Revelation 3

Mien Bible (Thai Script) © Thailand Bible Society, 2007

← Chapter 2 Jump to: Chapter 4 →

1“เม่ย อ๋อย หฒุ เฟี้ย เฝียน ปุน ซาดิด จิว-ปาง เญย ฟิน-เมี่ยน, บั๋ว นิ่น, ‘ม่าย ทิน-ฮู่ง เญย เสี่ย นอม ลี่ง ว่วน หย่า ม่าย เสี่ย นอม เหฮลย วั้ว เต้า ฮนั้ง น้าย นอ ก๊อง. เยีย ฮิ้ว ตุ๊ เม่ย โหฒว เญย สี่. เยีย ฮิ้ว ตุ๊ เม่ย ดาม เม่ง เฒี่ยง เจี๊ยน เญย, มป่า เม่ย ไต่ หมี่ อ๊ะ.

2เญีย ต้าย ม่าะ! เหฒ่ง เหฌี่ย, อ๊า ลั่ม หฒุด เญย, อ๋อย หฒุ ปุน เฮ้น เจี์ย ต้าย, ไม้ ตู๋ง ปุน หฒุด เหฑ่ง เหว่ย หฒุ เยีย ปวัด เม่ย โหฒว เญย กง เอย เยีย เญย ทิน-ฮู่ง หมั่ง เซ ไม้ ตุ้น ยุ่น.

3ฮนั้ง หน่าย, อ๋อย หฒุ จั๋ง เจี๊ยน เมี่ยน หฌาว เจี๋ย เญย เหธา เม่ย ไฮ์ เจี๋ย เญย หว่า. อ๋อย หฒุ เอย เจี๊ยน โหฒว หย่า ก๊อย เฮญี้ยว กวั่ง ฒุ์ย. สี ก๊อง เม่ย ไม้ เญีย, เยีย ฯฒฯ มี่ง ล์อ เม่ย ฮนั้ง จั๋น-หฒะ นอ. เม่ย ฒู้ง ไม้ ฮิ้ว ตุ๊ เยีย หาย นอม เฒี่ยง โห่ เถา.

4‘มป่า เยียม เม่ย หน่าย ซาดิด จิว-ปาง หธ่อ ม่าย อี เหฒีย เต้า ไม้ ปุน นิ่น บัว เญย ลุย-โหว ไล่ ฮลบ. น้าย เต๋ย เมี่ยน ฯฒฯ ตุ๊ ฒุ ลุย-โหว-แปะ เหธา เยีย จวั่ง เจ๊า ยั่ง, เหว่ย หฒุ นิ่น บัว ผุย ตุ๊ อ๊ะ.

5หาย เต้า ตุ๊ ฮี่ง, วั้ว เต้า ตุ๊ ฒุ แปะ เญย ลุย-โหว. เยียม เฒี่ยง แหม่ง ตาน เยีย หย่า ไม้ ซ้อด นิ่น เญย บั๋ว กวั่ง. เยีย หย่า อ๋อย เยียม เยีย เญย เตีย เหธา นิ่น เญย ฟิน-เมี่ยน เญย หฑะเฮมียน เหญี่ยม วั้ว เต้า เป๋น เยีย เญย เมี่ยน.

6‘หาย เต้า ม่าย มน่อม อ๋อย หฒุ แปง มน่อม หมวัง หลง สีง ลี่ง ฮนั้ง หาย นอ บั๋ว หฒวัง จิว-ปาง.’

7“เม่ย อ๋อย หฒุ เฟี้ย เฝียน ปุน ฟีลาเดนเฟีย จิว-ปาง เญย ฟิน-เมี่ยน, บั๋ว นิ่น, ‘ธีง-เหฑ่ง เญย, เฒียน เญย วั้ว เต้า, นั้น ดาวิด ฮู่ง เญย ฟ้อ-เฒ่ย. นิ่น คอย ฆอย เญย, ไม้ ม่าย หาย เต้า ไฮ่ กวน. นิ่น กวน เญย, ไม้ ม่าย หาย เต้า คอย ตุ๊ ฆอย. นิ่น ฮนั้ง น้าย นอ ก๊อง.

8เยีย ฮิ้ว ตุ๊ เม่ย โหฒว เญย กง. หมั่ง ม่าะ! เยียม เม่ย เญย หฑะเฮมียน เยีย คอย ฆอย เต้า แก้ง หย่า ไม้ ม่าย หาย เต้า ไฮ่ กวน. เยีย ฮิ้ว ตุ๊ เม่ย ขูง ม่าย เต๋ย ป๊า ชะ, เม่ย หย่า เอย เจี๊ยน เยีย เญย หว่า, หย่า เหญี่ยม เยีย เญย บั๋ว.

9หมั่ง ม่าะ! ซาตาน เญย หวุ่ย เญย เมี่ยน, ต้ง เธง กั้น โหฒว ยิวไท เมี่ยน มป่า ไม้ เฒ์ย, นิ่น บัว ขูง ก๊อง-แปะ ฮนั้ง. เยีย อ๋อย ปุน นิ่น บัว ต้าย พัวะ เหฌี่ย เม่ย เญย เหฒา-เฮลน, ฯฒฯ ปุน นิ่น บัว ฮิ้ว ตุ๊ เยีย ฮนั้ม เม่ย.

10เหว่ย หฒุ เม่ย เอย เจี๊ยน เยีย เญย หว่า หล่ง หน่อย เตี๊ย โค้ว, เถา ป้าม เกน ปวั้ง ต้ม โค้ว หน่าน เหว่ย ปุน ลู่ง เดี๊ย เมี่ยน หฒุ เสย วั้ว หฒั่น, เยีย ฯฒฯ เปว เจี๊ยน เม่ย.

