Revelation 16

Mien Bible (Thai Script) © Thailand Bible Society, 2007

← Chapter 15 Jump to: Chapter 17 →

1เยีย แอ๋ง ไฮ์ เฉีย บุย เยียม หฒั่ง ทิน-ฮู่ง เญย เปย๊า ธ้วด ต้าย บั๋ว วั้ว เต๋ย เสี่ย เต้า ฟิน-เมี่ยน, “มี่ง อ๊ะ. เฒาะ ทิน-ฮู่ง โน์ว ฒุ์ย เญย เสี่ย นอม ปุ้น ต้อ มี่ง โต๋ เหฌี่ย ป้าม เกน ม่าะ!”

2ตะเยี้ยด เต้า ฟิน-เมี่ยน ฯฒฯ มี่ง โต๋ นิ่น เญย ปุ้น เหฌี่ย ป้าม เกน. ฆ้าบ เจี๊ยน เฮยี่ย กะน้าย เญย เหยียน เหธา หฒั่ง เจี๋ย นิ่น เญย ฝัง วั้ว เต๋ย เมี่ยน ฯฒฯ ปุ๊ด โตะ ไห่ เญย ฟาง, มุน ตุ๊ ค้ว ไห่.

3ตะเหญ่ย เต้า ฟิน-เมี่ยน โต๋ นิ่น เญย ปุ้น เหฌี่ย ค้อย. ค้อย เญย ววม ฯฒฯ เป๋น ฑย้าม ฮนั้ง จั๋น-ไต่ เญย ฑย้าม นอ. เยียม ค้อย ม่าย แหม่ง เญย กะน้าย เหยียด ฒู้ง ไต่ เหฑ่ง หมี่ อ๊ะ.

4ตะฟาม เต้า ฟิน-เมี่ยน โต๋ นิ่น เญย ปุ้น เหฌี่ย เหยียด ฒู้ง ด้าย เหธา ววม-ฒี้ง. ววม ฯฒฯ เป๋น ฑย้าม เหฑ่ง.

5เยีย หย่า ไฮ์ กุ๊น ววม วั้ว เต้า ฟิน-เมี่ยน ก๊อง, “ธีง-เหฑ่ง เญย ทิน-ฮู่ง อ้า! เม่ย ต้ง ฒิ่น ด่าง เยียม, อี้ หฒั่น เยียม วั้ว เต้า. เม่ย ฮนั้ง น้าย ตุ๋น สี่ เซ แป้ง ฟิม เญย,

6เหว่ย หฒุ นิ่น บัว โหฒว ปุน ทิน-ฮู่ง เญย แปะ ฝีง เหธา โต่ว หว่า เมี่ยน เญย ฑย้าม เหลี่ยว ธ้วด, เม่ย หย่า ปุน ฑย้าม นิ่น บัว ฮบ, เซ วิ่น ตุ๊ หอบ นิ่น บัว โหฒว เญย สี่.

7เยีย แอ๋ง ไฮ์ ม่าย เฉีย เยียม เหฒี่ย-ต้อง เห่ว เจี๊ยน ก๊อง, ก๊อง, ‘เน่น เจี๋ย เญย เฒี้ยว ทิน-ฮู่ง อ้า! เม่ย เซี้ยม ฒุ์ย เม่ย เซี้ยน ตุ๊ เฒียน เญย, แป้ง ฟิม เญย.’”

8ตะเฝย เต้า ฟิน-เมี่ยน โต๋ นิ่น เญย ปุ้น เหฌี่ย บะฮนอย, ปุน บะฮนอย หล่ง หญุด โต์ว ปั๊ว เมี่ยน.

9เมี่ยน หฒุ หญุด โต์ว ปั๊ว, นิ่น บัว เหฒียว ทิน-ฮู่ง เญย บั๋ว, ต้ง ม่าย หลี่ง กุ๊น น้าย เต๋ย เหฒะ หน่าน วั้ว เต้า, มป่า นิ่น บัว ไม้ คั้ง ก๊อย เฮญี้ยว กวั่ง ฒุ์ย เธง ทิน-ฮู่ง.

10ตะฮม์ เต้า ฟิน-เมี่ยน โต๋ นิ่น เญย ปุ้น เหฌี่ย เฮยี่ย กะน้าย เญย เหว่ย. เฮยี่ย กะน้าย เญย กั๊วะ ฯฒฯ หฮมวัง เหฑ่ง. ป้าม เมี่ยน หงาด เจี๊ยน เบียด เหว่ย หฒุ นิ่น บัว มุน ตุ๊ โค้ว ไห่.

11หลาย นิ่น บัว หฒุ มุน, หฒุ ปุ๊ด ฟาง, นิ่น บัว เหฒียว เยียม ทิน-ต้อง เญย ทิน-ฮู่ง, มป่า นิ่น บัว ไม้ คั้ง ก๊อย เฮญี้ยว กวั่ง นิ่น บัว โหฒว เญย เอ๊าะ สี่.

