Revelation 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1เยีย แอ๋ง ปวัด เต้า ฟิน-เมี่ยน เยียม ลู่ง เหฌี่ย ต้าย. ปั์ว นั้น เจี๊ยน โด ไห่ วั้ว นอม ค้วด เญย ฟ้อ-เฒ่ย เหธา ติ้ว ต้ม หลิ่ม.

2นิ่น เฒาะ จูง-ฮู่ง, ต้ง โล์-ฮนอย วั้ว ติ้ว ต้ม นาง, เซ เมี้ยน เญย ฮู่ง, ซาตาน, หล่ง หลิ่ม โด้ เจี๊ยน เหยียด ธิน หฮญัง.

3ฟิน-เมี่ยน เฒาะ นิ่น ฒอย เหฌี่ย โด ไห่ วั้ว นอม ค้วด, ฟ้อ เจี๊ยน ค้วด เญย แก้ง หย่า ฆ้าบ เจี๊ยน เหยียน, ไม้ ปุน นิ่น ธ้วด มี่ง ดั๊ว หม่าน กั๊วะ เญย เมี่ยน, ฒั้ว เถา วั้ว เต๋ย เหยียด ธิน หฮญัง เจี๋ย ลิ์ว. ฆะฮ้า อ๋อย หฒุ ปู๋ง นิ่น ธ้วด หธาม.

4เยีย แอ๋ง ปวัด เหฒีย นอม เหว่ย. เฒว์ย เจี๊ยน เหว่ย วั้ว เต๋ย ตุ๊ หลี่ง เซี้ยม ฒุ์ย. เยีย หย่า ปวัด เหว่ย เถง เยซู โหฒว ฒอง-เหฒง หย่า ฒุ่น ทิน-ฮู่ง เญย โต์ หฒุ ฮงะ จาง ดุ๊ด วั้ว เต๋ย เมี่ยน เญย ว่วน. นิ่น บัว ไม้ หฒั่ง เจี๋ย เฮยี่ย กะน้าย ไฟ เฮยี่ย กะน้าย เญย ฝัง หย่า ไม้ ฆ้าบ เฮยี่ย กะน้าย เญย เหยียน เยียม นิ่น บัว เญย ปย้อง ไฟ ปั์ว. นิ่น บัว นั่ง ต้าย ตุ๊ เหธา กีตู่ โหฒว ฮู่ง กุ๊น เหยียด ธิน หฮญัง.

5น้าย เซ เมี่ยน ไต่ มี่ง แอ๋ง นั่ง ต้าย เญย ต้าว ปาน. เหฒ่ง เหฌี่ย วั้ว เต๋ย ไต่ มี่ง เญย เมี่ยน ฒั้ว เถา ปวั๊ง วั้ว เต๋ย เหยียด ธิน หฮญัง หธีง ต้าย นั่ง.

6หาย เต้า ม่าย ป่วน เหธา ต้าว ปาน นั่ง ต้าย เญย เมี่ยน, วั้ว เต้า เซ ธีง-เหฑ่ง, ออน-เหลาะ อ๊ะ. ตะเหญ่ย หฑุ่น ไต่ เญย เจ๊า กุ๊น ไม้ เจี๊ยน นิ่น บัว. นิ่น บัว หย่า ตุ๊ โหฒว ทิน-ฮู่ง เหธา กีตู่ เญย ไซ เมี่ยน หย่า ตุ๊ เหธา กีตู่ กุ๊น เหยียด ธิน หฮญัง.

7ปวั๊ง วั้ว เต๋ย เหยียด ธิน หฮญัง, ซาตาน ฯฒฯ ตุ๊ เยียม หววน นิ่น วั้ว นอม โล่ ปู๋ง ธ้วด ต้าย.