11‘เยีย อ๋อย ต้าย เซี้ยบ อ๊ะ. เม่ย ม่าย เญย อ๋อย หฒุ โก๋ว หลง เหว่ย ไม้ ปุน หาย เต้า ไฮ่ ธ้าง เม่ย เญย นี้ง.

12‘หาย เต้า ตุ๊ ฮี่ง, เยีย อ๋อย ปุน วั้ว เต้า เยียม เยีย เญย ทิน-ฮู่ง เญย สีง ติ่น โหฒว นอม เดี้ยว. นิ่น เหยียด ลิ์ว ไม้ ธ้วด สีง ติ่น อ๊ะ. เยีย อ๋อย เฟี้ย เยีย เญย ทิน-ฮู่ง เญย บั๋ว เยียม นิ่น เญย ซิน, หย่า อ๋อย เฟี้ย เยีย เญย ทิน-ฮู่ง เญย ฒี่ง เญย บั๋ว, ต้ง เยียม ทิน-ต้อง, เยีย เญย ทิน-ฮู่ง วั้ว เหฌี่ย ต้าย วั้ว นอม เซียง-เยลูซาเลม ฒี่ง. เยีย หย่า อ๋อย เฟี้ย เยีย กั้น เญย เซียง-บั๋ว เยียม นิ่น เญย ซิน.

13‘หาย เต้า ม่าย มน่อม อ๋อย หฒุ แปง มน่อม หมวัง หลง สีง ลี่ง ฮนั้ง หาย นอ บั๋ว หฒวัง จิว-ปาง.’

14“เม่ย อ๋อย หฒุ เฟี้ย ปุน เลาดีเซีย จิว-ปาง เญย ฟิน-เมี่ยน, บั๋ว นิ่น, ‘น้าย เซ โหฒว อาเมน วั้ว เต้า เญย หว่า, เซ เหฒียบ ฒัวะ เญย โหฒว เฒียน ฒอง-เหฒง หย่า โหฒว ทิน-ฮู่ง เหฒย ต้าย เญย หม่าน หมวด เญย กอน วั้ว เต้า, ฮนั้ง น้าย นอ ก๊อง,

15“เยีย ฮิ้ว ตุ๊ เม่ย โหฒว เญย กง, ฮิ้ว ตุ๊ เม่ย ไม้ จอม หย่า ไม้ หนัม. เฝย ตุ๊ เม่ย จอม ไฟ ไม้ เฒย แอ๊ะ, หนัม.

16มป่า, เหว่ย หฒุ เม่ย บัว เซ อุนๆ วั้ว, ไม้ จอม หย่า ไม้ หนัม, เยีย อ๋อย เลี้ย เม่ย ธ้วด เยีย เญย ฑุ่ย มี่ง.

17เม่ย ก๊อง, “เยีย ปุ๊ด ฒ่อย, หญู่งๆ ม่าย ฑ่อย, ไม้ เฉียม หฒุ หาย หญู่ง อ๊ะ.” มป่า เม่ย ไม้ ฮิ้ว ตุ๊ เม่ย ด่ง หาย โค้ว, ด่ง หาย ค้อ-เลี่ยน, จ่ม ไห่, มฒีง บั๊ว, ฌัง ซิน ธี้ ลี้ เญย เยียม.

18เยีย ขวิน เม่ย ม์าย เยีย หล่ง โล่ว โต์ว สิน ต้าย เญย เฒียน เจียม เหว่ย ปุน เม่ย ปุ๊ด ฒ่อย. หย่า ม์าย ลุย-โหว-แปะ ฒุ เจี๊ยน ปุน เม่ย ไม้ ไญ้, ไม้ หฒุ แล่ง แก๊ง เญย เยียม. หย่า อ๋อย หฒุ เถง เยีย ม์าย เดีย ฑ้าด เม่ย เญย มฒีง เหว่ย ปุน เม่ย ไฮ่ หมั่ง ตุ๊ ปวัด.

19‘ตะฟ่าน เยีย ฮนั้ม เญย เมี่ยน, เยีย ก๊อง-เหม หย่า เบ๊าะ หฌาว. ฮนั้ง หน่าย, เม่ย อ๋อย หฒุ จอม ต้าย ก๊อย เฮญี้ยว กวั่ง เม่ย เญย ฒุ์ย.

20หมั่ง ม่าะ! เยีย โซ้ว เจี๊ยน แก้ง ด่าง แง้ง แก้ง. หาย เต้า ไฮ์ เยีย เญย เฉีย หย่า คอย แก้ง เยีย ฯฒฯ เปียะ มี่ง เหธา นิ่น หญั่น หฮนาง, นิ่น หย่า เหธา เยีย หญั่น หฮนาง.

21‘หาย เต้า ตุ๊ ฮี่ง, เยีย ฯฒฯ ปุน วั้ว เต้า ม่าย เล์ย จวั่ง เยีย เญย เหว่ย เฒว์ย, ฮนั้ง เยีย ตุ๊ ฮี่ง ฯฒฯ เหธา เยีย เญย เตีย จวั่ง นิ่น เญย เหว่ย เฒว์ย.

22‘หาย เต้า ม่าย มน่อม อ๋อย หฒุ แปง มน่อม หมวัง หลง สีง ลี่ง ฮนั้ง หาย นอ บั๋ว หฒวัง จิว-ปาง.’”

← Chapter 2 Jump to: Chapter 4 →