋ว เห่ว, “หฒุ ไต่.” เยี่ยม เกน หย่า กัน เจี๊ยน นิ่น ต้าย. นิ่น บัว ฒิบ หลี่ง หล่ง หฑุ ด๊าว, หล่ง หง่อ หฮนาง เญย สี่, หล่ง ววน-แป่ง, หล่ง ลู่ง เดี๊ย เญย เฮยี่ย ฒ่อย เหมียด ป้าม เกน เปยย โก๊ว เญย เหยียด โก๊ว.

9ปะกี ยู่ง ตอน แมะ ฆอย ตะฮม์ นอม เหยียน วั้ว หฒั่น, เยีย ปวัด เยียม เหฒี่ย-ต้อง กะเดี๊ย ม่าย เมี่ยน เญย ว่วน, เซ ต้ง เหว่ย ฒุ่น ทิน-ฮู่ง เญย โต์ หย่า เหฒียบ ฒัวะ เญย โหฒว ฒอง-เหฒง หฒุ ไต๋ ไต่ วั้ว เต๋ย เมี่ยน เญย ว่วน.

10นิ่น บัว เห่ว เฉีย โฮล เญย ก๊อง, “ธีง-เหฑ่ง เญย, เฒียน เญย, เน่น เจี๋ย เญย เฒี้ยว อ้า! เม่ย เถา หาย หฒั่น หธีง เซี้ยม ป้าม เกน เมี่ยน, จ๊าว วิน ไต๋ เยีย บัว วั้ว เต๋ย เมี่ยน?”

11นิ่น บัว เก๊าะ-เมี่ยน ตุ๊ ฒิบ เต๋ย ต้ม ลุย-ด๊าว แปะ เญย. หย่า ม่าย หว่า บั๋ว นิ่น บัว แอ๋ง ฮิด โต่ว ป๊า, ฒั้ว เถา เหธา นิ่น บัว จวั่ง โหฒว โปว เญย เหธา นิ่น บัว เญย ก๋อ-โย์ว หย่า ฮนั้ง นิ่น บัว นอ หฒุ ไต๋ ไต่ ปวั๊ง โสว โหม่ว.

12ปะกี ยู่ง ตอน แมะ ฆอย ตะหลัวะ นอม เหยียน วั้ว หฒั่น, เยีย หมั่ง ฯฒฯ ปวัด เดา ต์ง ตุ๊ เสย ไห่. บะฮนอย เจี๊ยะ มี่ง ฮนั้ง ยู่ง เจี๊ยะ เปยย ดั๊ด ต้าย เญย เดีย-โธว วั้ว นอ. หฮลา ฯฒฯ ซิ เหฑ่ง ฮนั้ง ฑย้าม นอ.

13ลู่ง หฒั่ง เญย เหฮลย หย่า ด๊อด เหฌี่ย เดา ฮนั้ง ต้ม หฑยาว ป่วน ง่ง หญอ เดี๋ยง ไม้ แก้ง หฒัวะ เญย เปี๊ยว ด๊อด วั้ว นอ.

14ลู่ง หย่า ฮนั้ง โซว-หฌุ่น นอ, หฌุ่น เจี๊ยน, เฒียง หน่าย หมิด เหฑ่ง หมี่ อ๊ะ. นอมๆ บง, นอมๆ ค้อย-โฑว หฒุ ซุ้ย เพียน เหฑ่ง.

15ลู่ง เดี๊ย เญย หฒวัง ฮู่ง เตี๋ย, เหธา โหฒว โฮล เญย, โหฒว แปง-เปย๊ย เญย, ปุ๊ด ฒ่อย เญย, ม่าย หลี่ง เญย, โหฒว โน่ว เญย เหธา ไม้ เฒ์ย โหฒว โน่ว เญย, เหยียด ฒู้ง มี่ง ปี๋ง วั้ว แบ๋ง-ค้วด เหธา บง เญย แบ๋ง-ง่าม.

16นิ่น บัว เห่ว เจี๊ยน ก๊อง บั๋ว บง เหธา หละเปย๊ย, “บาง ดั๊บ เยีย บัว ม่าะ! เถง เยีย บัว ปี๋ง เฒว์ย ฮู่ง เหว่ย วั้ว เต้า เญย เฮมียน, เถง เยีย บัว ไม้ หฒุ ปวั้ง ปะกี ยู่ง ตอน โน์ว เยีย บัว.

17เหว่ย หฒุ ทิน-ฮู่ง เหธา ปะกี ยู่ง ตอน โน์ว ไห่ ฒุ์ย เญย ต้ม ฮนอย เถา อ๊ะ. หาย เต้า ไฮ่ เตี๊ย ตุ๊?”

← Chapter 5 Jump to: Chapter 7 →