1 Corinthians 1

Kamba (Mbivilia) 1956

Jump to: Chapter 2 →

1Vaulo, ũla wetiwe ethĩwe mũtũmwa wa Yesũ Klĩsto kwondũ wa kwenda kwa Ngai, na Sosithene mwana‐a‐asa waitũ,

2valũa ũũ witũ ũyĩvikĩe ĩkanisa ya Ngai yĩla yĩ Kolintho, asũ mavathanĩtw’e nthĩnĩ wa Klĩsto Yesũ, meetiwe methĩwe atheu, vamwe na onthe ma kĩla vandũ ala mekaĩlaa syĩtwa ya Mwĩaĩi waitũ Yesũ Klĩsto, Mwĩaĩi woo na waitũ:

3Mumo nĩwĩthĩwe nenyu na mũuo kuma kwa Ngai Asa waitũ na kwa Mwĩaĩi Yesũ Klĩsto.

4Nĩmũtũngĩaa Ngai wakwa mũvea matukũ onthe kwondũ wenyu, nũndũ wa mumo wa Ngai ũla mwanengiwe nthĩnĩ wa Klĩsto Yesũ;

5nĩkwĩthĩwa maũndũnĩ onthe nĩmũthuĩtw’e nthĩnĩ wake, ndetonĩ syonthe na ũmanyinĩ w’onthe;

6o tondũ ũkũsĩ wa Klĩsto walũlũmĩlw’e nthĩnĩ wenyu:

7ũkethĩa mũtiũnyivw’a nĩ mũthĩnzĩo o na wĩva w’onthe; mũkyeteela kwonanw’a kwa Mwĩaĩi waitũ Yesũ Klĩsto;

8nake nĩwe ũkamũlũlũmilya kũvĩka mũminũkĩlyo, nĩ kana mwĩthĩwe mũtavinganĩĩka mũthenya wa Mwĩaĩi waitũ Yesũ Klĩsto.

9Ngai e kĩthito, ũla nthĩnĩ wake mweetiwe mũlike mũambanĩ wa Mwana wake Yesũ Klĩsto, Mwĩaĩi waitũ.

10Na yu nĩmwĩsũva, ana‐a‐asa, syĩtwanĩ ya Mwĩaĩi waitũ Yesũ Klĩsto, nĩ kana inyw’onthe mũneene ũndũ o ũmwe, na nĩ kana kũikethĩwe ũtilĩkangano katĩ wenyu; ĩndĩ nĩ kana mũlũmanw’e vamwe kĩsũanĩonĩ kĩmwe na mũĩkĩanĩonĩ ũmwe.

11Nũndũ nĩnĩmanyĩthĩtw’e ũndũ wenyu, ana‐a‐asa, nĩ ala ma nyũmba ya Kiloe, kana kwĩ mateta katĩ wenyu.

12Na yu ũla ngũneena nĩ atĩ kĩla mũndũ wenyu easya, Nyie nĩ wa Vaulo; nakwa nĩ wa Avolo; nakwa nĩ wa Keva; nakwa nĩ wa Klĩsto.

13Klĩsto nĩ mũaan’ye? Vaulo nĩwe wambiwe kwondũ wenyu? Kana nĩmwavatisĩwe syĩtwanĩ ya Vaulo?

14Nĩmũtũngĩa Ngai mũvea nĩkwĩthĩwa ndyaavatĩsa ũmwe wenyu, ate o Kilisivo na Kaio;

15nĩ kana mũndũ o na wĩva ndakasye kana mwavatisiwe syĩtwanĩ yakwa.

16Na ĩngĩ navatĩsie ala me nyũmba ya Sitevana: eka asu, ndyĩsĩ ethĩwa nĩnavatisie ũngĩ.

17Nũndũ Klĩsto ndaandũma kũvatisa, ĩndĩ nĩ kana nĩtavan’ye ũla ũvoo mũseo: ti ũini wa ndeto, nĩ kana ngelan’yo ya Klĩsto ndĩkatuwe ya mana.

18Nũndũ ndeto ya ĩla ngelan’yo nĩ ũtumanu kwa ala maaa; ĩndĩ kwa ithyĩ ala atangĩĩe, nĩ vinya wa Ngai.

19Nũndũ nĩkũandĩkĩtwe, Ngaananga ũĩ wa ala oĩ, Na ũmanyi wa ala me na kĩlĩko, ngoolea.

20Aĩva ũla mũĩ? Aĩva mũandĩkĩ? Aĩva ũla mũkananĩi wa ĩvinda yĩĩ? Ngai ndaatw’ĩkĩthya ũĩ wa nthĩ ũtumanũ?

21Nĩkwĩthĩwa ũĩnĩ wa Ngai, nthĩ, kwondũ wa ũĩ wayo, ndĩaamũmanya Ngai, Ngai endie kũmatangĩĩa asu metĩkĩlaa kwondũ wa ũtumanu wa ũvoo ũla ũtavanaw’a.

22Nĩkwĩthĩwa Ayutĩ mendaa syama, na Akilili mamanthaa ũĩ:

23ĩndĩ ithyĩ tũtavanasya Klĩsto ũla wambiwe, kwa Ayuti nĩ ũndũ wa ũlulutĩkya, na kwa Andũ‐ma‐mbaĩ‐ĩngĩ nĩ ũtumanũ;

24ĩndĩ kwa ala metawa, ethĩwa nĩ Ayuti kana Akiliki, nĩ Klĩsto vinya wa Ngai na ũi wa Ngai.

25Nĩkwĩthĩwa ũtumanu wa Ngai wĩ ũĩ kwĩ andũ; na wonzu wa Ngai wĩ vinya kwĩ andũ.

26Nũndũ sisyai kwĩtwa kwenyu, ana‐a‐asa, kana ti aingĩ ala me na ũĩ wa mwĩĩ, ti aingĩ me na vinya, ti aingĩ me nguma, metawa:

27ĩndĩ Ngaĩ nĩwanyuvie maũndũ ma ũtumanu ma nthĩ, nĩ kana atonye kũmasonokya asu oĩ; na Ngai nĩwanyuvie syĩndũ mbonzu sya nthĩ, nĩ kana atonye kwisonokya syĩndũ ila syĩ vinya;

28na syĩndũ sya nthĩ ite ndaĩa, na syĩndũ ila ivũthaw’a, nĩsyo Ngai wanyuvie, ĩĩ, na syĩndũ ila ite vo, nĩ kana atonye kwitw’ĩkĩthya sya mana syĩndũ ila syĩ vo:

29kũikethĩwe ũla wĩ na mwĩĩ o na wĩva w’onthe kwĩkathĩĩa mbee wa Ngai.

30Ĩndĩ nũndũ wake inyw’ĩ mũnengetwe kwĩthĩwa nthĩnĩ wa Klĩsto Yesũ, ũla ũtw’ĩtwe kwitũ ũĩ ũla wumaa kwa Ngai, na ũlũngalu, na kũvathanw’a, na wovosyo:

31nĩ kana, o tondũ kũandĩkĩtwe, Ũla wĩkathĩĩaa, nĩekathĩĩe nthĩnĩ wa Mwĩaĩĩ.

Jump to: Chapter 2 →