12ตะหลัวะ เต้า ฟิน-เมี่ยน โต๋ นิ่น เญย ปุ้น เหฌี่ย ยูเฟติด ต้ม ด้าย. ด้าย ฯฒฯ ฆาย หมี่ อ๊ะ, เหว่ย คอย เจ๊า ปุน ตง ปูง แหมง ต้าย เญย ฮู่ง เตี๋ย ยั่ง.

13เยีย แอ๋ง ปวัด ปัว เต้า เฮยี่ย ไกว๊ เมี้ยน ฮนั้ง แก๊ง นอ, เยียม จูง-ฮู่ง เญย ฑุ่ย, เหธา เฮยี่ย กะน้าย เญย ฑุ่ย, เหธา วั้ว เต้า จ๊า โต่ว หว่า เมี่ยน เญย ฑุ่ย ธ้วด.

14น้าย เต๋ย ปัว เต้า เซ เอ๊าะ ไห่ เญย เมี้ยน หย่า โหฒว ตุ๊ บัวะ ฮ่อง เญย จั๋ง-โห่. นิ่น บัว มี่ง ล์อ ป้าม เกน เญย หฒวัง ฮู่ง, เหว่ย ต้อ นิ่น บัว กั๊บ ฒุ้น ต้าย ฒั้ว เถา เน่น เจี๋ย เญย ทิน-ฮู่ง เญย ต้ม ฮนอย เบ๊าะ จ๋า.

15“หมั่ง ม่าะ! เยีย อ๋อย ฮนั้ง จั๋น-หฒะ นอ ต้าย. หาย เต้า กีง เจี๊ยน เฮญี้ยว หย่า โก๋ว หลง นิ่น เญย ลุย-โหว, วั้ว เต้า ม่าย ออน-เหลาะ. นิ่น ไม้ หฒุ แล่ง แก๊ง เญย ยั่ง เจ๊า ตอง หฒวัง หฒุ ไญ้.”

16วั้ว เต๋ย เมี้ยน ฯฒฯ ต้อ วั้ว เต๋ย ฮู่ง เตี๋ย กั๊บ ฒุ้น เยียม นอม ต๋อง. น้าย นอม ต๋อง ฮิบลู หว่า เห่ว อาละมาเกดโดน.

17ตะเธี้ยด เต้า ฟิน-เมี่ยน โต๋ นิ่น เญย ปุ้น เหฌี่ย ด๊าม-ลู่ง, เยียม หฒั่ง ทิน-ฮู่ง เญย เปย๊า กะญั์ว เญย เหว่ย, ฯฒฯ ม่าย เฉีย โฮล เญย ธ้วด ต้าย ก๊อง, “เหฒียง อ๊า โล่ะ!”

18ก๊อง ลิ์ว ฯฒฯ ป์อง บะหลี่ง หฌับๆ เญย, ม่าย เหฒีย หญู่ง เฉีย บุย, บะอง บุย แพ์งๆ เญย. เดา หย่า ต์ง ตุ๊ เสย ไห่. เยียม ทิน-ฮู่ง เหฒย ป้าม เมี่ยน ต้าย เถา อี้ หฒั่น, ไม้ ม่าย เหยียด หฑุ่น ด่ง น้าย หฑุ่น ต์ง ตุ๊ เสย.

19วั้ว นอม ต้ม ฒี่ง ฯฒฯ บ๋าย เป๋น ปัว โก๊ว. หม่าน กั๊วะ เญย ฒี่ง หย่า บาง เหฑ่ง. ทิน-ฮู่ง จั๋ง หฒุ บาบีโลน ต้ม ฒี่ง ฯฒฯ ปุน ฒ้าน ติ๊ว นิ่น ฮบ, เซ ทิน-ฮู่ง เฉีย เจี์ย, โน์ว ไห่ ฒุ์ย เญย ติ๊ว.

20นอมๆ ค้อย-โฑว โหม่ว เต้า โหม่ว บยุ่ย, นอมๆ บง เฒียง หน่าย ไม้ ปวัด เหฑ่ง หมี่ อ๊ะ.

21แอ๋ง ม่าย ต้ม เปาะ เยียม วั้ว ลู่ง ด๊อด เหฌี่ย เบ๊าะ เมี่ยน. นอมๆ เปาะ ม่าย เฝย เหฒียบ กีโล เฮนี้ย. เมี่ยน ฯฒฯ เหฒียว ทิน-ฮู่ง หลาย ต้ม เปาะ เญย เหฒะ หน่าน ปะหละ โค้ว ธูง มี่ง.

← Chapter 15 Jump to: Chapter 17 →