1 Corinthians 8

Kamba (Mbivilia) 1956

← Chapter 7 Jump to: Chapter 9 →

1Na yu, ũndũ wa syĩndũ ila ithembeawa mĩvw’anano: Nĩtwĩsĩ kana ithyonthe twĩ na ũmanyi. Ũmanyi ũetae ngathĩĩo, ĩndĩ wendo nĩwakaa.

2Ethĩwa mũndũ eyonaa ta wĩsĩ ũndũ o na wĩva, ndanamba kũmanya ũndũ waĩle ũmanya;

3ĩndĩ ethĩwa mũndũ o na wĩva nũmwendete Ngai, ũsu nĩwĩsĩkĩwe nĩwe.

4Ĩndĩ ũndũ wa ũvoo ũũ wa kũya syĩndũ ithembeawa mivw’anano, nĩtwĩsĩ kana mũvw’anano ti kĩndũ kũũ nthĩ, na atĩ kũi Ngai ũngĩ ate o ũmwe weka.

5Nũndũ o na kwethĩwa kwĩ ingĩ syĩtawa ngai, syethĩwa syĩ ĩtunĩ, o na syethĩwa syĩ nthĩ; o ũndũ kwĩ ngai nyingĩ, na eaii aingĩ;

6ĩndĩ kwitũ kwĩ Ngai o ũmwe, nake nĩwe Asa, ũla syĩndũ syonthe syumaa kwake, na ithyĩ twi make; na kwĩ Mwĩaĩi ũmwe, Yesũ Klĩsto, na syĩndũ syonthe nĩ kwondũ wake, na ithyĩ twi kwondũ wake.

7Ĩndĩ ũmanyi ũsu ndwĩ nthĩnĩ wa andũ onthe: ĩndĩ amwe, mamanyĩie maũndũ ma mĩvw’anano kũvika na yu, maĩsaa ta kĩndũ kĩthembewe mũvw’anano; na wasya wa ngoo woo nĩkwĩthĩwa nĩ mwonzu nũvukaa.

8Ĩndĩ kya ũya kĩitwĩtĩkĩlĩthya kwa Ngai: o na ethĩwa tũtiũya, tũtiũnyivĩwa nĩ kĩndũ; na ethĩwa nĩtũũya tũtingĩvĩwa nĩ kĩndũ.

9Ĩndĩ sũvĩai kũthaw’a ku kwenyu kũikethĩwe ũlulutĩkyo kwa ala onzu.

10Nũndũ ethĩwa mũndũ ekwona we, wĩ na ũmanyi, ũilyĩ lĩunĩ ĩkalũnĩ ya mũvw’anano; nake ethĩwa nĩ mwonzu, wasya wa ngoo wake ndũkongeleelwa ũkũmbaũ wa ũya syĩndũ ithembeawa mĩvw’anano?

11Nũndũ kwondũ wa ũmanyi waku ũla mwonzu nũnũkwaa, nake nĩ mwana‐a‐au, ũla Klĩsto wakwie kwondũ wake.

12Na kwondũ wa ũu, mũkimeka ana‐a‐au naĩ, na kũmakũna wasya wa ngoo woo ũte vinya, mwĩmwĩka Klĩsto naĩ.

13Kwondũ wa ũu, ethĩwa lĩu nũũmũlulutĩkya mwana‐a‐asa, ndikaya nyama kũvika tene na tene, nĩ kana ndikamũlulutĩkye mwana‐a‐asa.

← Chapter 7 Jump to: Chapter 9 →