Revelation 4

Mien Bible (Thai Script) © Thailand Bible Society, 2007

← Chapter 3 Jump to: Chapter 5 →

1น้าย เต๋ย สี่ เจี๋ย ลิ์ว, เยีย หมั่ง ฯฒฯ ปวัด วั้ว ทิน-ต้อง ม่าย เต้า แก้ง ฆอย เญย. ฒิ่น ด่าง ไฮ์ เฉีย ฮนั้ง หฑัด เญย เฉีย นอ บุย เหธา เยีย ก๊อง หว่า, เยีย อี้ หฒั่น แอ๋ง ไฮ์ วั้ว หญู่ง เฉีย ก๊อง, “ฝาว น้าย ต้าย ม่าะ! เยีย อ๋อย ปุน เม่ย หมั่ง ฆะฮ้า ฮี้ง อ๋อย ธ้วด เญย สี่.”

2เลี่ยม เฒ่ย สีง ลี่ง ต้าย กุ๊น เจี๊ยน เยีย, เยีย ฯฒฯ ปวัด เยียม วั้ว ทิน-ต้อง ม่าย นอม ฮู่ง เหว่ย, แอ๋ง ม่าย เต้า เฒว์ย เจี๊ยน เหว่ย.

3เฒว์ย เจี๊ยน เหว่ย วั้ว เต้า เญย โมว เฒ้ย ปวัด ฮนั้ง แมง-หลัวะ เหธา ซิ เญย หละเปย๊ย-จ๋าย. แอ๋ง ม่าย ติ้ว จูง ฮนั้ง หละเปย๊ย-จ๋าย เดี้ยม แมง เญย, ฑัง เญย, ควีง ก๋อม เหว่ย.

4วั้ว นอม ฮู่ง เหว่ย ม่าย หญี่ เหฒียบ เฝย นอม เหว่ย เว่ย ก๋อม, แอ๋ง ม่าย หญี่ เหฒียบ เฝย เต้า เมี่ยน โก๋ เฒว์ย เจี๊ยน วั้ว เต๋ย เหว่ย. นิ่น บัว ฒุ ลุย- โหว-แปะ, มฆ้อง หย่า ด๋ง เจี๊ยน เจียม-นี้ง.

5เยียม ฮู่ง เหว่ย ป์อง บะหลี่ง ธ้วด หฌับๆ เญย, ม่าย เหฒีย หญู่ง เฉีย บุย, บะอง บุย แพ์งๆ เญย. เยียม เหว่ย หฑะเฮมียน ม่าย เสี่ย ป๊า โต์ว, ต้ง ทิน-ฮู่ง เญย วั้ว เต๋ย เสี่ย นอม ลี่ง ว่วน.

6เยียม เหว่ย หฑะเฮมียน หย่า ปวัด ฮนั้ง หล่ง กี๋ง โหฒว ต้าย เญย ค้อย, ฑังๆ เญย ฮนั้ง กี๋ง-ฒ้าน นอ. วั้ว นอม เหว่ย เญย เปยย ปูง, เหยียด ปูง ม่าย เต้า นั่ง เญย กะน้าย. วั้ว เต๋ย กะน้าย หฑะเฮมียน เหธา ฆะฮ้า แหมง ม่าย มฒีง ปวั๊ง เหฑ่ง.

7ตะเยี้ยด เต้า นั่ง เญย กะน้าย ปวัด ฮนั้ง เซี่ยน นอ. ตะเหญ่ย เต้า ปวัด ฮนั้ง ง่ง โก๊ว. ตะฟาม เต้า ม่าย เฮมียน ฮนั้ง ป้าม เมี่ยน เญย เฮมียน. ตะเฝย เต้า ปวัด ฮนั้ง ได๋ เจี๊ยน เญย ต้ม จ๊าง นอ.

8น้าย เต๋ย เปยย เต้า นั่ง เญย กะน้าย เต้าๆ ม่าย จุ๊ คว้าย ด๊าด. หย่า ม่าย มฒีง ปวั๊ง เหฑ่ง ซิน, เลี่ยม กะญั์ว กะเหญี่ย. นิ่น บัว เฒี่ยง ฮนอย เฒี่ยง ม์วน ไม้ ตี้ง เลี่ยว เญย ป๋าว ฑูง ก๊อง, “ธีง-เหฑ่ง, ธีง-เหฑ่ง, ธีง-เหฑ่ง, เน่น เจี๋ย เญย เฒี้ยว ทิน-ฮู่ง, ต้ง ฒิ่น ด่าง เยียม, อี้ หฒั่น เยียม, ฆะฮ้า อ๋อย ต้าย วั้ว เต้า.”

9หาย หฒั่น น้าย เต๋ย เปยย เต้า นั่ง เญย กะน้าย เธง, ท่าย, แล์ง ฒี่ง เฒว์ย เจี๊ยน ฮู่ง เหว่ย, ต้ง เหยียด ลิ์ว เฒี่ยง เจี๊ยน เถา หม่าน โก๊ว หม่าน ต่อย วั้ว เต้า,

10วั้ว เต๋ย หญี่ เหฒียบ เฝย เต้า เมี่ยน โก๋ ฯฒฯ เกว่ย เหฌี่ย ป๋าย เฒว์ย เจี๊ยน ฮู่ง เหว่ย, ต้ง เหยียด ลิ์ว เฒี่ยง เถา หม่าน โก๊ว หม่าน ต่อย วั้ว เต้า. นิ่น บัว หมวน กั้น เญย นี้ง เฮยี้ยด เจี๊ยน วั้ว นอม เหว่ย เญย หฑะเฮมียน หย่า ป๋าว ฑูง ก๊อง,

11“เยีย บัว เญย เฒี้ยว, เยีย บัว เญย ทิน-ฮู่ง อ้า! เม่ย ผุย ตุ๊ เยีย บัว เธง, ผุย ตุ๊ เยีย บัว ท่าย, ผุย ตุ๊ ฒิบ หลี่ง, เหว่ย หฒุ เม่ย เหฒย หม่าน หมวด ธ้วด ต้าย. หม่าน หมวด เอย เม่ย เญย เอ๋ย ตุ๊ เหฒย ธ้วด ต้าย, หย่า ตุ๊ เฒี่ยง เจี๊ยน.”

← Chapter 3 Jump to: Chapter 5 →