8นิ่น ฯฒฯ มี่ง ดั๊ว ลู่ง เดี๊ย เปยย ปูง หม่าน กั๊วะ เญย เมี่ยน, เซ โกก เหธา มาโกก. ซาตาน อ๋อย ดั๊ว นิ่น บัว กั๊บ ฒุ้น ต้าย เบ๊าะ จ๋า. เมี่ยน โสว ธั้ม! ไห่, ด่ง ค้อย-เฮลน เญย ซา-เฒียว ธั้ม.

9นิ่น บัว มี่ง ปวั๊ง ลู่ง เดี๊ย หย่า เว่ย เจี๊ยน ทิน-ฮู่ง เญย แปะ ฝีง เญย เธี้ยง เหธา ทิน-ฮู่ง ฮนั้ม วั้ว นอม ฒี่ง. มป่า โต์ว เยียม วั้ว ลู่ง เหฌี่ย ต้าย ปั๊ว เหมียด เหฑ่ง นิ่น บัว.

10ดั๊ว นิ่น บัว วั้ว เต้า เมี้ยน เญย ฮู่ง หฒุ ฒอย เหฌี่ย เหฒียะ เจี๊ยน ฮู่ง เญย โต์ว-ค้อย กะญั์ว, ต้ง วั้ว เต้า เฮยี่ย กะน้าย เหธา วั้ว เต้า จ๊า โต่ว หว่า เมี่ยน หฒุ ฒอย เหฌี่ย เญย โต์ว-ค้อย. เยียม วั้ว นิ่น บัว เหยียด ลิ์ว เฒี่ยง ฮนอย เฒี่ยง ม์วน หฒุ เหฒย เถา หม่าน โก๊ว หม่าน ต่อย.

11เยีย แอ๋ง ปวัด นอม ต้ม เหว่ย บ๊บ แปะ เญย, หย่า ปวัด เฒว์ย เจี๊ยน เหว่ย วั้ว เต้า. ลู่ง เหธา เดา เยียม นิ่น เญย หฑะเฮมียน เปย๋า เหฑ่ง หมี่ อ๊ะ. เฒียง หน่าย ไม้ ปวัด หมี่ อ๊ะ.

12เยีย แอ๋ง ปวัด ไต่ มี่ง เญย เมี่ยน, ไม้ กุ๊น โหฒว โฮล โหฒว ไฝ, โซ้ว เจี๊ยน ฮู่ง เหว่ย เญย หฑะเฮมียน. โซว ฯฒฯ คอย ฆอย หมี่ อ๊ะ. แอ๋ง กั้น ม่าย หฌุ่น โซว คอย ฆอย เซ เฒี่ยง แหม่ง ตาน. ไต่ มี่ง เญย เมี่ยน ฯฒฯ หฒิว นิ่น บัว โหฒว เญย สี่, เอย เฟี้ย เจี๊ยน วั้ว เต๋ย โซว, หฒุ เซี้ยม.

13ค้อย ฯฒฯ ฝูง เหยียด ฒู้ง เยียม ค้อย ไต่ เญย เมี่ยน หฑวน. ไต่ เญย ชะ เหธา เยี่ยม เกน หย่า ฝูง เยียม นิ่น บัว วั้ว เต๋ย เมี่ยน หฑวน. เก๊าะ-เมี่ยน ฯฒฯ หฒิว เก๊าะ-เมี่ยน โหฒว เญย สี่ หฒุ เซี้ยม อ๊ะ.

14ไต่ เญย ชะ เหธา เยี่ยม เกน หฒุ ฒอย เหฌี่ย โต์ว-ค้อย. (น้าย โต์ว-ค้อย เซ หฒุ ไต่ เญย ตะเหญ่ย หฑุ่น.)

15สี ก๊อง หาย เต้า เญย บั๋ว ไม้ เฟี้ย เจี๊ยน เฒี่ยง แหม่ง ตาน, วั้ว เต้า ฯฒฯ หฒุ ฒอย เหฌี่ย โต์ว-ค้อย.

← Chapter 19 Jump to: Chapter 21 →